చత్రిక సర్పం.. చూస్తే భయం.. కానీ నిజంగా ఎంత ప్రమాదకరం?

Bronzeback Snake

పాము కనిపిస్తే చాలు చాలామంది భయంతో దూరంగా పారిపోతారు. కానీ మన చుట్టూ కనిపించే అన్ని పాములూ విషపూరితమైనవి కావు. అలాంటి వాటిలో ఒకటే చత్రిక సర్పం. శాస్త్రీయంగా కాంస్యవర్ణ చెట్ల పాము (డెండ్రెలాఫిస్ ట్రిస్టిస్) అని పిలిచే ఈ పాము విషం లేనిది. మనుషులకు హాని చేయదు. అయినప్పటికీ అపోహల కారణంగా చాలా సందర్భాల్లో ఈ పాములు చనిపోతుంటాయి.

చత్రిక సర్పం ప్రత్యేకతలు

చత్రిక సర్పం పొడవుగా, సన్నగా ఉంటుంది. దీని శరీరంపై కాంస్య రంగు మెరుపు కనిపించడంతో దీనికి బ్రోంజ్‌బ్యాక్ అనే పేరు వచ్చింది. ఇది ఎక్కువగా చెట్లపైనే జీవిస్తుంది. అందుకే దీనిని ట్రీ స్నేక్ అని కూడా పిలుస్తారు. ఈ పాముకు విషం ఉండదు. ఇది మనిషిని చూసి దాడి చేయదు. ప్రమాదం అనిపిస్తే వెంటనే చెట్లెక్కిపోవడం లేదా వేగంగా పారిపోవడం దీని స్వభావం. చత్రిక సర్పం ప్రధానంగా… బల్లులు, చిన్న కప్పలు, చిన్న పక్షులు, కీటకాలు వంటివి ఆహారంగా తీసుకుంటుంది. దీంతో పర్యావరణ సమతుల్యతను కాపాడడంలో కీలక పాత్ర పోషిస్తుంది. చెట్లు ఎక్కువగా ఉన్న ప్రాంతాలు, తోటలు, వ్యవసాయ పొలాలు, గ్రామాల పరిసరాలు, అడవులు వంటి ప్రాంతాల్లో ఎక్కువగా కనిపిస్తుంది.

ఇది అత్యంత వేగంగా కదిలే చెట్ల పాముల్లో ఒకటి. పగటి సమయంలోనే ఎక్కువగా సంచరిస్తుంది. చెట్టు కొమ్మల మధ్య చురుకుగా సంచరిస్తుంది. మనుషులను చూసిన వెంటనే తప్పించుకోవడానికి ప్రయత్నిస్తుంది. విషం లేకపోయినా, భయంతో కొన్నిసార్లు కరవొచ్చు. అయితే ఆ కాటు ప్రమాదకరం కాదు. చత్రిక సర్పం కనిపించినప్పుడు భయపడాల్సిన అవసరం లేదు. దానిని చంపేందుకు ప్రయత్నించకుండా, దానికి దారి ఇవ్వాలి. ఇంట్లోకి వస్తే స్థానిక స్నేక్ రెస్క్యూ బృందానికి సమాచారం ఇవ్వడం మంచిది.

చత్రిక సర్పం మనుషులకు శత్రువు కాదు.. ప్రకృతికి మిత్రుడు. విషం లేని ఈ పాము పర్యావరణ సమతుల్యతను కాపాడడంలో ముఖ్యమైన పాత్ర పోషిస్తుంది. అందుకే అపోహలతో చంపకుండా.. దాని గురించి అవగాహన పెంచుకోవడం అవసరం.

Jangaon: 2 క్వార్టర్స్ తాగాడు.. తిరుపతి వెళ్లడానికి ట్రైన్స్ లేకపోవడంతో..