ప్రారంభమైన కార్తీ, జ్యోతిక సినిమా.. ప్రీలుక్ రిలీజ్

రియల్ లైఫ్‌ వదినా మరిది కార్తీ, జ్యోతిక ముఖ్య పాత్రలలో కోలీవుడ్‌లో ఓ సినిమా తెరకెక్కనున్న విషయం తెలిసిందే. మలయాళ దర్శకుడు జీతూ జోసెఫ్(దృశ్యం ఫేమ్) ఈ సినిమాకు దర్శకత్వం వహిస్తున్నాడు. కోలీవుడు నటుడు సత్యరాజ్ మరో కీలక పాత్రలో కనిపించనున్నాడు. ఇన్ని రోజులు ప్రీ ప్రొడక్షన్ పనులను జరుపుకున్న ఈ చిత్రం ఇవాళ్టి నుంచి సెట్స్ మీదకు వెళ్లనుంది. ఈ విషయాన్ని కార్తీ సోషల్ మీడియాలో వెల్లడించాడు.

‘‘వదినతో మొదటిసారిగా స్క్రీన్‌ను షేర్ చేసుకోవడం చాలా థ్రిల్లింగ్‌గా ఉంది. జీతూ జోసెఫ్ సర్ మీతో పనిచేస్తున్నందుకు చాలా సంతోషంగా ఉంది. సత్యరాజ్ సర్ మీరు ఈ సినిమాలో ఉండటం మాకు మరింత బలాన్ని ఇస్తుంది. మీ అందరి ఆశీస్సులతో ఇవాళ్టి నుంచి షూటింగ్ ప్రారంభం అవుతోంది’’ అంటూ కార్తి ట్వీట్ చేశాడు. ఈ సందర్భంగా మూవీకి సంబంధించిన ప్రీ లుక్‌ను కూడా విడుదల చేశాడు.

దీనికి కార్తీ సోదరుడు, నటుడు సూర్య స్పందిస్తూ.. ‘‘ఇది చాలా స్పెషల్ ప్రాజెక్ట్. నిన్ను, జ్యోను(సూర్య, జ్యోతికను పిలుచుకునే పేరు) స్క్రీన్ మీద చూసేందుకు చాలా ఎగ్జైట్ అవుతున్నా. అద్భుత టీమ్‌కు గుడ్‌లక్’’ అంటూ కామెంట్ పెట్టాడు.

కాగా ప్రీలుక్‌లో దట్టమైన అటవి, లోయ, మేఘాల మధ్య కార్తి లుక్ అస్పష్టంగా కనిపిస్తోంది. ఇక థ్రిల్లర్ కథాంశంతో తెరకెక్కబోతున్న ఈ చిత్రాన్ని వైకామ్18 స్టూడియోస్, పారలల్ మైండ్స్ ప్రొడక్షన్ సంయుక్తంగా నిర్మిస్తోంది. 96ఫేమ్ గోవింద్ వసంత సంగీతం అందిస్తోన్న ఈ చిత్రం అక్టోబర్‌లో ప్రేక్షకుల ముందుకు రానుంది.