Bavagaru Bagunnara Movie: బావగారు బాగున్నారా టైటిల్ పెట్టింది నేనే.. సినిమా కోసం 96 టైటిల్స్ బుక్ రాశాం.. డైరెక్టర్..

మెగాస్టార్ చిరంజీవి, రంభ ప్రధాన పాత్రల్లో నటించి, ఘన విజయం సాధించిన సినిమా బావగారు బాగున్నారా?. ఈ మూవీ టైటిల్ రూపకల్పన వెనుక అసిస్టెంట్ డైరెక్టర్‌గా పనిచేసిన వి.ఎన్.ఆదిత్య కీలక పాత్ర పోషించారు. ఈ టైటిల్ ఎలా ఖరారైంది, చిరంజీవి, జయంత్ సి. పరాన్జీ, నాగబాబు వంటి ప్రముఖుల నుంచి ఆయనకు లభించిన గుర్తింపు, ఆదిత్య దర్శకుడిగా ఎదగడానికి ఇది ఎలా దోహదపడిందో ఆయన స్వయంగా వెల్లడించారు. బావగారు బాగున్నారా? సినిమాకు తొలుత 96 టైటిళ్లను పరిశీలించారని వి.ఎన్.ఆదిత్య తెలిపారు. ఏదీ యూనిట్‌కు సంతృప్తినివ్వలేదని, జయంత్ గారి మునుపటి చిత్రం ప్రేమించుకుందాం రా విజయం నేపథ్యంలో, టైటిల్ చివర రా ఉండాలనే ఆలోచన ప్రబలిందని ఆయన వివరించారు. ఒకరోజు చిరంజీవి గారు స్వయంగా ఆఫీస్‌కు వచ్చి టైటిళ్ల ఫైల్‌ను తెమ్మని ఆదేశించారని, ఆ సమయంలో జయంత్ గారు, నాగబాబు గారు, పరుచూరి వెంకటేశ్వర రావు గారు కూడా ఉన్నారని ఆదిత్య గుర్తు చేసుకున్నారు.

రూమ్‌లోకి వెళ్లేముందు ఆదిత్యకు ఆకస్మికంగా బావగారు బాగున్నారా? అనే టైటిల్ తట్టింది. దాన్ని ఫైల్‌లో చేర్చి, లోపలికి పంపించగానే చిరంజీవి గారు ఆశ్చర్యంతో చూశారు. అప్పుడు ఆదిత్య, “మన కథలో ఇంటర్వెల్‌కు ముందు రంభకు చిరంజీవి గారే తన అక్క మొగుడు అని తెలుస్తుంది. ఆ షాక్‌లో రంభ బావగారు బాగున్నారా? అని అడిగితే చిరంజీవి గారి ఫేస్‌పై ఇంటర్వెల్ పడుతుంది” అని వివరించారు. ఈ ఆలోచన చిరంజీవి గారిని ఎంతగానో ఆకట్టుకుందని, ఆయన తల అడ్డంగా ఊపి, టేబుల్‌పై కొట్టి, “ఇదే టైటిల్, బయట మీడియా ఎదురుచూస్తోంది, వెళ్లి ప్రకటించేద్దాం” అని ఉత్సాహంగా చెప్పారని ఆదిత్య వివరించారు. అప్పుడే, “మా అసోసియేట్ ఈ టైటిల్ ఇచ్చాడు” అని చిరంజీవి గారు మీడియాకు ప్రకటించారని తెలిపారు.

దర్శకుడు జయంత్ సి. పరాన్జీ ఎల్లప్పుడూ తన టీమ్ సభ్యులకు, అసిస్టెంట్ డైరెక్టర్లకు వారి కృషికి తగిన గుర్తింపు ఇస్తారని వి.ఎన్.ఆదిత్య అన్నారు. “ఒక సీన్ మీరు కంట్రిబ్యూట్ చేస్తే, అది షూట్ చేస్తున్నప్పుడు హీరోకు ఈ సీన్ ఈయనే చెప్పారు అని చెప్పేయడం జయంత్ గారి నైజం” అని ఆదిత్య గుర్తు చేసుకున్నారు. ఈ సంస్కృతిని ఆయన దగ్గరే నేర్చుకున్నానని, ప్రతి డైరెక్టర్ కూడా ఈ పద్ధతిని పాటించాలని ఆదిత్య అభిప్రాయపడ్డారు. జయంత్ గారు నాగార్జున, వెంకటేష్, చిరంజీవి వంటి హీరోలకు కూడా తమ అసిస్టెంట్ డైరెక్టర్ల పేర్లను ఓపెన్‌గా చెప్పేవారని పేర్కొన్నారు. ఆదిత్య బావగారు బాగున్నారా? చిత్రంలో అసిస్టెంట్ డైరెక్టర్‌గా ఉన్నప్పటికీ, అప్పటికే ఆయనలో దర్శకుడి మూడ్ ఉందని, స్క్రిప్ట్ చర్చల సమయంలో తన విజన్‌లో ఉన్న సీన్లను పంచుకునేవాడినని తెలిపారు. “నేను నా కంట్రిబ్యూషన్‌ను నమ్ముతాను. నేను చెప్పిన సీన్ హిట్ అవ్వడమే నాకు ముఖ్యం. నేను చేసే సినిమాను హిట్ చేయడానికి ప్రయత్నించాలి, అదే నిన్ను డైరెక్టర్‌ను చేస్తుంది, నువ్వు రాసుకునే స్క్రిప్ట్ కాదు” అనే తన సిద్ధాంతాన్ని ఆదిత్య వివరించారు. ఆయన చేసిన కృషిని నాగబాబు గారు, చిరంజీవి గారు గుర్తించి, పరుచూరి బ్రదర్స్, జయంత్ గారికి సూచించారని ఆదిత్య తెలిపారు.

“ఇతను రేపో మాపో డైరెక్టర్ అవ్వాల్సినవాడు, ఇతనికి స్క్రీన్ ప్లేలో కూడా టైటిల్ ఇద్దాం. టైటిల్ కూడా ఇతనే చెప్పాడు, సీన్ లో కూడా కంట్రిబ్యూషన్ ఉంది” అని వారు పేర్కొన్నారు. సాయి బాలాజీ అనే వ్యక్తి నాగబాబు గారితో చేసిన వర్క్‌ను కూడా గుర్తించి, ఆయనకు కూడా క్రెడిట్ ఇచ్చారని తెలిపారు. ఫలితంగా, ఆదిత్య పేరు అసోసియేట్ డైరెక్టర్ , స్క్రీన్‌ప్లే రైటర్‌గా రెండు చోట్ల పడింది. సినిమా 100 రోజుల వేడుకలో, “ఆదిత్యకు అసోసియేట్ డైరెక్టర్ షీల్డ్ ఇవ్వాలా, స్క్రీన్‌ప్లే రైటర్ షీల్డ్ ఇవ్వాలా?” అనే ప్రశ్న వచ్చినప్పుడు, చిరంజీవి గారు, “స్క్రీన్‌ప్లే రైటర్‌ కింద పిలవండి, డైరెక్టర్ అవ్వాల్సినవాడు అవుతాడు” అని చెప్పి, జయంత్ గారు, పరుచూరి వెంకటేశ్వర రావు గారి పక్కనే, ప్రధాన సాంకేతిక నిపుణులకు ఇచ్చే పెద్ద షీల్డ్ ఇచ్చి, శాలువా కప్పి సత్కరించారని వి.ఎన్.ఆదిత్య గర్వంగా పంచుకున్నారు.

ఎక్కువమంది చదివినవి : Aamani: నాకు లైఫ్ ఇచ్చింది ఆయనే.. ఆ హీరోతోనే ఎక్కువ సినిమాలు చేశా.. హీరోయిన్ ఆమని..