26 ఏళ్ల క్రితం నాటి హత్య కేసు.. నిందితుడిని పట్టించిన పెండ్లి పత్రిక.. మామూలు క్రైం స్టోరీ కాదు
భార్యపై అనుమానంతో కన్నబిడ్డ అని కూడా చూడకుండా ఆరు నెలల పసికందును గొంతు నులిమి కన్న తండ్రే అమానుషంగా చంపేశాడు. పసిబిడ్డ డెడ్ బాడీని ఓ చోట పాతి పెట్టి పరారయ్యాడు. కర్ణాటకలోని ఓ మారుమూల ప్రాంతానికి వెళ్లి.. పేరు మార్చుకుని... ఓ రైతు దగ్గర తోటలో పనికి చేరాడు. అక్కడే మరో మహిళను పెళ్లి చేసుకున్నాడు.
భార్యపై అనుమానంతో కన్నబిడ్డ అని కూడా చూడకుండా ఆరు నెలల పసికందును గొంతు నులిమి కన్న తండ్రే అమానుషంగా చంపేశాడు. పసిబిడ్డ డెడ్ బాడీని ఓ చోట పాతి పెట్టి పరారయ్యాడు. కర్ణాటకలోని ఓ మారుమూల ప్రాంతానికి వెళ్లి.. పేరు మార్చుకుని… ఓ రైతు దగ్గర తోటలో పనికి చేరాడు. అక్కడే మరో మహిళను పెళ్లి చేసుకున్నాడు. ఆ తర్వాత ఆమెకు.. ఇద్దరు కుమార్తెలు జన్మించారు. ఇలా 26 ఏళ్లు గడిచిపోయాయి. దీంతో ఈ ఘటనను అంతా మరిచిపోయారులే అనుకున్నాడు.. పోలీసులు కూడా ఇక పట్టించుకోరు.. తనకి ఇంకా ఏం కాదులే అనుకున్నాడు… ఇంకేముంది తన రెండో భార్య చిన్న కూతురు వివాహానికి తన చిన్ననాటి మిత్రుడిని ఆహ్వానించాడు. తన చిన్న కూతురు వివాహానికి రావాలంటూ పెండ్లి పత్రిక కూడా పంపించాడు. ఇంకేముంది అక్కడే దొరికిపోయాడు. ఆ పెళ్లి పత్రికను పట్టుకుని పోలీసులు కూపీ లాగారు. మాటు వేసి నిందితుడిని పట్టుకుని.. 26 ఏళ్ల క్రితం జరిగిన హత్య కేసు మిస్టరీని ఛేదించారు పోలీసులు…
శ్రీ సత్యసాయి జిల్లా మడకశిర నియోజకవర్గం గుడిబండ మండలం దిన్నేహట్టిలో 26 సంవత్సరాల క్రితం కుమారుడిని హత్య చేసి పరారైన తిప్పేస్వామి అలియాస్ కృష్ణ గౌడను పోలీసులు ఎట్టకేలకు పట్టుకున్నారు. తిప్పే స్వామి, కరియమ్మ భార్యాభర్తలు… వారికి ఇద్దరు కుమారులు. భార్య కరియమ్మపై అనుమానంతో తిప్పేస్వామి చిన్న కుమారుడు శివలింగయ్య (6నెలలు) తనకు పుట్టలేదని భావించి 1998 అక్టోబర్ రెండవ తేదీన దిన్నేహట్టి గ్రామ శివారు పొలాల్లో కుమారుడిని గొంతు నులిమి హత్య చేసి… అక్కడే గొయ్యి తీసి.. పాతిపెట్టి పారిపోయాడు. అప్పటి నుంచి పోలీసులు నిందితుడు తిప్పేస్వామి కోసం గాలిస్తూనే ఉన్నారు.
అయితే, కుమారుడిని చంపి పరారైన తిప్పేస్వామి కర్ణాటక రాష్ట్రంలోని హసన్ జిల్లా అర్దుర్ గ్రామానికి వెళ్లి అక్కడ ఓ రైతు దగ్గర తోటలో పనిచేసేందుకు పనికి కుదిరాడు. కృష్ణ గౌడగా పేరు మార్చుకుని అదే ప్రాంతానికి చెందిన తార అనే మహిళను పెళ్లి చేసుకున్నాడు. ఇద్దరు కుమార్తెలు జన్మించారు. ఏళ్లు గడిచిన స్వగ్రామం రాకుండా 26 సంవత్సరాలు తిప్పేస్వామి అలియాస్ కృష్ణ గౌడ అక్కడే ఉన్నాడు. కుమారుడు చనిపోవడంతో మొదటి భార్య కరియమ్మ ఊరు వదిలేసి బెంగళూరు వెళ్ళిపోయిందని… గ్రామస్తులంతా విషయం మర్చిపోయారని… పోలీసులు కూడా కేసు గురించి పట్టించుకోవడంలేదని తిప్పేస్వామి చిన్ననాటి స్నేహితుడు నాగరాజు చెప్పాడు. దీంతో నాలుగు నెలల క్రితం తన రెండవ భార్య కూతురు సౌమ్య పెళ్లికి రావాల్సిందిగా చిన్ననాటి స్నేహితుడు నాగరాజుకు పెండ్లి పత్రిక పంపించాడు.
ఏళ్ల తరబడి పేరుకుపోయిన పెండింగ్ కేసులపై దృష్టి పెట్టిన పోలీసులు… నాగరాజు.. తిప్పేస్వామి రెండో భార్య కూతురు పెళ్లికి వెళ్లి వచ్చిన విషయం తెలుసుకుని ఆరా తీశారు. దీంతో అసలు విషయం తెలుసుకున్న పోలీసులు తిప్పేస్వామి అలియాస్ కృష్ణ గౌడ కోసం స్కెచ్ వేశారు. తిప్పేస్వామి స్వగ్రామమైన దిన్నేహట్టిలో ఉన్న భూమి వివాదం పరిష్కరించుకోవాలని నాగరాజు, నిందితుడు తిప్పే స్వామికి చెప్పాడు. భూమికి సంబంధించిన వివాదం పరిష్కారం కోసం దిన్నేహట్టికి వచ్చిన తిప్పేస్వామిని పోలీసులు మాటు వేసి పట్టుకున్నారు. నేరం చేసి 26 ఏళ్లయినా.. ఎప్పటికీ తప్పించుకోలేరన్న విషయం తిప్పేస్వామి అరెస్టుతో తెలిసింది. అందుకే చట్టం దృష్టి నుంచి ఎవరూ తప్పించుకోలేరు అంటారు. 26 ఏళ్ల క్రితం జరిగిన హత్య కేసులో నిందితుడిని ఎంతో చాకచక్యంగా పట్టుకున్న పోలీసు సిబ్బందికి ఎస్పి రత్న అభినందనలు తెలుపుతూ… రివార్డు అందజేశారు.
వీడియో చూడండి..
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..