ఉదయాన్నే వాకింగ్ చేయాలా? సాయంత్రం, రాత్రి నడిస్తే ఫలితం ఉండదా..?

ఆరోగ్యకరమైన జీవనశైలి కోసం నడక ఒక ముఖ్యమైన భాగం. అయితే ఉదయాన్నే నడవాలని ఎందుకు సిఫార్సు చేస్తారు? సాయంత్రం లేదా రాత్రి నడవడం వల్ల ప్రయోజనం ఉండదా? ఈ ప్రశ్నలకు సమాధానాలు మన జీవ గడియారం, హార్మోన్ల కార్యకలాపాలతో ముడిపడి ఉన్నాయి. మన రోజులో ఏ సమయంలో బయట నడిచినా సూర్యకాంతి మనపై పడుతుంది కాబట్టి ప్రయోజనకరమే. అయినప్పటికీ, ఉదయాన్నే బయటకు వెళ్లడం వల్ల రోజు ప్రారంభమైందని మన శరీరానికి, మెదడుకు సంకేతాలు అందుతాయని బీబీసీ జస్ట్ వన్ థింగ్ పాడ్‌కాస్ట్ వ్యాఖ్యాత మైకేల్ మోస్లే వివరించారు. ఉదయం పూట లభించే ప్రకాశవంతమైన కాంతి మన శరీరంలో మెలటోనిన్ అనే హార్మోన్ ఉత్పత్తిని వెంటనే తగ్గిస్తుంది. మెలటోనిన్ మనకు అలసటను కలిగిస్తుంది. దీని తగ్గింపు వల్ల మనం మేల్కొని, ప్రత్యేకమైన ఉల్లాసాన్ని అనుభూతి చెందుతాం. మన శరీరం సహజ కాంతికి సానుకూలంగా ప్రభావితమయ్యేలా రూపొందించబడింది. ఉదయం మనం కళ్లు తెరిచిన వెంటనే, మన కళ్ల వెనుక ఉన్న సెన్సార్లు మెదడులోని హైపోథాలమస్‌కు చెందిన ఒక చిన్న ప్రాంతానికి సంకేతాలను పంపిస్తాయి. ఈ ప్రాంతమే మన జీవ గడియారాన్ని (సర్కాడియన్ రిథమ్) నియంత్రిస్తుంది. బయటి కాంతి మెలటోనిన్‌ను అణచివేయడమే కాకుండా, మన జీవ గడియారాన్ని కూడా వేగవంతం చేస్తుంది. దీనివల్ల రాత్రివేళ మీరు నిద్రపోవాలనుకున్నప్పుడు, మీ శరీరం అందుకు పూర్తిగా సిద్ధంగా ఉంటుంది. మన అంతర్గత జీవ గడియారం తిరిగి గాడిన పడటానికి రాత్రి సమయం చక్కగా సహాయపడుతుంది. ఒకవేళ రాత్రిళ్లు నిద్ర పట్టడం లేదంటే, ఉదయం వేళల్లో ప్రకాశవంతమైన కాంతిలో తగినంతసేపు ఉండకపోవడమే కారణం కావచ్చు.

రాత్రివేళల్లో నిద్ర విధానాలను మెరుగుపరుచుకోవాలంటే, సూర్యోదయం తర్వాత నడక ఒక అద్భుతమైన పరిష్కారం. ఉదయం ఎంత త్వరగా పగటి వెలుతురులోకి వస్తే, రాత్రిపూట మీ నిద్రపై అంత మెరుగైన ప్రభావం ఉంటుంది. నాణ్యమైన, సుఖమైన నిద్రను మీరు అనుభవిస్తారు. ఉదయపు కాంతి మీపై పడినప్పుడు, రాత్రివేళల్లో మీరు మేల్కునే సమయం తగ్గుతుంది, దీనివల్ల మీరు మరింత హాయిగా ఎక్కువసేపు నాణ్యమైన నిద్రను పొందుతారు. బయటి కాంతి శరీరాన్ని సెరటోనిన్ అనే రసాయనాన్ని విడుదల చేసేలా చేస్తుంది, ఇది సహజంగా మన మానసిక స్థితిని మెరుగుపరిచే బూస్టర్. సెరటోనిన్ వల్ల మనకు ఉల్లాసంగా అనిపిస్తుంది. నడక ప్రయోజనాలపై ఉత్తర ఐర్లాండ్‌లోని అల్స్టర్ యూనివర్సిటీలో ఎక్సర్‌సైజ్ అండ్ హెల్త్ ప్రొఫెసర్‌గా పనిచేస్తున్న మేరీ మర్ఫీ గత 20 ఏళ్లుగా పరిశోధనలు చేస్తున్నారు. ఆమె ప్రకారం, ఒక రోజులో నడిచిన అడుగుల సంఖ్య కన్నా కూడా వేగంగా నడవడమే ప్రధానమైనది. వేగంగా నడవడం వల్ల హృదయ సంబంధమైన వ్యాధుల బారిన పడే ప్రమాదం గణనీయంగా తగ్గుతుంది.  50,000 మందిపై ఆమె నిర్వహించిన అధ్యయనంలో, నడక వేగాన్ని పెంచడం వల్ల దాని ప్రయోజనాలు కూడా పెరుగుతాయని తేలింది. సాధారణంగా నడవడం క్యాన్సర్ మరణాల ముప్పును తగ్గిస్తే, వేగంగా నడవడం హృదయ సంబంధిత వ్యాధుల ముప్పును భారీ స్థాయిలో తగ్గించినట్లు ఆ అధ్యయనం వెల్లడించింది. వేగవంతమైన నడక గుండెకు అధిక రక్షణను ఇస్తుందని, వేగంగా నడిచే వారిలో గుండె జబ్బుల ప్రమాదం 10 నుంచి 20 శాతం తక్కువగా ఉందని ఆమె వివరించారు. ప్రస్తుత ఆరోగ్య మార్గదర్శకాల ప్రకారం, ప్రతి ఒక్కరూ రోజులో 30 నిమిషాలు శారీరక శ్రమ చేయాలి. కాబట్టి రోజుకు 30 నిమిషాలు వేగంగా నడిచేందుకు ప్రయత్నించండి. నడక ఇతర వ్యాయామాల కంటే భిన్నమైంది. దీన్ని అలసిపోకుండా రోజు మొత్తంలో ఎన్నిసార్లయినా చేయవచ్చు.