నోరూరించే ఆంధ్రా స్టైల్ దోసకాయ పచ్చడి చేసిన ‘గోల్మాల్’ నటి అశ్విని కల్సేకర్..
దోసకాయ పచ్చడి అనగానే మనకు ఆ పుల్లపుల్లని రుచి, మధ్యలో తగిలే ముక్కల కరకరలాడే గుణం గుర్తొస్తుంది. అశ్విని కల్సేకర్ తన వీడియోలో దోసకాయ పచ్చడి ప్రాముఖ్యతను వివరిస్తూ, ఇంట్లోనే సులభంగా చేసుకునే పద్ధతిని చూపించారు. సినిమాల్లో సీరియస్ రోల్స్ తో మెప్పించే అశ్విని, వంటింట్లో చిట్కాలు చెబుతూ కనిపించడం అభిమానులను అలరిస్తోంది.
‘గోల్మాల్’, ‘అంధాధున్’, ‘జోధా అక్బర్’ వంటి చిత్రాలతో నటిగా మంచి గుర్తింపు తెచ్చుకున్న అశ్విని కల్సేకర్, ఇప్పుడు వంటగదిలో తన నైపుణ్యాన్ని ప్రదర్శిస్తూ అందరినీ ఆశ్చర్యపరుస్తున్నారు. సోషల్ మీడియాలో తరచూ తన ఫుడ్ అడ్వెంచర్లను పంచుకునే ఈ నటి, తాజాగా తెలుగు వారి ఫేవరెట్ ‘దోసకాయ పచ్చడి’ రెసిపీని షేర్ చేశారు. ఆంధ్ర స్టైల్ చట్నీ అంటే తనకు ఎంతో ఇష్టమని చెబుతూ, కేవలం నిమిషాల్లో దీనిని ఎలా తయారు చేయాలో అశ్విని వివరించారు.
అశ్విని స్టైల్ దోసకాయ పచ్చడి
- మొదట దోసకాయ తొక్క తీసి, గింజలను తొలగించి చిన్న చిన్న ముక్కలుగా కోసి పక్కన పెట్టుకోవాలి.
- ఒక పాన్లో నూనె వేడి చేసి, అందులో **2 టేబుల్ స్పూన్ల మినప్పప్పు** వేసి ఎర్రగా అయ్యే వరకు వేయించాలి.
- ఆ తర్వాత 1/4 స్పూన్ మెంతులు, 2 టేబుల్ స్పూన్ల ఆవాలు, ఇంగువ, పచ్చిమిర్చి మరియు ఎండుమిర్చి కలపాలి.
- రుచి కోసం కొద్దిగా చింతపండు గుజ్జు మరియు చిన్న బెల్లం ముక్కను జోడించి ఉడికించాలి.
- ఈ మిశ్రమం చల్లారిన తర్వాత ఉప్పు, పసుపు వేసి గ్రైండర్ లో వేయాలి. ఇక్కడే ఒక ముఖ్యమైన చిట్కా ఏంటంటే.. అస్సలు నీరు పోయకుండా కేవలం కచ్చాపచ్చాగా గ్రైండ్ చేయాలి. అప్పుడే ఆ పచ్చడికి అసలైన రుచి వస్తుంది.
కొంకణి స్పెషల్
దోసకాయ పచ్చడి మాత్రమే కాదు, గతంలో అశ్విని తన తల్లి నేర్పించిన ‘అంబట్ బటాటా’ అనే కొంకణి స్టైల్ పొటాటో కర్రీని కూడా పరిచయం చేశారు. ఇది బంగాళదుంపలతో చేసే పుల్లటి కూర. ఆవాలు, ఇంగువతో తాలింపు వేసి, కొబ్బరి-చింతపండు పేస్ట్తో దీనిని తయారు చేస్తారు. అన్నం లేదా పూరీతో ఈ కూర అద్భుతంగా ఉంటుందని ఆమె పేర్కొన్నారు. “వంట అనేది కేవలం అవసరం కాదు, అదొక సృజనాత్మకత” అని ఆమె తన పోస్టుల ద్వారా నిరూపిస్తున్నారు. మీరు కూడా ఈ వీకెండ్ అశ్విని స్టైల్ దోసకాయ పచ్చడిని ట్రై చేసి చూడండి!