ధనవంతులు కావాలనుకుంటున్నారా? వారెన్ బఫెట్ చెప్పిన 10 సూత్రాలు పాటిస్తే మీ తలరాత మారిపోవడం ఖాయం!
ప్రపంచ కుబేరుల జాబితాలో ఆయన పేరు ఎప్పుడూ ముందుంటుంది. రూపాయి రూపాయిని పోగు చేస్తూ, పెట్టుబడి సూత్రాలతో అపర కుబేరుడిగా ఎదిగిన ఆయన జీవితం ఒక తెరిచిన పుస్తకం. యువతకు స్ఫూర్తి. కేవలం సంపదను సృష్టించడమే కాదు, ఆ సంపదను ఎలా కాపాడుకోవాలి...
వ్యక్తిత్వాన్ని ఎలా తీర్చిదిద్దుకోవాలి అనే విషయాల్లో ఆయన చెప్పే పాఠాలు కోట్లాది మందికి దిశానిర్దేశం చేస్తాయి. ‘ఓమాహా మాంత్రికుడు’గా పిలవబడే ఆ ఇన్వెస్ట్మెంట్ గురువు విజయ రహస్యాలేంటో తెలుసుకుందాం.. ఆయన తన 11వ ఏటనే మొదటి షేరును కొన్నారు. పేపర్లు వేస్తూ సంపాదన మొదలుపెట్టి, నేడు ప్రపంచ ఆర్థిక వ్యవస్థను శాసించే స్థాయికి ఎదిగారు. విలాసవంతమైన జీవితం కంటే విలువైన ఆలోచనలకే ఆయన ప్రాధాన్యత ఇస్తారు. ఆయన ఆఫీసులో కంప్యూటర్ ఉండదు కానీ, రోజూ వందలాది పేజీల పుస్తకాలు చదువుతారు. ఆర్థిక క్రమశిక్షణకు నిలువుటద్దంలా నిలిచే ఆ మహానుభావుడు మరెవరో కాదు.. వారెన్ బఫెట్. సామాన్యుడు సైతం అసాధారణ విజయాన్ని ఎలా సాధించవచ్చో ఆయన చెప్పిన జీవన సూత్రాలివే.
- మంచి పేరు సంపాదించడానికి ఇరవై ఏళ్లు పడితే, దానిని పాడుచేసుకోవడానికి కేవలం ఐదు నిమిషాలు చాలు. అందుకే ప్రతి పనిని నిజాయితీతో, బాధ్యతతో చేయాలని బఫెట్ సూచిస్తారు. వ్యక్తిగత ప్రతిష్టను మించిన ఆస్తి మరొకటి లేదని ఆయన నమ్మకం.
- మన చుట్టూ ఉండేవారు మన భవిష్యత్తును నిర్ణయిస్తారు. మనకంటే తెలివైన, సానుకూల దృక్పథం ఉన్న వ్యక్తులతో స్నేహం చేస్తే మన ఎదుగుదల వేగంగా ఉంటుంది. సరైన వాతావరణం మనిషిని ఉన్నత శిఖరాలకు చేరుస్తుంది.
- చాలామంది షేర్ మార్కెట్ లేదా వ్యాపారం అంటే రిస్క్ అనుకుంటారు. కానీ బఫెట్ ప్రకారం, మనం ఏమి చేస్తున్నామో తెలియక చేయడమే అతిపెద్ద రిస్క్. జ్ఞానాన్ని పెంచుకున్నప్పుడు భయం పోయి, సరైన నిర్ణయాలు తీసుకునే అవకాశం కలుగుతుంది.
- చాలామంది ఆదాయం రాగానే ఖర్చు చేసి, మిగిలితే ఆదా చేద్దాం అనుకుంటారు. కానీ బఫెట్ సూత్రం ఇందుకు భిన్నం. ముందుగా ఆదా చేయాలి, ఆ తర్వాతే మిగిలిన డబ్బుతో ఖర్చులు చూసుకోవాలి. అలాగే ఒకే ఆదాయ వనరుపై ఆధారపడటం ప్రమాదకరమని, అదనపు వనరులను సృష్టించుకోవాలని ఆయన హితవు పలికారు.
- వారెన్ బఫెట్ విజయంలో ‘సహనం’ ప్రధాన పాత్ర పోషిస్తుంది. తాత్కాలిక లాభాల కోసం వెంపర్లాడకుండా, పది లేదా ఇరవై ఏళ్ల తర్వాత వచ్చే ప్రయోజనాలను దృష్టిలో పెట్టుకుని పెట్టుబడులు పెట్టాలి. సహనం ఉన్నవారే వ్యాపారంలో నిజమైన విజేతలుగా నిలుస్తారు.
- ప్రతిరోజూ చదవడం, నేర్చుకోవడం అనేవి బఫెట్ అలవాట్లు. మనం తీసుకునే చిన్న చిన్న నిర్ణయాలే భవిష్యత్తును నిర్మిస్తాయి. మార్కెట్ ఒడిదుడుకులను చూసి భయపడకుండా, వాటిని అవకాశాలుగా మార్చుకోవడమే అసలైన తెలివితేటలు.
విజయానికి అడ్డదారులు ఉండవని, క్రమశిక్షణ మరియు సరైన ఆలోచనా విధానమే మార్గమని వారెన్ బఫెట్ జీవితం నిరూపిస్తుంది. మీరు కూడా ఆర్థిక స్వాతంత్ర్యం పొందాలని ఆశిస్తున్నారా? అయితే నేటి నుండే ఆయన చెప్పిన ఈ విలువైన సూత్రాలను పాటించడం మొదలుపెట్టండి.