బాలికను తల్లి చేసి.. విదేశాలకు చెక్కెసిన యువకుడు

ప్రేమిస్తున్నానన్నాడు. తియ్యగా మాయమాటలు చెప్పాడు. ఇంకే ఆ అభం శుభం తెలియని అమ్మాయి ఆ మాయగాడిని నమ్మింది. కాస్త చనువుగా ఉండటం ప్రారంభించింది. ఇదే అదునుగా ఆ యువకుడు ఆ బాలికను లోభరుచుకున్నాడు. మాయమాటలతో మభ్యపుచ్చుతూ.. ఆ బాలికను గర్భం చేసి.. విదేశాలకు చెక్కేశాడు. ఈ ఘటన కడప జిల్లాలో చోటుచేసుకుంది. ఆలస్యంగా వెలుగులోకి వచ్చిన ఈ ఘటన.. ఆ గ్రామంలో అందర్నీ షాక్‌కు గురిచేసింది. పోలీసుల వివరాల మేరకు.. పుల్లంపేట మండలంలోని ఓ గ్రామానికి చెందిన బాలికను.. అదే గ్రామానికి చెందిన ఓ యువకుడు ప్రేమ పేరుతో వంచించాడు. అయితే ఆ బాలిక గర్భం దాల్చినట్లు తేలడంతో.. అక్కడే ఉంటే ఇబ్బందులు వస్తాయనుకున్నాడో ఏమో.. వెంటనే విదేశాలకు పారిపోయాడు.

ఈ జరిగిన మోసాన్ని తెలుసుకొన్న బాధితురాలి తల్లిదండ్రులు పోలీసులకు ఫిర్యాదు చేశారు. నెలలు నిండిన ఆ బాలికను పుల్లంపేటకు చెందిన వైద్య సిబ్బంది ఆదరించి.. రాజంపేట ప్రభుత్వ ఆసుపత్రిలో చేర్చారు. వైద్యుల పర్యవేక్షణలో ఇటీవలే మగబిడ్డకు జన్మనిచ్చింది. అయితే ఆ బిడ్డను తీసుకెళ్లడానికి బాలిక కుటుంబీకులు ఒప్పుకోకపోవడంతో.. ఈ విషయంలో పోలీసులు కల్పించుకున్నారు. పోలీసులు ఆ బాలిక కుటుంబీకులకు పలుమార్లు కౌన్సెలింగ్‌ ఇచ్చారు. వారు ఎంతకూ వినకపోయేసరికి అధికారుల సమక్షంలో ఆ పసికందును ఐసీడీఎస్‌ అధికారులకు అప్పగించారు. బిడ్డ పర్యవేక్షణను వారు చూసుకొనే విధంగా ఏర్పాటు చేశారు. ఇక ఈ ఘటనపై కేసు నమోదు చేసుకున్న పోలీసులు.. విదేశాలకు పారిపోయిన ఆ యువకుడిని రప్పించేందుకు ప్రయత్నాలు చేస్తున్నారు.