Swastik Secrets: స్వస్తిక్ గుర్తు వేస్తున్నప్పుడు 99 శాతం మంది చేసే తప్పు ఇదే! ఇలా వేస్తే దరిద్రం చుట్టుముడుతుందా?
సనాతన హిందూ ధర్మంలో 'స్వస్తిక్' మంగళకరమైన, శక్తివంతమైన దైవిక చిహ్నంగా భావిస్తారు. 'సు + అస్తి' అంటే సమస్త లోకానికి శుభం, శాంతి, సంపూర్ణ శ్రేయస్సు కలగాలని అర్థం. గృహప్రవేశాలు, నూతన వ్యాపార ఆరంభాలు, వివాహాది శుభకార్యాలు లేదా నిత్య పూజా కార్యక్రమాల్లో సింహద్వారం గడప పైన, పూజా మందిరాల్లో స్వస్తిక్ వేయడం తరతరాలుగా వస్తున్న పవిత్ర సంప్రదాయం. అయితే చాలామంది తెలియక రెండు గీతలను ప్లస్ గుర్తులా అడ్డంగా కత్తిరిస్తూ స్వస్తిక్ వేస్తుంటారు. దీనివల్ల మధ్యలో ఉండే విశ్వ కేంద్రమైన బ్రహ్మస్థానం దెబ్బతిని ప్రతికూల ఫలితాలు ఎదురయ్యే ప్రమాదం ఉందని వాస్తు పండితులు హెచ్చరిస్తున్నారు.
జ్యోతిష్య , వాస్తు నిపుణుల నివేదికల ప్రకారం, సనాతన సంప్రదాయంలో స్వస్తిక్ గుర్తు కేవలం ఒక రేఖాగణిత చిత్రం మాత్రమే కాదు. అందులోని ప్రతి రేఖ, ప్రతి బిందువు వెనుక విశ్వ శక్తి తరంగాలు, సృష్టి నియమాలు దాగి ఉన్నాయి. అటువంటి పవిత్ర చిహ్నాన్ని ఏ విధంగా గీస్తే పూర్తి శుభ ఫలితాలు లభిస్తాయో, ఏయే తప్పులను పూర్తిగా విడనాడాలో తెలుసుకోవడం తప్పనిసరి.
ప్లస్ గుర్తులా గీతలను క్రాస్ చేయకూడదు
స్వస్తిక్ వేసే సమయంలో చాలామంది ముందుగా ఒక నిలువు గీతను, దానిపై ఒక అడ్డ గీతను కట్ చేస్తూ ప్లస్ ఆకారంలో గీస్తుంటారు. ఇది శాస్త్రరీత్యా సరికాదు. స్వస్తిక మధ్య భాగాన్ని విశ్వానికి మూల కేంద్రమైన బ్రహ్మ స్థానంగా పరిగణిస్తారు. రెండు గీతలు ఒకదానిపై ఒకటి ఖండించుకున్నప్పుడు బ్రహ్మస్థానం తెగిపోయి, శక్తి ప్రవాహం ఆగిపోతుందని పండితులు చెబుతున్నారు. కాబట్టి మధ్య కేంద్రాన్ని నేరుగా తాకకుండా లేదా కట్ చేయకుండా కుడి వైపు నుండి ప్రారంభించి, రెండు సమాంతర వంపుల ద్వారా మధ్య స్థానాన్ని సురక్షితంగా ఉంచుతూ గీయాలి.
ఎల్లప్పుడూ సవ్యదిశలోనే గీయాలి
స్వస్తిక్ నాలుగు చివరలు తప్పనిసరిగా సవ్యదిశలోనే(కుడివైపునకు తిరిగే క్లాక్‌వైజ్ విధానం) ఉండాలి. ఇది సూర్య భగవానుని గమనాన్ని, విశ్వ సృష్టి చైతన్యాన్ని , ఇంట్లోకి ప్రవహించే సానుకూల శక్తిని సూచిస్తుంది. ఒకవేళ ఎడమవైపునకు (అపసవ్య దిశలో) గీస్తే దానిని సౌవాస్తిక అంటారు. ఇది క్షుద్ర, తాంత్రిక ప్రయోగాలకు సంబంధించినది కాబట్టి నిత్య గృహ పూజల్లో, గడపలపై ఎట్టి పరిస్థితుల్లోనూ ఉపయోగించకూడదు.
నాలుగు బిందువులు ఎందుకు తప్పనిసరి?
కేవలం గీతలను మాత్రమే గీసి వదిలేస్తే ఆ స్వస్తిక అసంపూర్ణమై శూన్యత్వాన్ని తెస్తుంది. స్వస్తిక్ ఏర్పరిచే నాలుగు ఖాళీ గదుల్లో తప్పనిసరిగా నాలుగు స్వచ్ఛమైన చుక్కలు (బిందువులు) పెట్టాలి. ఈ నాలుగు బిందువులు ధర్మం, అర్థం, కామం, మోక్షం అనే నాలుగు పురుషార్థాలను ప్రతిబింబిస్తాయి. అలాగే ఇవి చతుర్వేదాలు (ఋగ్వేదం, యజుర్వేదం, సామవేదం, అథర్వణవేదం), అంతఃకరణ చతుష్టయాన్ని (మనస్సు, బుద్ధి, చిత్తం, అహంకారం) సూచిస్తాయి.
పక్కన నిలువు గీతలు…
పరిపూర్ణమైన స్వస్తిక్ గుర్తుకు ఇరువైపులా రెండేసి చొప్పున మొత్తం నాలుగు నిలువు గీతలను సమాంతరంగా గీయాలి. ఈ గీతలు విఘ్నేశ్వరుని అర్ధాంగులైన రిద్ధి, సిద్ధిలతో పాటు కుమారులైన శుభ్, లాభ్‌లకు సంకేతాలుగా నిలుస్తాయి. ఈ రక్షణ గీతలు స్వస్తికలో ఉత్పన్నమయ్యే దైవిక శక్తిని నిలకడగా ఉంచి, ఇంట్లోకి సంపద, శాంతి మాత్రమే ప్రవేశించేలా ఒక శక్తి కవచంలా కాపాడతాయి.
స్వస్తిక్ వేయడానికి ఏ పదార్థాలను వాడాలి?
స్వస్తిక్ గుర్తును కృత్రిమ రంగులు, ఇంక్ పెన్నులు లేదా నల్లటి రంగులతో గీయకూడదు. ఆవు నెయ్యి లేదా స్వచ్ఛమైన గంగాజలంలో కలిపిన కుంకుమ, పసుపు, కస్తూరి, అష్టగంధం లేదా సిందూరంతో మాత్రమే గీయాలి. కుంకుమ తేజస్సును, పసుపు ప్రశాంతతను కలిగిస్తాయి. ఇంటి ప్రధాన సింహద్వారం పైభాగంలో, పూజా మందిరంలో, వ్యాపార స్థలాల క్యాష్ లాకర్లపై లేదా కొత్త వాహనాలపై ఈశాన్యం, తూర్పు లేదా ఉత్తర దిశలను చూసేలా శాస్త్రోక్తంగా స్వస్తిక్ వేసుకోవడం వల్ల సమస్త వాస్తు దోషాలు తొలగిపోయి అష్టైశ్వర్యాలు చేకూరుతాయి.
గమనిక: ఈ కథనంలో అందించబడిన ఆధ్యాత్మిక, వాస్తు సమాచారం కేవలం పురాణ గ్రంథాలు, జ్యోతిష్య నిపుణుల సలహాలు, సాధారణ అవగాహన ఆధారంగా సేకరించింది మాత్రమే.