విశాఖ జూ కు కొత్త జిరాఫీలు.. ఎక్కడనుంచి వచ్చాయో తెలుసా?
విశాఖలోని ఇందిరా గాంధీ జూలాజికల్ పార్క్కు కొత్త నేస్తాలు వచ్చాయి. రెండు జిరాఫీలను జూ అధికారులు శనివారం తెచ్చారు. జూ పార్క్లో ఇదివరకు ఉన్న రెండు జిరాఫీలు తీవ్ర అనారోగ్యంతో బాధపడి మరణించాయి. దీంతో విశాఖ జూ అధికారులు సెంట్రల్ జూ అథారిటీ, సహకారంతో జంతు మార్పిడి పద్ధతి ద్వారా ఈ కొత్త యువ జీరాఫీలను తెచ్చారు.
విశాఖలోని ఇందిరా గాంధీ జూలాజికల్ పార్క్కు కొత్త నేస్తాలు వచ్చాయి. రెండు జిరాఫీలను జూ అధికారులు శనివారం తెచ్చారు. జూ పార్క్లో ఇదివరకు ఉన్న రెండు జిరాఫీలు తీవ్ర అనారోగ్యంతో బాధపడి మరణించాయి. దీంతో విశాఖ జూ అధికారులు సెంట్రల్ జూ అథారిటీ, సహకారంతో జంతు మార్పిడి పద్ధతి ద్వారా ఈ కొత్త యువ జీరాఫీలను తెచ్చారు. కోల్కత్తాలో ఉన్న అలీపూర్ జూ పార్క్ నుంచి ఒక ఆడ, మగ జిరాఫీలను విశాఖ జూ కి తాజాగా తీసుకు వచ్చారు. ప్రస్తుతం వీటిని జూ క్వారంటైన్లో కొద్ది రోజులు ఉంచి తరువాత సందర్శకులు వీక్షించడానికి అణువుగా ఎన్ క్లోజర్ల్లో ప్రవేశపెడతామని జూ అధికారులు తెలిపారు.
జంతు మార్పిడి విధానం ద్వారా పలు వన్య ప్రాణులు..
ఇందిరా గాంధీ జంతు ప్రదర్శనశాల, విశాఖపట్నం జూలాజికల్ గార్డెన్, అలీపూర్, కోల్కత్తా మధ్య జంతు మార్పిడి విధానంలో కొన్ని జంతువులను తీసుకురావడం జరిగిందని జూ క్యూరేటర్ డా. నందనీ సలారియా తెలిపారు. ఈ ఉదయం అలీపూర్ జూ నుండి విశాఖ జూకి జంతువులను తీసుకువచ్చారు. ఈ జంతు మార్పిడిలో భాగంగా జిరాఫీలు (1:1), ఏషియన్ వాటర్ మానిటర్ లిజర్డ్స్ (2:2), స్కార్లెట్ మకావ్స్ (1:1) అలీపూర్ జూ నుండి వైజాగ్ జూకి తీసుకువచ్చారు.
అదే సమయంలో వైజాగ్ జూ నుంచి తెల్ల పులి (1F), తోడేలు (1:1), ఇండియన్ వైల్డ్ డాగ్స్ (3:2), రింగ్ టెయిల్డ్ లెమర్ (1:1), బ్లాక్ స్వాన్ (1:1), హాగ్ డీర్ (2:2), హైనా (1:1) లను అలీపూర్ జూ కు ఇచ్చినట్టు జూ క్యూరటర్ తెలిపారు. ఈ జంతు మార్పిడి ద్వారా సంరక్షణలో ఉన్న జంతువుల సంక్షేమం, అంతరించిపోతున్న జాతుల సంరక్షణకు దోహదం చేయడమే ముఖ్య లక్ష్యమని క్యూరేటర్ నందనీ టీవీ9 కి తెలిపారు.
ప్రత్యేక వాహనంలో 856 కిలోమీటర్లు..
విశాఖ జూ కు చెందిన వెటర్నరీ బృందం, వైజాగ్ జూ సిబ్బంది కోల్కత్తాలోని అలీపూర్ జూ నుండి జిరాఫీలను తీసుకురావడానికి ఏప్రిల్ 22వ తేదీ రాత్రి వైజాగ్ జూ నుండి రోడ్డు మార్గంలో బయలుదేరారు. అలీపూర్ నుండి వైజాగ్ జూకు జిరాఫీని సురక్షితంగా, సాఫీగా తీసుకుని వచ్చేందుకు గానూ ప్లాన్ చేయడానికి NH-16 ను సర్వే చేయడానికి ఒక బృందం రోడ్డు మార్గంలో వెళ్ళింది. అక్కడి నుంచి ఏప్రిల్ 25వ తేదీన డాక్టర్ నవీన్ కుమార్, డాక్టర్ ఫణీంద్ర, డాక్టర్ పురుషోత్తం నేతృత్వంలోని బృందం, ఇతర జూ సిబ్బంది బయలుదేరి సుమారు 856 కిలోమీటర్లు ప్రయాణించి ఈ ఉదయం విశాఖపట్నం జూకి చేరుకున్నారు. మార్గం అంతా వెటర్నరీ టీం, జంతు సంరక్షకులు, జూ. సిబ్బంది అత్యంత జాగ్రత్త వహించి, ఎప్పటికప్పుడు జంతువును తనిఖీ చేస్తూ వైజాగ్ జూకి సురక్షితంగా చేరుకున్నారు. ఈ జంతు మార్పిడి ద్వారా అలీపూర్ జంతు ప్రదర్శనశాల నుండి సుమారు 2 సంవత్సరాల వయస్సు గల ఒక మగ జిరాఫీ, 4 సంవత్సరాల వయస్సు గల ఒక ఆడ జిరాఫీను తీసుకునిరావడం జరిగింది.
విశాఖ జూ కు స్కార్లెట్ మకావ్ అనే కొత్త పక్షి జాతి
ఈ జంతు మార్పిడి ద్వారా ఇందిరాగాంధీ జూలాజికల్ పార్క్ యానిమల్ కలెక్షన్లో స్కార్లెట్ మకావ్ అనే ఒక కొత్త జాతి చేరింది. స్కార్లెట్ మకావ్ అతిపెద్ద రంగు రంగుల పక్షి జాతికి చెందినది. సందర్శకులకు ప్రత్యేక ఆకర్షణగా ఉంటుంది. అలాగే కొన్ని నెలలు క్రితం వరకు జూ లో ఉన్న జిరాఫీలు, వాటర్ మానిటర్ లిజర్డ్స్ కూడా ఈ జంతు మార్పిడిలో విశాఖ జూ కు వచ్చాయి. చాలా పెద్ద జంతువులైన జిరాఫీలను కోల్కత్తా నుంచి విశాఖపట్నంకు తీసుకురావడం చాలా సవాలుతో కూడుకున్న పని అని క్యూరేటర్ అన్నారు. ఆంధ్రప్రదేశ్ అటవీ శాఖ సీనియర్ అధికారులు అందించిన సూచనలు సహకారానికి పోలీసు శాఖ, NHAI, అలీపూర్ జూ అధికారుల సహాయ సహకారాలకు క్యూరేటర్ డా. నందనీ సలారియా టీవీ9 ద్వారా కృతజ్ఞతలు తెలిపారు.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..
