Jio Phone Next: జియోకు కొత్త చిక్కులు.. జియో నెక్ట్స్‌ ఫోన్‌ ధర పెరగనుందా..?
Jio Phone Next: టెలికాం రంగంలో రిలయన్స్‌ జియో సంచలనం సృష్టి్స్తోన్న విషయం తెలిసిందే. అయితే ప్రపంచంలోనే అతి చౌకైన స్మార్ట్‌ఫోన్‌ను విడుదల..
Jio Phone Next: టెలికాం రంగంలో రిలయన్స్‌ జియో సంచలనం సృష్టి్స్తోన్న విషయం తెలిసిందే. అయితే ప్రపంచంలోనే అతి చౌకైన స్మార్ట్‌ఫోన్‌ను విడుదల చేయనుంది. ఈ ఫోన్‌ వినాయక చవితి రోజు విడుదల కావాల్సి ఉండగా, పలు కారణాలతో దీపావళికి వాయిదా వేసింది రిలయన్స్‌. ఫోన్‌ ధర ఎంతనో క్లారిటీ లేకపోయినా ఐదువేల రూపాయలలోపే ఉండే అవకాశం ఉందని ఇప్పటికే టెక్‌ నిపుణులు వెల్లడించారు. ఇక తాజా మరో విషయం బయటకు వచ్చింది. ఈ ఫోన్‌ ధర మరింతగా పెరిగే అవకాశాలున్నట్లు సమాచారం. కారణం ఏంటంటే సెమీ కండక్టర్ల కొరతేనని తెలుస్తోంది. ఈ కారణంగా రిలయన్స్‌ జియోకు కొత్త చిక్కులు తెచ్చిపెట్టే అవకాశం ఉంది. ప్రపంచంలో అత్యంత చవకైన ‘జియో నెక్ట్స్‌’ ఫోన్‌ ధర మరింత పెరుగుతుందనే ప్రచారం జోరుగా సాగుతోంది. అంచనా ప్రకారం..ఈ ఫోన్‌ ధర రూ.5వేలు ఉండగా.. ఫోన్‌లో తప్పనిసరిగా ఉండాల్సిన సెమీకండక్టర్ ధర పెరగడంతో..ఆ ప్రభావం జియో నెక్ట్స్‌ ధరపై పడనున్నట్లు తెలుస్తోంది.
గూగుల్‌-జియో ఆధ్వర్యంలో వినాయక చవితికి విడుదల కావాల్సిన జియో ఫోన్‌..దీపావళికి వాయిదా వేసిన విషయం తెలిసిందే. ఫోన్‌ విడుదల వాయిదా వేయడంతో ధర మరింత పెరగనున్నట్లు మార్కెట్‌ నిపుణులు అభిప్రాయం వ్యక్తం చేస్తున్నారు. ఈటి టెలికామ్‌ రిపోర్ట్‌ ప్రకారం..ఫోన్‌లో వినియోగించే సెమీ కండక్టర్లతో సహా వివిధ భాగాలు ( కాంపోనెంట్స్‌) ధర సుమారు 20శాతం పెరిగింది. ఇక పెరిగిన ధరతో సెమీకండక్టర్ల లభ్యత లోటు 8 నుండి 20 వారాల వరకు కొనసాగే అవకాశాలు కనిపిస్తున్నాయి. ఇదే సమయంలో పెరిగిన చిప్‌ ధరలతో జియో ఫోన్‌ పై ప్రస్తుతం ప్రచారం జరుగుతున్న ధరకే వచ్చే అవకాశం లేదని మార్కెట్‌ విశ్లేషకులు చెబుతున్నారు. అయితే ఈ ఫోన్‌పై ఇంత ప్రచారం జరుగుతున్నా.. పూర్తి స్థాయిలో ఫోన్‌ అందుబాటులోకి తెస్తుందా? లేదంటే పరిమిత సంఖ్యలోనే విడుదల చేస్తుందా అన్న ప్రచారంపై జియో స్పందించాల్సి ఉంది.