ఆసియాలో టాప్‌ 10 రిచ్‌ ఫ్యామిలీస్‌ ఇవే! లిస్ట్‌లో అంబానీది ఏ స్థానమంటే?

Mukesh Ambani Wealth

ఆర్టిఫిషియల్ ఇంటెలిజెన్స్ (AI) చుట్టూ ప్రపంచం మొత్తం చర్చలు జరుగుతున్న వేళ, ఆసియాలోని అత్యంత సంపన్న కుటుంబాలు మాత్రం నిశ్శబ్దంగా తమ సంపదను మరింతగా పెంచుకుంటున్నాయి. బ్లూమ్‌బర్గ్‌ తాజా నివేదిక ప్రకారం.. 2026లో ఆసియాలోని టాప్ 10 ధనిక కుటుంబాల సంపద గణనీయంగా పెరిగింది. ఆసక్తికర విషయం ఏమిటంటే, వీరు నేరుగా AI కంపెనీల్లో కాకుండా, దానికి మద్దతిచ్చే రంగాల్లో పెట్టుబడులు పెట్టి లాభాలు పొందుతున్నారు. డేటా సెంటర్లు, ఇంధనం, లోహాలు, సెమీకండక్టర్లు వంటి రంగాల్లో పెరుగుతున్న డిమాండ్ ఈ వృద్ధికి ప్రధాన కారణంగా నిలిచింది. అలాగే హాంకాంగ్ రియల్ ఎస్టేట్ మార్కెట్ పుంజుకోవడం కూడా సంపద పెరుగుదలకు తోడ్పడింది. ఈ పరిణామాలు సాంప్రదాయ వ్యాపారాలు కూడా కొత్త సాంకేతిక పోకడలకు అనుగుణంగా ఎలా మారుతున్నాయో చూపిస్తున్నాయి.

ఈ జాబితాలో భారతదేశానికి చెందిన ముఖేష్‌ అంబానీ కుటుంబం సుమారు 89.7 బిలియన్ డాలర్ల సంపదతో అగ్రస్థానంలో నిలిచింది. వారి రిలయన్స్‌ ఇండస్ట్రీస్‌ ఇంధనం, టెలికాం, రిటైల్, ఆర్థిక సేవల రంగాల్లో విస్తరిస్తూ AI మౌలిక సదుపాయాల్లో భారీ పెట్టుబడులు పెట్టేందుకు ప్రణాళికలు సిద్ధం చేసింది. రెండవ స్థానంలో హాంకాంగ్‌కు చెందిన సన్ హంగ్ కై ప్రాపర్టీస్ వెనుక ఉన్న క్వోక్ కుటుంబం నిలిచింది. స్థిరాస్తి రంగం పుంజుకోవడం వీరి సంపదకు బలాన్నిచ్చింది. మూడవ స్థానంలో శాంసంగ్‌కు చెందిన లీ కుటుంబం ఉంది. సెమీకండక్టర్లు, స్మార్ట్‌ఫోన్‌లు, AI రంగాల్లో దాని ఆధిపత్యం కొనసాగుతోంది.

ఇక థాయ్‌లాండ్‌కు చెందిన చియరవనోంట్ కుటుంబం, చైనా హాంగ్‌కియావో గ్రూప్‌కు చెందిన జాంగ్ కుటుంబం, తైవాన్ త్సాయి కుటుంబం కూడా తమ తమ రంగాల్లో బలమైన వృద్ధిని నమోదు చేశాయి. అలాగే రెడ్‌ బుల్‌ విజయంతో యోవిధ్య కుటుంబం, ఇండోనేషియాకు చెందిన హార్టోనో కుటుంబం బ్యాంకింగ్ రంగంలో పెట్టుబడులతో తమ సంపదను పెంచుకున్నాయి. ఇండియాకు చెందిన మిస్త్రీ, జిందాల్ కుటుంబాలు కూడా టాప్ 10లో చోటు దక్కించుకున్నాయి. మౌలిక సదుపాయాలు, ఉక్కు, ఇంధనం వంటి రంగాల్లో వీరి వ్యాపారాలు విస్తరించి ఉన్నాయి.

మరిన్ని బిజినెస్ వార్తల కోసం ఇక్కడ క్లిక్ చేయండి