Pithapuram: పిఠాపురంలో రెబల్స్ హవా.. 10 వార్డులు కైవసం.. ఛైర్మన్ పీఠం జనసేనదే..

Pithapuram Municipal Election Results

ఆంధ్రప్రదేశ్ ఉప ముఖ్యమంత్రి పవన్ కల్యాణ్ ప్రాతినిధ్యం వహిస్తున్న పిఠాపురం మున్సిపాలిటీ ఎన్నికల ఫలితాలు రాజకీయ వర్గాల్లో తీవ్ర ఆసక్తిని రేకెత్తించాయి. ఇక్కడ మున్సిపల్ ఛైర్మన్ పీఠాన్ని అధికార జనసేన పార్టీ కైవసం చేసుకున్నప్పటికీ, కౌన్సిలర్ వార్డుల్లో మాత్రం అనూహ్యంగా రెబల్ అభ్యర్థులు హవా చాటారు. ప్రధాన పార్టీల అధికారిక అభ్యర్థులకు గట్టి షాకిస్తూ ఏకంగా పది మంది స్వతంత్రులు విజయం సాధించడం నియోజకవర్గవ్యాప్తంగా చర్చనీయాంశంగా మారింది. పిఠాపురం మున్సిపల్ ఛైర్మన్ ఎన్నికలో జనసేన అభ్యర్థి దానం లాజర్ బాబు 8,944 ఓట్ల భారీ మెజార్టీతో జయకేతనం ఎగురవేశారు. మొత్తం 36 వార్డులున్న పిఠాపురం మున్సిపాలిటీలో ఎన్నికలకు ముందే 3 వార్డులు ఏకగ్రీవమయ్యాయి. ఫలితాలు వెలువడిన స్థానాల్లో కూటమి భాగస్వామ్య పక్షాలు మెజారిటీని సాధించాయి. ఇందులో జనసేన 16 వార్డులు, టీడీపీ 5, బీజేపీ 1 వార్డును గెలుచుకుని మున్సిపల్ పీఠాన్ని పదిలపరుచుకున్నాయి. ప్రధాన ప్రతిపక్షమైన వైకాపా కేవలం ఒక్క వార్డుతోనే సరిపెట్టుకోవాల్సి వచ్చింది.

వార్డుల్లో రెబల్స్ దెబ్బ.. 10 స్థానాల్లో స్వతంత్రుల జెండా

మున్సిపాలిటీ పీఠం కూటమి ఖాతాలోకి వెళ్లినప్పటికీ, వార్డుల కేటాయింపులో టికెట్లు దక్కక బరిలోకి దిగిన రెబల్ అభ్యర్థులకు ఓటర్ల ఆదరణ లభించింది. మొత్తం 10 వార్డుల్లో స్వతంత్రులు ఘన విజయం సాధించి అధికార, ప్రతిపక్ష పార్టీలకు షాక్ ఇచ్చారు. 17, 21, 31, 34 వార్డులలో జనసేన రెబల్ అభ్యర్థులు బరిలో నిలిచి తిరుగులేని విజయం సాధించారు. 8, 9, 33, 36 వార్డులలో టీడీపీ టికెట్ దక్కని నాయకులు స్వతంత్రులుగా పోటీ చేసి సత్తా చాటారు. 1, 18 వార్డులలో వైసీపీ రెబల్ అభ్యర్థులు గెలుపొంది కౌన్సిలర్లుగా ఎన్నికయ్యారు.

ఉమ్మడి తూర్పుగోదావరి జిల్లాలో మరే మున్సిపాలిటీలో లేని విధంగా, కేవలం పిఠాపురంలోనే ఇంత పెద్ద సంఖ్యలో స్వతంత్రులు నెగ్గడం స్థానికంగా సంచలనంగా మారింది. రాజకీయ చర్చలకు దారితీసింది. ఛైర్మన్‌గా పవన్ కల్యాణ్ బలపరిచిన దానం లాజర్ బాబుకు భారీ ఆధిక్యం కట్టబెట్టిన ప్రజలే, వార్డు స్థాయికి వచ్చేసరికి పార్టీలకతీతంగా స్థానిక రెబల్ నేతలకే పట్టం కట్టడం గమనార్హం.