AP Municipal Election Results: ఏపీ మున్సిపల్ ఫలితాలకు కౌంట్డౌన్ స్టార్ట్.. ఉదయం 8 గంటల నుంచి ఓట్ల లెక్కింపు!
AP Municipal Election Results: ఏపీ స్థానిక ఎన్నికల్లో కీలక ఘట్టానికి సమయం ఆసన్నమైంది. పురపోరులో ఎవరు విజేతలనే విషయం మరికొన్ని గంటల్లో తేలిపోనుంది. రీపోలింగ్ తంతు కూడా ముగిసిపోవడంతో మంగళవారం ఫలితాలు విడుదల చేసేందుకు సన్నద్ధమైంది SEC. పోలింగ్ సెంటర్లతో పాటు..
AP Municipal Election Results: ఏపీ మున్సిపల్ ఎన్నికల ప్రక్రియలో.. కీలక దశకు కౌంట్డౌన్ స్టార్టయ్యింది. బ్యాలెట్‌లలో నిక్షిప్తమైన అభ్యర్థుల భవితవ్యం గంటల వ్యవధిలో తేలిపోనుంది. రీపోలింగ్ సెంటర్లతో పాటు రాష్ట్రవ్యాప్తంగా ఇటీవల జరిగిన పురపోరుకు సంబంధించిన ఫలితాలు మరికొన్ని గంటల్లో విడుదల కానున్నాయి. దీనికి సంబంధించి కౌంటింగ్ ప్రక్రియకోసం పకడ్బందీ ఏర్పాట్లు చేసింది రాష్ట్ర ఎన్నికల సంఘం. మరోవైపు కౌంటింగ్ సందర్భంగా అప్రమత్తంగా ఉండాలని.. అటు అధికార కూటమి, ఇటు విపక్షం.. తమ నేతలను, శ్రేణులను అలెర్ట్‌ చేశాయి.
92 పురపాలికల్లో పోలింగ్ జరగగా.. ఓట్ల లెక్కింపు కోసం రాష్ట్రవ్యాప్తంగా 138 కౌంటింగ్ కేంద్రాలను ఏర్పాటు చేశారు అధికారులు. ఆయా కౌంటింగ్ కేంద్రాల్లో 556 కౌంటింగ్ హాల్స్.. 6 వేల 831 కౌంటింగ్ టేబుల్స్‌ను సిద్ధం చేశారు. కౌంటింగ్ ప్రక్రియ పర్యవేక్షణకు 6 వేల 831 మంది సూపర్‌వైజర్లు ఉంటారు. కౌంటింగ్ కోసం 13వేల 662 మంది సిబ్బంది ఉంటారు. ఓట్ల లెక్కింపులో 27 వేల 324 మంది అసిస్టెంట్లు పాల్గొంటారు.
13 కార్పొరేషన్లలోని 922 డివిజన్లలో 118 ఏకగ్రీవం కాగా, మున్సిపాలిటీల్లోని 3,020 వార్డులకు గానూ 637 ఏకగ్రీవమయ్యాయి. మిగిలిన 2,382 వార్డులకు ఎన్నికలు జరిగాయి. ఈ మొత్తం స్థానాలకు 10వేల 262 మంది పోటీ చేశారు. వీరి భవితవ్యం రేపు తేలనుంది. రీ పోలింగ్ తర్వాత చూస్తే.. ఏపీలో పట్టణ స్థానిక సంస్థల ఎన్నికల్లో 62.16 శాతం పోలింగ్ నమోదైనట్టు SEC ప్రకటించింది. 96లక్షల 89వేల 61 మంది ఓటర్లకు గాను 60లక్షల 22వేల 411 మంది ఓటు హక్కు వినియోగించుకున్నారు. మొత్తం చూస్తే.. పెద్ద నగరాల కంటే చిన్న మున్సిపాలిటీల్లోనే అధికంగా పోలింగ్ జరిగినట్టు గణాంకాలు చెబుతున్నాయి.
రీపోలింగ్ ప్రకటించిన 13 కేంద్రాల్లోనూ ఆ ప్రక్రియ పూర్తయిపోవడంతో వాటిలో కూడా కౌంటింగ్ ఏర్పాట్లు చేసుకుంటున్నారు అధికారులు. ఇప్పటికే కౌంటింగ్ సెంటర్లలో దాదాపుగా ఏర్పాట్లన్నీ పూర్తయ్యాయి. ఉదయం 8 గంటలకు కౌంటింగ్ ప్రారంభం కానుండగా. ఈప్రక్రియ కోసం 556 హాళ్లు, 6,831 టేబుళ్లు ఏర్పాటు చేశారు. కౌంటింగ్‌లో మొత్తం 47వేల 817 మంది సిబ్బంది పాల్గొననున్నారు. మున్సిపాలిటీలు, నగర పంచాయతీల పరిధిల్లో కలిపి మొత్తం 2,805 కౌంటింగ్ టేబుళ్లు ఏర్పాటు చేసిన అధికారులు. స్ట్రాంగ్ రూమ్‌లు, కౌంటింగ్ హాళ్లలో సీసీ కెమెరాలు ఏర్పాటు చేశారు.
ఇది కూడా చదవండి: Cyclone Murasu Alert: అతి భారీ వర్షాలు.. రేపు పాఠశాలలకు సెలవు..!
మరిన్ని ఏపీ వార్తల కోసం ఇక్కడ క్లిక్ చేయండి