Agentic AI Systems: ఏజెంటిక్ ఏఐతో కొత్త యుగం.. ట్రిపుల్ ఐటీ హైదరాబాద్‌లో 12 వారాల స్పెషల్ కోర్సు స్టార్ట్! వెంటనే అప్లై చేయండి

ఇండియన్ ఇన్‌స్టిట్యూట్ ఆఫ్ ఇన్ఫర్మేషన్ టెక్నాలజీ హైదరాబాద్ (IIIT Hyderabad) ఫ్లెక్సిబుల్ లెర్నింగ్ విభాగం ఏజెంటిక్ ఏఐ సిస్టమ్స్ ఇంజనీరింగ్‌పై 12 వారాల ఆన్‌లైన్ సర్టిఫికేట్ ప్రోగ్రామ్‌ను ప్రారంభించింది. “ఇంజనీరింగ్ ఏజెంటిక్ ఏఐ సిస్టమ్స్: కాన్సెప్ట్స్ నుంచి ప్రాక్టీస్ వరకు” అనే శీర్షికతో రూపొందించిన ఈ కోర్సు, నిజ జీవిత అనువర్తనాలకు అనుగుణంగా ఏఐ సిస్టమ్‌ల రూపకల్పన, అమలు, పరీక్షలపై ప్రాక్టికల్ దృష్టి సారిస్తుంది. ఈ ప్రోగ్రామ్‌కు IIIT హైదరాబాద్‌లో అసిస్టెంట్ ప్రొఫెసర్‌గా, AI, సాఫ్ట్‌వేర్ ఇంజనీరింగ్ రంగాల్లో పరిశోధకుడిగా ఉన్న ప్రొఫెసర్ కార్తీక్ వైద్యనాథన్ నాయకత్వం వహిస్తున్నారు. కోర్సును ఫ్లెక్సిబుల్ లెర్నింగ్ విభాగం అధ్యాపకులు ఆన్‌లైన్ ద్వారా బోధిస్తారు.

పాఠ్య ప్రణాళికను నాలుగు ప్రధాన మాడ్యూల్స్‌గా రూపొందించారు. వీటిలో ఏజెంటిక్ ఏఐ పునాదులు, సిస్టమ్ డిజైన్, అమలు, ఆపరేషన్స్ వంటి అంశాలు ఉంటాయి. ముఖ్యంగా వాస్తవ ప్రపంచ సమస్యల పరిష్కారం, వర్క్‌ఫ్లో ఆటోమేషన్, స్కేలబుల్ సిస్టమ్ నిర్మాణంపై ప్రత్యేకంగా దృష్టి పెట్టారు.

IIIT హైదరాబాద్ డైరెక్టర్ ప్రొఫెసర్ సందీప్ శుక్లా మాట్లాడుతూ.. క్యాంపస్‌కి రాలేని విద్యార్థులు, ప్రొఫెషనల్స్‌కి కూడా నాణ్యమైన AI విద్యను అందించాలనే లక్ష్యంతో ఈ ప్రోగ్రామ్ రూపొందించబడిందని తెలిపారు. అలాగే ఏజెంటిక్ ఏఐ ద్వారా ట్రాన్స్‌ఫార్మర్ ఆధారిత మోడళ్లను సంక్లిష్ట వర్క్‌ఫ్లోలుగా సమన్వయం చేయవచ్చని పేర్కొన్నారు.

ప్రొఫెసర్ కార్తీక్ వైద్యనాథన్ ప్రకారం, ఏజెంటిక్ ఏఐ కేవలం మోడళ్లపై మాత్రమే కాకుండా ఇంజనీరింగ్ దృక్పథంపై కూడా ఆధారపడుతుందని, విశ్వసనీయమైన, స్కేలబుల్ సిస్టమ్‌ల నిర్మాణం ఈ కోర్సు ప్రధాన లక్ష్యమని తెలిపారు.

• దరఖాస్తులు ఏప్రిల్ 29, 2026 నుంచి జూన్ 15, 2026 వరకు అందుబాటులో ఉంటాయి.
• ఓరియంటేషన్ జూన్ 27న, తరగతులు జూన్ 29న ప్రారంభమవుతాయి.

ప్రోగ్రామ్ 12 వారాల పాటు పూర్తిగా ఆన్‌లైన్‌లో కొనసాగుతుంది. పాల్గొనేవారికి ప్రాథమిక ప్రోగ్రామింగ్ (ఇటరేషన్స్, ఫంక్షన్ కాల్స్ వంటి అంశాలు), ప్రాథమిక గణితంపై అవగాహన ఉండటం అవసరం. ఈ కార్యక్రమం, పరిశ్రమ అవసరాలకు అనుగుణంగా AI సిస్టమ్ ఇంజనీరింగ్‌లో ప్రాక్టికల్ అనుభవాన్ని అందించడమే లక్ష్యంగా రూపొందించబడింది.