Tomatoes: సైన్స్‌కు సవాల్.. కోట్ల ఏళ్ల నాటి లక్షణాలు తిరిగి పొందుతున్న టమాటాలు

Wild Tomatos Reverse Evolution

టమాటాలలో చోటుచేసుకుంటున్న ఈ మార్పులను పరిశోధకుల బృందం “తిరోగమన పరిణామం” (Reverse Evolution)గా అభివర్ణిస్తోంది. పరిణామం సాధారణంగా ఒకే దిశలో సాగుతుందని, వెనక్కి మళ్లదని జీవశాస్త్ర ప్రపంచంలో విస్తృతంగా నమ్ముతారు. అలాంటిది, ఈ గెలాపాగోస్ టమాటాలు మాత్రం పరిణామాన్ని వెనక్కి తిప్పుతూ, ఒకప్పుడు కోల్పోయిన లక్షణాలను తిరిగి పొందుతున్నట్లు కనిపిస్తోంది. ఇది కేవలం వివాదాస్పదమే కాదు, అత్యంత అసంభవమైనదిగా కూడా పరిగణిస్తారు.

టమాటా పరిణామంలో వింత మలుపు

సాధారణంగా, పరిణామం ప్రస్తుత పరిస్థితులకు అనుగుణంగా జీవులను మారుస్తూ ముందుకు సాగుతుంది. కోల్పోయిన లక్షణాలను తిరిగి పొందడం, అది కూడా అదే జన్యు మార్గంలో పొందడం అసాధారణం. కానీ, గెలాపాగోస్‌లోని ఈ టమాటాలు సరిగ్గా అదే చేస్తున్నాయి. “ఇది మనం సాధారణంగా ఆశించని విషయం. కానీ, అగ్నిపర్వత ద్వీపంలో ఇది నిజంగా జరుగుతోంది” అని యూసీ రివర్‌సైడ్‌కు చెందిన మాలిక్యులర్ బయోకెమిస్ట్, అధ్యయన ప్రధాన రచయిత ఆడమ్ జోస్వియాక్ అన్నారు.

ఈ టమాటాలు సాధారణ ఆల్కలాయిడ్ల (బంగాళదుంపలు, వంకాయల వంటి నైట్‌షేడ్ మొక్కలు తమను రక్షించుకోవడానికి ఉత్పత్తి చేసే చేదు రసాయనాలు)ను మాత్రమే కాకుండా, వాటిలో ఒక పురాతన రూపాన్ని తయారు చేస్తున్నాయి. ఇవి ప్రస్తుతం సాగు చేస్తున్న టమాటాల్లో కనిపించే ఆల్కలాయిడ్ల కంటే భిన్నంగా ఉన్నాయి.

గతం నుంచి రసాయన క్లూ

పరిశోధనా బృందం గెలాపాగోస్ అంతటా 30కి పైగా టమాటా నమూనాలను సేకరించింది. తూర్పున ఉన్న పాత దీవుల్లో, టమాటాలు ఆశించిన ఆధునిక ఆల్కలాయిడ్లను ఉత్పత్తి చేశాయి. కానీ, పశ్చిమాన ఉన్న చిన్న, రాతితో కూడుకున్న దీవుల్లో పరిస్థితి మారింది. అక్కడి మొక్కలు వేరే రసాయన రూపాన్ని ఉత్పత్తి చేస్తున్నాయి. ఇది పూర్వకాలం టమాటాల్లో మాత్రమే కనిపించే నిర్మాణం, వంకాయ వంటి వాటిలో ఇప్పటికీ ఉంది.

ప్రకృతి కఠిన పరిస్థితులే కారణమా?

ఇలా ఎందుకు జరుగుతోంది? పరిశోధకుల అభిప్రాయం ప్రకారం, టమాటా పరిణామం వెనక్కి తిరగడానికి దీవులే కారణం. తూర్పు దీవులు పాతవి, మరింత స్థిరంగా, సుసంపన్నమైన పర్యావరణ వ్యవస్థలను కలిగి ఉన్నాయి. పశ్చిమ దీవులు కొత్తవి, కఠినమైనవి, తక్కువ అభివృద్ధి చెందినవి. అక్కడి మొక్కలు కఠినమైన పరిస్థితులకు స్పందించి, పాత, బలమైన రసాయన రక్షణను ఆశ్రయిస్తున్నట్లు ఉండవచ్చు. “పురాతన అణువు కఠినమైన పశ్చిమ పరిస్థితులలో మెరుగైన రక్షణను అందిస్తుంది” అని జోస్వియాక్ అన్నారు.