శాలరీ అకౌంట్లో మినిమమ్ బ్యాలెన్స్ అవసరం లేదా? ఈ విషయం తప్పక తెలుసుకోండి
శాలరీ అకౌంట్లో జీతం క్రమం తప్పకుండా జమ అవుతున్నంత వరకు సాధారణంగా మినిమమ్ బ్యాలెన్స్ నిబంధనలు వర్తించవు. అయితే ఉద్యోగం మారిన తర్వాత జీతం క్రెడిట్ కావడం ఆగిపోతే, బ్యాంకు నిబంధనల ప్రకారం ఆ ఖాతాను సాధారణ సేవింగ్స్ అకౌంట్గా మార్చే అవకాశం ఉంటుంది.
చాలా మంది ఉద్యోగులు శాలరీ అకౌంట్లో మినిమమ్ బ్యాలెన్స్ మెయింటైన్ చేయాల్సిన అవసరం ఉండదని భావిస్తుంటారు. సాధారణంగా ఇది నిజమే. జీతం క్రమం తప్పకుండా జమ అవుతున్నంత వరకు చాలా బ్యాంకులు శాలరీ అకౌంట్లపై మినిమమ్ బ్యాలెన్స్ నిబంధనలను అమలు చేయవు. అయితే ఉద్యోగం మారిన తర్వాత లేదా శాలరీ అకౌంట్లో జీతం జమ కావడం ఆగిపోయిన తర్వాత పరిస్థితి మారుతుంది. కొత్త కంపెనీ జీతాన్ని మరో బ్యాంకు ఖాతాలో జమ చేస్తే, పాత శాలరీ అకౌంట్లో జీతం క్రెడిట్ కావడం నిలిచిపోతుంది.
ఇలా కొంతకాలం పాటు (ఈ కాలపరిమితి ఆయా బ్యాంకుల నిబంధనలను బట్టి మారుతుంది) జీతం జమ కాకపోతే, సంబంధిత బ్యాంకు ఆ శాలరీ అకౌంట్ను సాధారణ సేవింగ్స్ అకౌంట్గా మారుస్తుంది. అన్ని బ్యాంకుల్లో ఈ గడువు ఒకేలా ఉండదు. కొన్ని బ్యాంకులు రెండు లేదా మూడు నెలల్లోనే మార్పు చేస్తే, మరికొన్ని బ్యాంకులు ఆరు నెలల వరకు వేచి చూస్తాయి. శాలరీ అకౌంట్ సేవింగ్స్ అకౌంట్గా మారిన తర్వాత, ఆ బ్యాంకు నిర్దేశించిన కనీస సగటు నిల్వ (Minimum Average Balance – MAB/AMB) నిబంధనలు వర్తిస్తాయి. నిర్ణయించిన కనీస నిల్వను నిర్వహించకపోతే, బ్యాంకు ఛార్జీలు విధించే అవకాశం ఉంటుంది.
అయితే శాలరీ అకౌంట్ సేవింగ్స్ అకౌంట్గా మారడాన్ని, ఖాతా నిద్రాణ అకౌంట్గా మారడాన్ని ఒకటిగా భావించకూడదు. సాధారణంగా రెండు సంవత్సరాల పాటు ఖాతాదారు నుంచి ఎలాంటి లావాదేవీలు జరగకపోతేనే బ్యాంకులు ఆ ఖాతాను డార్మెంట్ అకౌంట్గా పరిగణిస్తాయి. అందుకే ఉద్యోగం మారిన తర్వాత పాత శాలరీ అకౌంట్ను అలాగే వదిలేయకుండా, అది ఇంకా శాలరీ అకౌంట్గానే కొనసాగుతోందా లేదా సేవింగ్స్ అకౌంట్గా మారిందా అనే విషయాన్ని సంబంధిత బ్యాంకుతో ఒకసారి నిర్ధారించుకోవడం మంచిది. అవసరం లేకపోతే ఖాతాను మూసివేయడం లేదా అందులో కనీస నిల్వను నిర్వహించడం ద్వారా అనవసర ఛార్జీలను నివారించవచ్చు.