UPI Auto Pay: యూపీఐ ఆటో పే గురించి తెలుసా? ఈ ఫీచర్తో ఆ సమస్యలకు చెక్
యూనిఫైడ్ పేమెంట్స్ ఇంటర్ఫేస్ చెల్లింపులు అంటే యూపీఐ చెల్లింపులు భారతదేశంలో డిజిటల్ లావాదేవీల చరిత్రనే పూర్తిగా మార్చివేశాయి. ముఖ్యంగా యూపీఐ ఆటో పే ద్వారా కొన్ని తప్పనిసరి చెల్లింపులను ఎలాంటి ఇబ్బంది లేకుండా సమయానికి చేస్తున్నారు. అయితే ఆ ఆటోపేను ఎలా రద్దు చేయాలి? అనే విషయం చాలా మందికి తెలియదు. ఈ నేపథ్యంలో యూపీఐ ఆటో పేను ఎలా రద్దు చేయాలో? తెలుసుకుందాం.
నేషనల్ పేమెంట్స్ కార్పొరేషన్ ఆఫ్ ఇండియా ప్రారంభించిన యూపీఐ ఆటోపే వినియోగదారులు ఓటీటీ సబ్స్క్రిప్షన్లు, లోన్ ఈఎంఐలు, బీమా ప్రీమియంలు, మ్యూచువల్ ఫండ్ ఎస్ఐపీలు, యుటిలిటీ బిల్లులు వంటి పునరావృత చెల్లింపులను ఆటోమేట్ చేయడానికి అనుమతిస్తుంది. యూపీఐ ఆటోపే అనేది వినియోగదారులు ఫోన్పే, గూగుల్ పే, పేటీఎం లేదా బీమ్ వంటి యూపీఐ యాప్లను ఉపయోగించి ఈ-మాండేట్లను సెటప్ చేసుకోవడానికి వీలు కల్పించే ఒక ఫీచర్. ఈ సర్వీసును యాక్టివే చేస్తే మీ బ్యాంక్ ఖాతా నుండి షెడ్యూల్ చేసిన వ్యవధిలో రోజువారీ, వారానికో, నెలవారీ లేదా వ్యాపారి పేర్కొన్న విధంగా ఆటోమెటిక్గా సొమ్ము కట్ అవుతుంది.
ఆటో పేతో చెల్లింపులు
యూపీఐ ఆటో పే ద్వారా నెట్ఫ్లిక్స్, హాట్స్టార్ వంటి స్ట్రీమింగ్ సేవలు, నెలవారీ విద్యుత్ లేదా మొబైల్ బిల్లులు, బీమా ప్రీమియంలు లేదా ఈఎంఐలు, మ్యూచువల్ ఫండ్ల కోసం ఎస్ఐపీలు, జిమ్ సభ్యత్వాలు లేదా ట్యూషన్ ఫీజులు వంటి వాటిని సులభంగా చేయవచ్చు.
యూపీఐ ఆటో పే రద్దు ఇలా
- మీరు యూపీఐ యాప్ ద్వారా ఎప్పుడైనా యూపీఐ ఆటోపే ఆదేశాన్ని రద్దు చేయవచ్చు.
- ముందుగా యాప్ను ఓపెన్ చేసి యూపీఐ సెట్టింగ్స్లోకి ఎంటర్ అవ్వాలి.
- యూపీఐ సెట్టింగ్ల కింద ‘ఆదేశాలు’ లేదా ‘ఆటోపే’ విభాగానికి వెళ్లాలి.
- యాక్టివ్ ఆదేశాలను వీక్షించి, మీరు రద్దు చేయాలనుకుంటున్న పేమెంట్ను ఎంచుకోవాలి.
- అక్కడ కనిపించే ‘రద్దు చేయి’ ఆప్షన్ను ఎంచుకోవాలి. వెంటనే ఈ పేమెంట్ నిలిచిపోతుంది.
యూపీఐ ఆటోపే లావాదేవీలను వెనక్కి తీసుకోవచ్చా?
యూపీఐ ఆటోపే లావాదేవీ అమలు చేసిన తర్వాత దానిని ప్రామాణిక యూపీఐ చెల్లింపుల వలె తిరిగి పొందలేము. చెల్లింపు పొరపాటున లేదా తప్పు వ్యాపారికి జరిగితే మీరు రీఫండ్ కోసం వ్యాపారిని నేరుగా సంప్రదించాలి లేదా మీ యూపీఐ యాప్ లేదా బ్యాంక్ ద్వారా ఫిర్యాదు చేయాలి. సమస్యలను నివారించడానికి మీ పేమెంట్లు క్రమం తప్పకుండా సమీక్షించుకోవడం మంచిది.
మరిన్ని బిజినెస్ వార్తల కోసం ఇక్కడ క్లిక్ చేయండి