Womens Health: చిక్కుల్లో మహిళల ఊపిరి.. పురుషుల కంటే ఎక్కువ మరణాలు!
దేశంలో పురుషులకు మాత్రమే తక్షణ వైద్య సహాయం అందుతోంది. మహిళలకు వస్తున్న ఊపిరితిత్తుల వ్యాధులను పట్టించుకోవట్లేదు. ముఖ్యంగా దీర్ఘకాలిక ఊపిరితిత్తుల వ్యాధి (సీఓపీడీ) విషయంలో ఈ నిర్లక్ష్యం స్పష్టంగా కనపడుతుంది. 40 ఏళ్లు దాటిన మహిళల్లో ఈ వ్యాధి విస్తృతి గణనీయంగా పెరిగినట్లు తాజాగా ఓ సమీక్షా పరిశోధన వెల్లడించింది. గ్రామీణ ప్రాంతాల్లో నివసించే మహిళలకు ఈ ముప్పు మరింత అధికంగా ఉంది. సకాలంలో గుర్తించకపోవడం, సరైన చికిత్స అందకపోవడం వల్ల అనారోగ్య సమస్యలు తీవ్రమవుతున్నాయి.
భారతదేశంలో మహిళల్లో దీర్ఘకాలిక ఊపిరితిత్తుల వ్యాధి (సీఓపీడీ) తరచుగా పట్టించుకోని సమస్యగా మిగిలింది. పురుషులకు మాత్రమే తక్షణ వైద్య సహాయం అందుతోందని నిపుణులు చెబుతారు. పల్మనరీ మెడిసిన్, కమ్యూనిటీ మెడిసిన్ విభాగాలు నిర్వహించిన సమీక్షా పరిశోధన ఈ పరిస్థితిని స్పష్టం చేస్తోంది. 40 ఏళ్లు దాటిన మహిళల్లో సీఓపీడీ విస్తృతిలో గణనీయ తేడాలు కనపడ్డాయి.
ఈ అధ్యయనం మైసూర్ జిల్లాలో 2006-2010 మధ్య జరిగిన పరిశోధనలు, ఒడిశాలో 2013-14లో, తిరువళ్లూరు జిల్లా, తమిళనాడులో 2007లో జరిగిన సంబంధిత అధ్యయనాలను పరిశీలించింది. సుమారు 16.3 శాతం మహిళల్లో సీఓపీడీ ఉన్నట్లు తేలింది. గ్రామీణ ప్రాంతాల్లో ఈ వ్యాధి మరింత ప్రబలంగా ఉంది. అనేక పరిశోధనలను విశ్లేషించగా, ప్రపంచవ్యాప్తంగా సీఓపీడీ విస్తృతిలో అసమానతలు స్పష్టంగా కనపడ్డాయి. గ్రామీణ ప్రాంతాల్లో నివసించే వృద్ధులకు ఈ వ్యాధి తీవ్రంగా సోకుతుంది.
ప్రధాన కారణాలు, నిర్లక్ష్యం
బయోమాస్ ఇంధనాలతో వంట చేసే మహిళలు, పొగతాగని వారు కూడా దీర్ఘకాలిక బ్రోన్కైటిస్, వాయుప్రసరణ సమస్యలు ఎదుర్కొనే ప్రమాదం ఎక్కువ. సెకండరీ పొగ, పొగాకు వాడకం, తక్కువ బాడీ మాస్ ఇండెక్స్ (బీఎంఐ), విద్య, అవగాహన లేకపోవడం సీఓపీడీకి ఇతర ప్రమాద కారకాలు.
సీఓపీడీని మహిళల్లో సాధారణ దగ్గుగా తేలికగా తీసుకుంటారు. శ్వాసకోశ వైఫల్యం వచ్చాక లేదా పరిస్థితి తీవ్రంగా మారిన తర్వాతే మహిళలు డాక్టర్ దగ్గరకు వెళ్తారు. దక్షిణ కన్నడలోని కటీల్ ప్రాంతంలో మహిళల్లో సీఓపీడీకి కారణాలపై సమగ్ర దర్యాప్తు జరుగుతోంది.
భారతదేశంలో సీఓపీడీకి ముందస్తు చర్యలు లేకపోవడం వ్యాధి నిర్ధారణలో ఆలస్యం కలిగిస్తుంది. పరిశోధనలో తేలిన అంశం ఏమిటంటే, పొగ తక్కువ తాగినా, పురుషుల కంటే మహిళల్లో మరణాల రేటు ఎక్కువ. వారికి లక్షణాలు తీవ్రంగా ఉంటాయి. మహిళల్లో వాయుమార్గ వ్యాధి తక్కువ, హార్మోన్ల ప్రభావం తక్కువగా ఉంటుంది. సీఓపీడీ వ్యక్తమయ్యే తీరులో లింగ భేదాలను ఇది సూచిస్తుంది.