రాజమౌళి దారిలో సుజీత్…?

ఒకే ఒక్క సినిమాతో ఇండియe వైడ్‌గా పాపులర్ అయ్యాడు సుజీత్. సాహో సినిమాతో ఈయన దేశవ్యాప్తంగా పాపులర్ అయ్యాడు. ఈ సినిమా ఎలా ఉందనే సంగతి పక్కన బెడితే 30 ఏళ్లు కూడా నిండకుండానే 350 కోట్ల సినిమాను హ్యాండిల్ చేసాడు సుజీత్. ఇదే ఇప్పుడు మనోడి క్రేజ్ పెంచేసింది. ఇంత తక్కువ సమయంలో అలాంటి ఓ స్క్రిప్ట్ రాసుకుని.. అన్ని వందల కోట్లు పెట్టించడానికి నిర్మాతలను ఒప్పించడం అంటే చిన్న విషయం కాదు.

సాహో టాక్‌తో పనిలేకుండా వారం రోజుల పాటు కుమ్మేసింది. ఇప్పుడంటే కలెక్షన్లు తగ్గిపోయాయి కానీ ఇప్పటికే 420 కోట్లకు పైగా వసూలు చేసిందని దర్శక నిర్మాతలే చెప్పారు. నిర్మాతలకు లాభాలు తీసుకొచ్చిన ఈ చిత్రం.. బయ్యర్లకు మాత్రం భారీ నష్టాలు తీసుకొచ్చేలా కనిపిస్తుంది. కాగా… సాహో తర్వాత సుజీత్ ఏం సినిమా చేయబోతున్నాడు.. ఎలాంటి సినిమా చేయబోతున్నాడు.. ఎవరితో చేయబోతున్నాడు… ఎందుకంటే సాహో లాంటి భారీ సినిమా తర్వాత ఈ కుర్రాడి అడుగులు ఎక్కడ పడతాయనేది అంతా ఆసక్తిగా చూస్తున్న అంశం. దీనికి ఆయన కూడా ఆసక్తికరమైన సమాధానమే ఇచ్చాడు.

ఈయన చిన్న సినిమా చేయడానికి సన్నాహాలు చేసుకుంటున్నాడు. ఒకప్పుడు మగధీర లాంటి భారీ సినిమా తర్వాత చాలా తెలివిగా ఎలాగైతే రాజమౌళి మర్యాద రామన్న సినిమా చేసాడో.. సుజీత్ కూడా ఇప్పుడు ఇదే దారిలో వెళ్తున్నాడు. అయితే స్క్రిప్ట్ ప్రస్తుతానికి సిద్ధం కాలేదని.. త్వరలోనే అన్ని వివరాలు చెప్తానంటున్నాడు ఈయన. ప్రస్తుతానికి ఇంకా సాహో మత్తులోనే ఉన్నట్లు చెప్పాడు సుజీత్. ఈ కుర్రాడి తర్వాతి సినిమా ఎలా ఉండబోతుందో చూడాలి మరి.