కారు కొనాలనుకుంటున్నారా? ఇప్పుడే కొనేయండి! తర్వాత బాధపడినా ప్రయోజనం ఉండదు! ఎందుకంటే..?
కార్ల ధరలు త్వరలో పెరగనున్నాయి! ముడి పదార్థాల ఖర్చులు విపరీతంగా పెరగడంతో టాటా మోటార్స్, మారుతి సుజుకి, హ్యుందాయ్ వంటి కంపెనీలు వాహనాల ధరలను పెంచడానికి సిద్ధమవుతున్నాయి. రాగి, ఇతర లోహాల ధరలు పెరుగుదల దీనికి కారణం. మీరు కారు కొనాలని ప్లాన్ చేస్తుంటే, ఆలస్యం చేయకుండా ఇప్పుడే కొనడం మంచిది.
చాలా మందికి కారు కొనాలనే కల ఉంటుంది. అందుకోసం డబ్బు కూడా సేవ్ చేసుకుంటూ ఉంటారు. కొంత డబ్బు డౌన్పేమెంట్గా కట్టి, మిగతాది లోన్ తీసుకొని ప్రతి నెలా ఈఎంఐ కట్టుకోవాలని అనుకుంటారు. అయితే మీకు కూడా కొన్ని నెలల్లో ఇలా కారు కొనాలనే ఆలోచన ఉంటే.. కాస్త త్వరగా నిర్ణయం తీసుకోండి. లేదంటే తర్వాత బాధపడతారు. ఎందుకంటే ఇప్పుడున్న కారు ధర కంటే ఎక్కువ ధర పెట్టాల్సి రావొచ్చు. దేశంలోని ఆటోమొబైల్ పరిశ్రమ మరోసారి కార్ల ధరలను పెంచడానికి సిద్ధమవుతోంది. ముడి పదార్థాలు, విలువైన లోహాల ధరలు పెరగడం వల్ల ఆటోమేకర్లపై గణనీయమైన వ్యయ ఒత్తిడి ఏర్పడింది. తత్ఫలితంగా టాటా మోటార్స్ ప్యాసింజర్ వెహికల్స్ లిమిటెడ్ రాబోయే వారాల్లో వాహనాల ధరలను పెంచుతుందని సూచించింది. రాగి, ఇతర విలువైన లోహాల ధరలు చాలా కాలంగా ఎక్కువగానే ఉన్నాయని కంపెనీ పేర్కొంది. మారుతి సుజుకి కూడా దాని ధరలను సమీక్షిస్తోంది, హ్యుందాయ్ మోటార్ ఇండియా ఇప్పటికే కొన్ని మోడళ్లపై ధరలను పెంచింది, ఇది కస్టమర్ల ఆందోళనలను రేకెత్తిస్తోంది.
బిజినెస్ స్టాండర్డ్లోని ఒక నివేదిక ప్రకారం.. టాటా మోటార్స్ ప్యాసింజర్ వెహికల్స్ లిమిటెడ్ (TMPVL) మేనేజింగ్ డైరెక్టర్, CEO అయిన శైలేష్ చంద్ర, రాబోయే వారాల్లో కంపెనీ కార్ల ధరలను పెంచుతుందని చెప్పారు. పెరుగుతున్న ముడిసరుకు ఖర్చులు గత ఏడాది కాలంగా కంపెనీపై ఒత్తిడి పెంచుతున్నాయని ఆయన వివరించారు. శైలేష్ చంద్ర ప్రకారం రాగి, ఇతర విలువైన లోహాల ధరలు నిరంతరం పెరుగుతున్నాయి. ఇది కంపెనీ ఆదాయాలపై ప్రభావం చూపింది, పెరిగిన ఖర్చులు ఇప్పుడు కంపెనీ ఆదాయంలో 2 శాతాన్ని మించిపోయాయి.
దేశంలో అతిపెద్ద కార్ల తయారీ సంస్థ మారుతి సుజుకి ఇండియా కూడా ధరల పెంపును పరిశీలిస్తోంది. విలువైన లోహాల ధరలు బాగా పెరిగాయని కంపెనీ చెబుతోంది. అయితే ఖర్చులో ఎంత భాగాన్ని వినియోగదారులకు బదిలీ చేయాల్సి వస్తుందో అంచనా వేయడానికి ప్రయత్నిస్తోంది. హ్యుందాయ్ మోటార్ ఇండియా జనవరిలో తన కార్ల ధరలను, ముఖ్యంగా వెన్యూ మోడల్ ధరలను పెంచింది. మార్కెట్ చాలా అస్థిరంగా ఉన్నందున, ముడి పదార్థాల ధరలను పర్యవేక్షిస్తూనే ఉంటామని కంపెనీ చెబుతోంది. మొత్తంమీద భవిష్యత్తులో కారు కొనాలని ప్లాన్ చేస్తున్న వారు ఎక్కువ చెల్లించాల్సి రావచ్చు, ఎందుకంటే పెరుగుతున్న ఖర్చులు ఇప్పుడు కస్టమర్ల జేబులపై ప్రత్యక్ష ప్రభావాన్ని చూపుతాయి.
మరిన్ని బిజినెస్ వార్తల కోసం ఇక్కడ క్లిక్ చేయండి