మన పూర్వీకుల వందేళ్ల సీక్రెట్ ఫుడ్ ఇదే.. ఎండాకాలం ఓ గ్లాసు తాగితే రోజంతా బాడీ కూల్ కూల్..

Finger Millet Malt

రాగి జావ, లేదా రాగి అంబలి, భారతీయ సంప్రదాయంలో ఎంతో ప్రాముఖ్యత కలిగిన, రుచికరమైన.. ఆరోగ్యకరమైన పానీయం. దీనిని తయారు చేయడం చాలా సులువు.. కానీ ఇది అందించే ఆరోగ్య ప్రయోజనాలు అపారమైనవి. రాగులు, లేదా ఫింగర్ మిల్లెట్, పోషకాల గని.. ఇవి ఫైబర్, కాల్షియంకు అద్భుతమైన మూలం.. ఇది ఎముకలను బలంగా ఉంచడంలో సహాయపడుతుంది. ఇంకా జీర్ణవ్యవస్థను ఆరోగ్యంగా ఉంచుతుంది. అయితే.. ఎండాకాలంలో రాగి జావ తాగడం చాలా మంచిది. ఎందుకంటే.. రాగి జావ.. శరీరాన్ని చల్లగా ఉంచడంతోపాటు.. ఎన్నో పోషకాలను, శక్తిని అందిస్తుంది.. ఈ పానీయం పిల్లలు, మధుమేహ వ్యాధిగ్రస్తులు, అన్ని వయసుల వారికి అనువైనదని.. ఎండాకాలంలో రెగ్యులర్‌గా తీసుకోవాలని ఆరోగ్య నిపుణులు సూచిస్తున్నారు.

వేసవికి అనువైన రాగి జావ తయారీ విధానాన్ని వివరంగా తెలుసుకోండి..

రాగి జావ తయారీకి కావాల్సిన పదార్థాలు: నీరు, రాగి పిండి, మజ్జిగ, ఉప్పు.. వీటిని అవసరానికి అనుగుణంగా తీసుకోవాలి..

రాగి జావ తయారీ విధానం:

1. ముందుగా, స్టవ్ మీద ఒక గిన్నె పెట్టి, అందులో ఒక గ్లాసు నీటిని పోయాలి. మంటను మీడియం ఫ్లేమ్‌లో పెట్టి, నీళ్లు రోలింగ్ బాయిలింగ్ అయ్యేంత వరకు మరిగించాలి.
2. నీళ్లు మరిగే లోపు, మరో చిన్న గిన్నెలో ఒక టేబుల్‌స్పూన్ రాగి పిండిని తీసుకోవాలి. రాగులను శుభ్రంగా కడిగి, ఎండబెట్టి, మిల్లు పట్టించుకుంటే మెత్తటి రాగి పిండి తయారవుతుంది. ఈ రాగి పిండిలోకి కొద్దిగా నీటిని చేర్చి, స్పూన్‌తో ఉండలు లేకుండా బాగా కలుపుకోవాలి. ఈ మిశ్రమాన్ని పక్కన పెట్టుకోవాలి.
3. నీళ్లు మరుగుతున్నప్పుడు, రుచికి సరిపడా కొద్దిగా ఉప్పును చేర్చాలి.
4. ఇప్పుడు, ముందుగా కలిపి పెట్టుకున్న రాగి పిండి మిశ్రమాన్ని మరుగుతున్న నీటిలోకి నెమ్మదిగా పోస్తూ, గరిటతో నిరంతరం కలుపుతూ ఉండాలి. ఉండలు కట్టకుండా జాగ్రత్త వహించాలి.
5. మీడియం మంటపై ఐదు నిమిషాల పాటు, ఈ మిశ్రమం చిక్కబడే వరకు మరిగించాలి. చిక్కబడిన తర్వాత, స్టవ్ ఆఫ్ చేయాలి. రాగి జావ చల్లారిన తర్వాత మరింత చిక్కబడుతుంది కాబట్టి, ఇక్కడ ఒక గ్లాసు నీటికి ఒక టేబుల్‌స్పూన్ రాగి పిండి మాత్రమే ఉపయోగించబడింది.
6. స్టవ్ ఆఫ్ చేసిన తర్వాత, రాగి జావ చల్లారే వరకు గరిటతో తిప్పుతూ ఉండాలి. ఇలా చేయడం వల్ల పైన మీగడ కట్టకుండా, జావ ఏకరీతిగా చల్లబడుతుంది.
7. రాగి జావ పూర్తిగా చల్లారిన తర్వాత, ఒక కప్పు పెరుగును తీసుకుని, దానిని చిలికి చిక్కటి మజ్జిగను తయారు చేసుకోవాలి.
8. చల్లారిన రాగి జావలోకి ఈ చిక్కటి మజ్జిగను చేర్చి, పూర్తిగా మిక్స్ చేయాలి. రుచి చూసి, అవసరమైతే మరికొద్దిగా ఉప్పు కలుపుకోవచ్చు.
9. ఈ అంబలిని పుల్లగా ఇష్టపడేవారు కొద్దిగా పుల్లటి మజ్జిగను ఉపయోగించవచ్చు.
10. అంతేకాకుండా.. కొంచెం తురుమిన ఉల్లి, పచ్చి మర్చి చేర్చుకోవచ్చు..
11. ఇప్పుడు, ఈ రాగి జావను గ్లాసులోకి తీసుకుని సర్వ్ చేయాలి.
12. రాగిజావను ప్లేన్‌గా తాగవచ్చు లేదా కొద్దిగా ఉల్లిపాయ, పచ్చిమిర్చి వంటి వాటితో కలిపి తీసుకోవచ్చు.

రాగి జావ ఆరోగ్య ప్రయోజనాలు:

రాగులలో ఉండే ఫైబర్ జీర్ణక్రియను మెరుగుపరుస్తుంది. బరువు తగ్గడానికి సహాయపడుతుంది. కాల్షియం అధికంగా ఉండటం వల్ల ఎముకలు దృఢంగా తయారవుతాయి. ఇది వృద్ధాప్యంలో వచ్చే ఎముకల బలహీనతను నిరోధించడంలో సహాయపడుతుంది. మధుమేహ వ్యాధిగ్రస్తులకు ఇది ఒక సురక్షితమైన ఆహారం.. ఎందుకంటే ఇది రక్తంలో చక్కెర స్థాయిలను స్థిరంగా ఉంచడంలో సహాయపడుతుంది. వేసవిలో రోజూ ఒక గ్లాసు రాగి జావ తీసుకోవడం వల్ల శరీరం డీహైడ్రేషన్ బారిన పడకుండా ఉండి, శరీరాన్ని చల్లగా ఉంచుతుంది. ఈ సంప్రదాయ పానీయం అన్ని వయసుల వారికీ ఎంతో ప్రయోజనకరమైనది.