Bullet Train: బుల్లెట్ ట్రైన్ ప్రయాణంలో భూకంపం వస్తే ఏం జరుగుతుంది? సరికొత్త టెక్నాలజీ!
Mumbai-Ahmedabad Bullet Train: ముంబై-అహ్మదాబాద్ బుల్లెట్ రైలు మార్గానికి సమీపంలో 5.5 కంటే ఎక్కువ తీవ్రతతో భూకంపాలు నమోదైన ప్రాంతాలలో ఆరు అంతర్గత భూకంపమాపకాలను ఏర్పాటు చేస్తున్నారు. ప్రాంతాలను ఎంపిక చేయడానికి ముందు జపనీస్ నిపుణులు ఈ ప్రాంతాలలో సర్వే నిర్వహించారు. సూక్ష్మ..
Mumbai-Ahmedabad Bullet Train: భారతదేశంలో అత్యంత ప్రతిష్టాత్మకంగా నిర్మిస్తున్న ముంబై – అహ్మదాబాద్ బుల్లెట్ ట్రైన్ (MAHSR) ప్రాజెక్ట్ పనులు వేగంగా శరవేగంగా జరుగుతున్నాయి. గంటకు గరిష్టంగా 350 కిలోమీటర్ల వేగంతో ప్రయాణించే ఈ హైస్పీడ్ రైలులో ప్రయాణికుల భద్రత అత్యంత కీలకమైన అంశం. అయితే, ప్రయాణంలో ఉన్నప్పుడు అకస్మాత్తుగా భూకంపం వస్తే ప్రమాదం జరగకుండా ఎలాంటి జాగ్రత్తలు తీసుకుంటున్నారు? దీనికోసం ఎలాంటి టెక్నాలజీని వాడుతున్నారో ఇప్పుడు తెలుసుకుందాం.
ఇది కూడా చదవండి: DMart: డీమార్ట్లో ఈ వస్తువులు కొంటే డబ్బు ఆదా.. MRP కంటే తక్కువ ధరకు లభించే బెస్ట్ ఐటమ్స్ ఇవే!
28 సీస్మోమీటర్లతో ‘అర్లీ వార్నింగ్ సిస్టమ్’:
నేషనల్ హై స్పీడ్ రైల్ కార్పొరేషన్ లిమిటెడ్ (NHSRCL) సమాచారం ప్రకారం, బుల్లెట్ ట్రైన్ కారిడార్ పొడవునా, భూకంప ముప్పు ఉన్న ప్రాంతాల్లో మొత్తం 28 సీస్మోమీటర్లను ఏర్పాటు చేస్తున్నారు. జపాన్ ప్రసిద్ధ ‘షింకాన్సేన్’ బుల్లెట్ రైలు సాంకేతికత ఆధారంగా ఈ భూకంప గుర్తింపు వ్యవస్థను రూపొందిస్తున్నారు.
భూకంపం వస్తే సిస్టమ్ ఎలా పనిచేస్తుంది?
- విద్యుత్ సరఫరా నిలిపివేత: సీస్మోమీటర్లు భూకంప ప్రకంపనలను గుర్తించిన వెంటనే ఆ ప్రాంతంలోని సబ్స్టేషన్లకు సంకేతాలు పంపి ఆటోమేటిక్గా విద్యుత్ సరఫరాను (Power Supply) నిలిపివేస్తాయి.
- ఎమర్జెన్సీ బ్రేక్లు: రైలు విద్యుత్ సరఫరా నిలిచిపోయినట్లు గుర్తించిన మరుక్షణమే ఆటోమేటిక్ ఎమర్జెన్సీ బ్రేక్లు (Emergency Brakes) యాక్టివేట్ అవుతాయి.
- సురక్షితంగా రైలు నిలిపివేత: తీవ్రమైన భూకంప తరంగాలు రైల్వే ట్రాక్, మౌలిక సదుపాయాలను తాకడానికి ముందే, వేగంగా వెళ్తున్న బుల్లెట్ రైలు సురక్షితంగా ఆగిపోతుంది.
ఈ 28 సీస్మోమీటర్లు ఎక్కడ ఏర్పాటు చేస్తున్నారు?
ట్రాక్ పొడవునా (22 సీస్మోమీటర్లు):
- మహారాష్ట్ర (8): ముంబై, థానే, విరార్, బోయిసర్ పరిసర ప్రాంతాల్లో.
- గుజరాత్ (14): వాపీ, బిలిమోరా, సూరత్, భరూచ్, వడోదర, ఆనంద్, మహమదాబాద్, అహ్మదాబాద్ ప్రాంతాల్లో.
ఇన్లాండ్ / భూకంప ముప్పున్న ప్రాంతాల్లో (6 సీస్మోమీటర్లు):
గడిచిన 100 సంవత్సరాలలో 5.5 కంటే ఎక్కువ తీవ్రతతో భూకంపాలు నమోదైన ప్రాంతాల్లో వీటిని ఏర్పాటు చేస్తున్నారు. మహారాష్ట్రలో ఖేడా, రత్నగిరి, లాతూర్, పంగ్రీ, గుజరాత్లో అడేసర్, ఓల్డ్ భుజ్. జపాన్ నిపుణుల బృందం స్వయంగా పరిశీలించి, నేల స్వభావాన్ని పరీక్షించిన తర్వాతే ఈ ఆరు ప్రాంతాలను ఎంపిక చేశారు. భూకంప ప్రకంపనలను ముందుగానే గుర్తించి ప్రధాన కంట్రోల్ రూమ్ను అప్రమత్తం చేయడంలో ఇవి కీలక పాత్ర పోషిస్తాయి.
తొలి రైలు ఎప్పుడు రాబోతోంది?
మొత్తం 508 కిలోమీటర్ల పొడవున్న ఈ కారిడార్లో గుజరాత్లోని సూరత్ – వాపీ మధ్య 97 కిలోమీటర్ల తొలి విడత మార్గాన్ని ప్రారంభించేందుకు రైల్వే శాఖ శరవేగంగా పనులు పూర్తి చేస్తోంది. భారత తొలి బుల్లెట్ ట్రైన్ (B28 ట్రైన్సెట్) సేవలు 2027 ఆగస్టు 15 నాటికి అందుబాటులోకి తీసుకురావాలని లక్ష్యంగా పెట్టుకున్నారు.
రైలు మార్గానికి దూరంగా అదనపు భూకంపమాపకాలను ఎందుకు ఏర్పాటు చేస్తున్నారు?
గత 100 సంవత్సరాలలో ముంబై-అహ్మదాబాద్ బుల్లెట్ రైలు మార్గానికి సమీపంలో 5.5 కంటే ఎక్కువ తీవ్రతతో భూకంపాలు నమోదైన ప్రాంతాలలో ఆరు అంతర్గత భూకంపమాపకాలను ఏర్పాటు చేస్తున్నారు. ప్రాంతాలను ఎంపిక చేయడానికి ముందు జపనీస్ నిపుణులు ఈ ప్రాంతాలలో సర్వే నిర్వహించారు. సూక్ష్మ ప్రకంపనల పరీక్షల ద్వారా నేల అనుకూలతను కూడా అంచనా వేశారు. అదనపు సెన్సార్లు భూకంపాలు సంభవించే ప్రాంతాలలో భూకంప కార్యకలాపాలను గుర్తించడానికి వ్యవస్థకు సహాయపడతాయి. అలాగే హై-స్పీడ్ రైలు కారిడార్ భద్రతా వ్యవస్థకు మద్దతు ఇస్తాయి.
ఇది కూడా చదవండి: UPI Payments: పెట్రోల్ పంపుల్లో రూ.2,000 కంటే ఎక్కువ UPI పేమెంట్లు బంద్? యజమానుల సంచలన నిర్ణయం!
ఇది కూడా చదవండి: Portable AC: అద్దె ఇంట్లో ఉంటున్నారా? గోడతో పనిలేకుండా చల్లటి గాలినిచ్చే పోర్టబుల్ ఏసీలు!
మరిన్ని బిజినెస్ వార్తల కోసం ఇక్కడ క్లిక్ చేయండి