Diabetes Diet Tips: మధుమేహం ఉన్నా పాయసం తినొచ్చు.. ఎలాగో తెలిస్తే ఎగిరి గంతేస్తారు!

పాయసం తయారుచేసే విధానంలో కొన్ని చిన్న మార్పులు చేసుకోవడం, ఉపయోగించే పదార్థాల విషయంలో జాగ్రత్తలు పాటించడం ద్వారా మధుమేహం ఉన్నవారు కూడా అప్పుడప్పుడు పరిమితంగా పాయసాన్ని ఆస్వాదించవచ్చు. మరి పాయసంలో ఎలాంటి బియ్యం వాడాలి? పంచదారకు బదులుగా ఏవి ఉపయోగించవచ్చు? ఎంత మోతాదులో తినాలి? రాత్రిపూట పాయసం తింటే ఎలాంటి జాగ్రత్తలు తీసుకోవాలి? తెలుసుకుందాం.

పాయసం తయారీలో ఈ బియ్యం ఎంచుకోండి!

సాధారణంగా పాయసం తయారుచేయడానికి తెల్ల బియ్యాన్ని ఉపయోగిస్తారు. అయితే మధుమేహం ఉన్నవారు బాస్మతి బియ్యం లేదా బ్రౌన్ రైస్‌ను ప్రత్యామ్నాయంగా ఎంచుకోవచ్చు. వీటిలో కొన్ని రకాలు సాధారణ తెల్ల బియ్యంతో పోలిస్తే తక్కువ గ్లైసెమిక్ ఇండెక్స్ కలిగి ఉండవచ్చు. అయితే బియ్యం రకం, వండే విధానం, తీసుకునే పరిమాణాన్ని బట్టి రక్తంలో చక్కెరపై ప్రభావం మారుతుంది.

పాయసం తయారుచేసేటప్పుడు బియ్యం పరిమాణాన్ని తగ్గించి, పాలను కొద్దిసేపు మరిగించి చిక్కగా చేసుకోవచ్చు. ఇలా చేయడం వల్ల పాయసానికి మంచి రుచి వస్తుంది. అదే సమయంలో బియ్యం ఎక్కువగా తీసుకోకుండా నియంత్రించుకోవచ్చు.

పంచదారకు బదులుగా బెల్లం వాడొచ్చా?

పాయసానికి తీపి రావాలంటే చాలామంది పంచదార లేదా బెల్లం ఉపయోగిస్తారు. అయితే మధుమేహం ఉన్నవారు బెల్లం వాడితే రక్తంలో చక్కెర పెరగదని భావించడం పొరపాటు. బెల్లంలో కూడా చక్కెరలు ఉంటాయి. కాబట్టి బెల్లం కూడా రక్తంలో గ్లూకోజ్ స్థాయిలను పెంచుతుంది.

పంచదారకు ప్రత్యామ్నాయంగా స్టీవియా లేదా ఎరిథ్రిటాల్ వంటి స్వీటెనర్లను పరిశీలించవచ్చు. అయితే వీటిని కూడా వైద్యులు లేదా పోషకాహార నిపుణుల సలహాతోనే ఉపయోగించాలి. ఎంత మోతాదులో తీసుకోవాలనే విషయంలో జాగ్రత్త అవసరం.

పాయసంలో ప్రోటీన్ పెంచుకోవడం ఎలా?

పాయసాన్ని మరింత పోషకమైనదిగా చేసుకోవడానికి ప్రోటీన్ ఉండే పదార్థాలను జోడించవచ్చు. పాలు మరిగించేటప్పుడు కొద్దిగా పాలపొడి కలపడం, వైద్యులు సూచిస్తే వే ప్రోటీన్ ఉపయోగించడం లేదా కొద్దిగా తురిమిన పనీర్ జోడించడం వంటి మార్పులు చేసుకోవచ్చు.

అలాగే బాదం, వాల్‌నట్స్ వంటి నట్స్‌ను పరిమితంగా చేర్చుకోవచ్చు. కార్బోహైడ్రేట్లతో పాటు ప్రోటీన్, ఆరోగ్యకరమైన కొవ్వులు ఉండటం వల్ల ఆహారం మరింత సమతుల్యంగా ఉంటుంది. అయితే ప్రోటీన్ జోడించినంత మాత్రాన పాయసం వల్ల రక్తంలో చక్కెర పెరగదని అనుకోకూడదు. ఫైబర్ అధికంగా ఉండే సమతుల్య ఆహారం తీసుకోవడం కూడా ముఖ్యం.

ఎంత పరిమాణంలో పాయసం తినాలి?

మధుమేహం ఉన్నవారు పాయసం తినేటప్పుడు ముఖ్యంగా గుర్తుంచుకోవాల్సింది దాని పరిమాణం. పెద్ద గిన్నె నిండా పాయసం తినకుండా చిన్న గిన్నెలో కొద్దిగా మాత్రమే తీసుకోవాలి. పాయసం తిన్న సమయంలో అన్నం, రొట్టెలు లేదా ఇతర కార్బోహైడ్రేట్లు అధికంగా ఉండే పదార్థాలను ఎక్కువగా తీసుకోకుండా చూసుకోవాలి.

పాలు పడనివారు లాక్టోస్ రహిత పాలను ఉపయోగించవచ్చు. నట్స్ అలెర్జీ ఉన్నవారు వాటిని పాయసంలో కలపకూడదు. ముఖ్యంగా ఇప్పటికే రక్తంలో చక్కెర స్థాయిలు నియంత్రణలో లేనివారు మరింత జాగ్రత్తగా ఉండాలి.

రాత్రిపూట పాయసం తింటున్నారా? ఈ విషయం గుర్తుంచుకోండి!

రాత్రిపూట పాయసం తినేవారు నిద్రవేళను కూడా దృష్టిలో పెట్టుకోవాలి. పడుకోవడానికి రెండు నుంచి మూడు గంటల ముందే పాయసం తినడం మంచిది. పాయసంలో అధిక కొవ్వు పదార్థాలు కలపకుండా తేలికగా తయారుచేసుకోవాలి.

ఎసిడిటీ సమస్యలు ఉన్నవారు తిన్న వెంటనే పడుకోకూడదు. అలాగే రాత్రి ఆలస్యంగా కాఫీ, చాక్లెట్ వంటి పదార్థాలు తీసుకోవడాన్ని తగ్గించుకోవడం మంచిది.

గమనిక: మధుమేహం ఉన్న ప్రతి ఒక్కరికీ ఒకే రకమైన ఆహార నియమాలు వర్తించవు. రక్తంలో చక్కెర స్థాయిలు, వాడుతున్న మందులు, ఇతర ఆరోగ్య సమస్యలను బట్టి ఆహార నియమాలు మారుతాయి. పాయసం తీసుకునే పరిమాణం, స్వీటెనర్ల ఎంపిక విషయంలో వైద్యులు లేదా డైటీషియన్ సలహా తీసుకోవాలి. బెల్లం, తేనె వంటి సహజ తీపి పదార్థాలు కూడా రక్తంలో చక్కెరను పెంచుతాయి.