TG Vishwa Prasad: ఆ 6 సినిమాలకు రూ.140 కోట్లు నష్టపోయానని బహిరంగంగా చెప్పిన నిర్మాత
ప్రముఖ నిర్మాత టి.జి. విశ్వ ప్రసాద్.. 2024లో ప్రొడ్యూస్ చేసిన ఆరు సినిమాలకు దాదాపు రూ140 కోట్ల నష్టాన్ని చవిచూసినట్లు వెల్లడించారు. ఓటీటీ మార్కెట్లో క్షీణత, నాన్-థియేట్రికల్ హక్కుల అమ్మకంలో వచ్చిన ఇబ్బందులు ఈ నష్టానికి ప్రధాన కారణాలని చెప్పారు. "ధమాకా" సినిమా మాత్రం లాభాలను తెచ్చిపెట్టిందని, మిగిలిన సినిమాలు నష్టాలను తెచ్చాయని వివరించారు.
ప్రముఖ నిర్మాత టి.జి. విశ్వ ప్రసాద్ ఇటీవల ఇచ్చిన ఒక ఇంటర్వ్యూలో తన నిర్మాణ సంస్థకు 2024లో రూ.140 కోట్లకు పైగా నష్టం వాటిల్లిందని వెల్లడించారు. ఇది ఆయన కెరీర్లో అతిపెద్ద నష్టంగా నిలిచిందని, ఆరు సినిమాల నిర్మాణంలో ఈ నష్టం వాటిల్లిందని వివరించారు. ఈ నష్టానికి ప్రధాన కారణం ఓటీటీ మార్కెట్ లో కనిపించిన మార్పులేనని ఆయన అభిప్రాయపడ్డారు. 2021-2023 మధ్యకాలంలో నాన్-థియేట్రికల్ హక్కులకు మంచి డిమాండ్ ఉండేది. అయితే, 2024కి వచ్చేసరికి ఓటీటీ ప్లాట్ఫామ్ల నుంచి డిమాండ్ తగ్గడంతో సినిమాల నాన్-థియేట్రికల్ హక్కులను అమ్మడంలో ఎదురైన ఇబ్బందులే నష్టానికి కారణమని విశ్వ ప్రసాద్ వివరించారు. “ఈగల్”, “వడక్కుపట్టి రామసామి”, “మనమే”, “మిస్టర్ బచ్చన్”, “స్వాగ్”, “విశ్వం” వంటి సినిమాలు ఈ నష్టానికి కారణమైన చిత్రాలలో ఉన్నాయని ఆయన పేర్కొన్నారు. ఈ సినిమాలన్నీ థియేట్రికల్ విడుదల పరంగా మంచి విజయాన్ని సాధించినప్పటికీ, ఓటీటీ హక్కుల అమ్మకం తగ్గడంతో లాభాలు సాధించలేకపోయాయని వివరించారు.
“ధమాకా” సినిమా మాత్రం 2024లో లాభదాయకంగా నిలిచిందని, అయితే ఇతర చిత్రాల నష్టాల నుంచి పూర్తిగా రికవరీ అవ్వలేదని విశ్వ ప్రసాద్ తెలిపారు. ఓటీటీ ప్లాట్ఫామ్లతో సినిమాల విడుదల తేదీలను ఖరారు చేయడంలో వచ్చిన సమస్యలను కూడా ఆయన ప్రస్తావించారు. ఓటీటీ సంస్థల క్యాలెండర్ ప్రకారం సినిమాలను విడుదల చేయాల్సి రావడం వల్ల నష్టాలు పెరిగాయని అభిప్రాయపడ్డారు. భవిష్యత్తులో ఓటీటీ మార్కెట్ పరిస్థితులను బట్టి సినిమాల నిర్మాణం, విడుదలలను ప్లాన్ చేయాలని నిర్మాతలు అర్థం చేసుకోవాలని సూచించారు.
మరిన్ని ఎంటర్టైన్మెంట్ వార్తల కోసం ఇక్కడ క్లిక్ చేయండి