TSBIE Annual Calendar 2024-25: నేటి నుంచి ఇంటర్ విద్యార్ధులకు వేసవి సెలవులు.. జూన్ 1 నుంచి తరగతులు ప్రారంభం

TSBIE Annual Calendar 2025

హైదరాబాద్‌, మార్చి 31: తెలంగాణ రాష్ట్ర వ్యాప్తంగా ఉన్న జూనియర్‌ కాలేజీలకు 2024-25 విద్యా సంవత్సరానికి సంబంధించిన వార్షిక అకడమిక్‌ క్యాలెండర్‌ను తెలంగాణ రాష్ట్ర ఇంటర్మీడియట్‌ విద్యా మండలి విడుదల చేసింది. రాష్ట్రంలోని అన్ని ప్రభుత్వ, ఎయిడెడ్‌, ప్రైవేట్‌ జూనియర్ కాలేజీలలో ఈ క్యాలెండర్‌ అమలు అవుతుందని బోర్డు స్పష్టం చేసింది. వచ్చే విద్యా సంవత్సరంలో మొత్తం 227 పని దినాలు ఉండగా.. 75 రోజులు సెలవులు వచ్చాయి. జూన్‌ 1 నుంచి ఇంటర్‌ ప్రథమ, ద్వితీయ సంవత్సర విద్యార్ధులకు తరగతులు ప్రారంభమవుతాయని ఇంటర్మీడియట్‌ విద్యా మండలి కార్యదర్శి వెల్లడించారు. ఇప్పటికే పరీక్షలు పూర్తైన విద్యార్ధులకు (2023-24) మార్చి 31 నుంచి మే 31 వరకు వేసవి సెలవులు ఇచ్చిన సంగతి తెలిసిందే.

ఇంటర్‌ వార్షిక అకడమిక్‌ క్యాలెండర్‌ 2024-25 ప్రకారం..

• అక్టోబర్‌ 6 నుంచి 13వ తేదీ వరకు దసరా సెలవులు ఉంటాయి. అక్టోబర్‌ 14న తిరిగి తరగతులు ప్రారంభం అవుతాయి
• నవంబర్‌ 18 నుంచి 23వ తేదీవరకు హాఫ్‌ ఇయర్స్‌ ఎగ్జామ్స్‌ ఉంటాయి
• 2025 జనవరి 11 నుంచి 16వ తేదీ వరకు సంక్రాంతి సెలవులు ఉంటాయి. జనవరి 17 నుంచి తరగతులు ప్రారంభం
• జనవరి 20 నుంచి 25వ తేదీ వరకు ప్రీ ఫైనల్‌ పరీక్షలు
• ఫిబ్రవరి మొదటివారంలో ప్రాక్టికల్స్‌ పరీక్షలు, మార్చి మొదటి వారం థియరీ పరీక్షలు జరుగుతాయి
• మే 2025 చివరి వారంలో ఇంటర్మీడియట్ అడ్వాన్స్‌డ్ సప్లిమెంటరీ పరీక్షలు జరుగుతాయి
• 2024-25 విద్యా సంవత్సరానికి చివరి పనిదినం మార్చి 29
• మార్చి 30 నుంచి జూన్‌ 1, 2025 వరకు వేసవి సెలవులు
• 2025-26 విద్యాసంవత్సరానికి జూన్ 2 నుంచి కాలేజీలు తిరిగి ప్రారంభం అవుతాయి

ఇంటర్‌ బోర్డు ప్రకటించిన అన్ని సెలవులతోపాటు అన్ని ఆదివారాలు, రాష్ట్ర ప్రభుత్వ సెలవులను పరిగణనలోకి తీసుకోవాలని తెలంగాణ ఇంటర్‌ బోర్డు కార్యదర్శి శ్రుతి ఓజా తెలిపారు. బోర్డు ప్రకటించిన అడ్మిషన్ షెడ్యూల్‌కు అనుగుణంగా మాత్రమే అడ్మిషన్లు జరగాలని ఆమె తెలిపారు.

మరిన్ని విద్యా, ఉద్యోగ కథనాల కోసం క్లిక్‌ చేయండి.