Yeshanagula : . ఈ పాటలో ఇంత అర్ధం ఉందా.. ఏశనాగుల కట్ట మీద సాంగ్ లిరిక్స్‏కు అర్థం ఇదే..

డైరెక్టర్ శ్రీకాంత్ ఓదెల దర్శకత్వంలో తెరకెక్కుతున్న ‘ది ప్యారడైజ్’ చిత్రం నుంచి విడుదలైన ‘ఏషనాగుల’ అనే పాట అటు యూట్యూబ్, సోషల్ మీడియాలో దుమ్మురేపుతుంది. ఈ జానపద శైలి పాటకు ప్రముఖ రచయిత కాసర్ల శ్యామ్ గీత రచన చేశారు. ఇటీవలే యూట్యూబ్‌లో రిలీజ్ అయిన ఈ పాట మిలియన్ వ్యూస్ తో దూసుకుపోతుంది. తెలంగాణ ఫోక్ పాటకు.. అదే స్థాయిలో తెలంగాణ భాషలో అద్భుతమైన లిరిక్స్ అందించారు కాసర్ల శ్యామ్. దీంతో ఈ పాటకు అర్థాన్ని గూగుల్లో డీకోడ్ చేస్తున్నారు నెటిజన్స్. ఈ క్రమంలో ఓ ఇంటర్వ్యూలో ఆయన ఈ పాట వెనుక ఉన్న కథ, లిరిక్స్ అంతరార్థాన్ని వివరించారు. “ఏశనాగుల” అనేది తెలంగాణ పల్లెల్లో తరతరాలుగా వస్తున్న ఒక కోలాటం పాట. గాయకుడు జంగిరెడ్డి ద్వారా ప్రజాదరణ పొందిన ఈ జానపద బాణీని దర్శకుడు శ్రీకాంత్ ఓదెల సినిమాలో ఒక ప్రత్యేక సన్నివేశం కోసం ఎంచుకున్నారు. ప్రొడక్షన్ పరంగా జంగిరెడ్డి గారి నుంచి సరైన అనుమతులు, హక్కులు పొందిన తర్వాతే ఈ పాటను చిత్రంలో చేర్చడం జరిగిందని చెప్పుకొచ్చారు.

ఈ పాటలో ఎలాంటి గ్లామరస్ ఫోజులు లేకుండా 80-90ల కాలంటి తెలంగాణ స్వచ్ఛమైన విరహాన్ని, రూటెడ్ రొమాంటిక్ ప్రేమని ఈ పాటలో ఆవిష్కరించినట్లు శ్యామ్ తెలిపారు. కాసర్ల శ్యామ్ ఈ పాటలో ఉపయోగించిన ప్రత్యేక తెలంగాణ పల్లె పదాలకు పూర్తి వివరణ ఇచ్చారు.

* జిమ్మేదారి పటేలో.. గల్మకాడ నీకోసం ముగ్గునైతిరో: ‘జిమ్మేదారి’ అంటే బాధ్యత తీసుకున్నవాడు. ‘గల్మ’ అంటే గడప/వాకిలి. “నా బాధ్యత తీసుకున్న ఓ నా ప్రియుడా! నీ రాక కోసం వేకువజామునే వాకిట్లో ముగ్గులా ఎదురుచూస్తున్నాను” అని నాయిక తన ఆరాటాన్ని వ్యక్తం చేస్తుంది.

* నీ తవ్వల నా చూపులు కావలున్నాయో: ‘తవ్వ’ అంటే దారి. నాయిక తన చూపులను ప్రియుడు వచ్చే దారిలో కాపలాగా (కావలి) పెట్టిందట.

*అర్రల గుడ్డి దీపమయిందిర పానం: ‘అర్ర’ అంటే గది. చీకటి గదిలో ఆరిపోవడానికి సిద్ధంగా ఉన్న మినుకు మినుకుమనే గుడ్డి దీపంలా తన ప్రాణం ఉక్కిరిబిక్కిరి అవుతోందని నాయిక భావిస్తోంది.

* బుడపరకల కూర వండిన నీకోసం బుడిమట్ల బువ్వతోని: పల్లెటూర్లలో ఎంతో ఇష్టంగా తినే చిన్న చేపల (బుడపరకలు) కూరను, సువాసన ఇచ్చే బుడమ వడ్ల బువ్వతో సిద్ధం చేసి, ప్రేమగా వచ్చి తినిపోమని ప్రియుడిని ఆహ్వానిస్తోంది.

* నీ సెమటలు దుడుసుకున్న నా వాయిల్ సీరా సింగులే సిక్కుల బడెరా: ప్రియుడు అలసిపోయినప్పుడు తన వాయిల్ చీర కొంగుతో చెమట తుడిచిన ఆ సాన్నిహిత్యాన్ని గుర్తుచేసుకుంటూ, ఆ ఆలోచనల్లో చీర కుచ్చిళ్లు కూడా సరిగా కట్టుకోలేకపోతున్నానని వివరిస్తుంది.

* జబ్బల రైక ఉక్కులే ఉట్టుట్టిగా తెగిపోయినాయిరా: ప్రియుడి కౌగిలింత, స్పర్శ గుర్తొచ్చినప్పుడు నాయిక ఒళ్ళు పులకరించిపోతుందనే భావాన్ని ఎలాంటి అసభ్యత లేకుండా కవితాత్మకంగా చెప్పారు.

* నీ వాసన మోసిన నా వళ్ళు.. ఎన్నడో మరిసిపాయే ఎచ్చటి నీళ్ళు: ప్రియుడి పరిమళం, చెమట వాసన తన శరీరానికి అంటుకుందని, ఆ మధురమైన జ్ఞాపకాన్ని పోగొట్టుకోవడం ఇష్టం లేక వెచ్చని నీళ్లతో (ఎచ్చటి నీళ్ళు) స్నానం చేయడం కూడా మానేశానని అంటోంది.

* ఇరుకు ఇల్లు ఏరుకుంటాందిరని ఎంగిలి పూలు: ఈ చిన్న ఇరుకు ఇల్లు అంతటా నీ జ్ఞాపకాలు, నీ ఆనవాళ్లు (ఎంగిలి పూలు) నిండి ఉన్నాయని, ప్రతి మూలా నీ స్పర్శను గుర్తుచేస్తుందని నాయిక విరహంతో పాడుకుంటుంది.

ఈ విధంగా తెలంగాణ సంస్కృతి, గ్రామీణ పదబంధాలు , స్వచ్ఛమైన ప్రేమని మేళవించి కాసర్ల శ్యామ్ ఈ పాటను అద్భుతంగా తీర్చిదిద్దారు.

ఎక్కువమంది చదివినవి : Nagarjuna : ఆయన తినే రైస్ మనం తినలేము.. నాగార్జున డైట్ రివీల్ చేసిన మేకప్ ఆర్టిస్టు..

ఎక్కువమంది చదివినవి : Tollywood: కొత్తింట్లోకి అడుగుపెట్టిన టాలీవుడ్ హీరోయిన్.. ఫ్యామిలీతో కలిసి గృహ ప్రవేశం.. ఫోటోస్ వైరల్..