Birthday Celebration: వేప చెట్టుకు వందేళ్ల పండగ..ఏడాదిపాటు ఊరంతా వేడుక! వృక్ష ప్రేమికుల అభిమానం

పది, ఇరవై కాదు ఏకంగా ఆ చెట్టు వందేళ్ళు పూర్తి చేసుకుంది… దీంతో వృక్ష ప్రేమికుల ఆనందానికి హద్దు లేకుండా పోయింది. శతాధిక వృద్దులకు ఘనంగా జన్మదిన వేడుకలు నిర్వహిస్తున్నప్పుడు చెట్టుకు మాత్రం ఎందుకు పుట్టినరోజు వేడుకలు నిర్వహించకూడదని ఆ ఊరి ప్రజలు అనుకున్నారు. ఇంకేముంది అనుకున్నదే తడువుగా జన్మదిన వేడుకలు ఘనంగా నిర్వహించారు.

బాపట్ల జిల్లా నగరం మండలం దూళిపూడిలోని శ్రీ రాజగోపాలస్వామి దేవాలయం ఎదుట నూతి సత్యన్నారాయణ 1923 మే 21న వేప చెట్టు నాటారు. అంతేకాకుండా అప్పట్లో యాభై రూపాయలు వెచ్చించి చెట్టు చుట్టూ రచ్చ బండ కూడా కట్టించారు. దీంతో చెట్టు చుట్టూ కట్టించిన రచ్చబండను రికార్డుల్లోకి కెక్కించారు. అప్పటి నుండి స్థానికులు ఆ చెట్టును లక్ష్మీ దేవిగా భావించి పూజలు చేయడం మొదలు పెట్టారు‌.

చెట్టు నాటిన నూతి సత్యన్నారాయణ కాలం చేసినా, ఆయన వారసులు చెట్టు నాటి వందేళ్ళు అయినట్లు గుర్తించి శత వసంతాల వేడుక నిర్వహించారు. ఏడాది పాటు ఏదో ఒక కార్యక్రమం నిర్వహించాలని కూడా నిర్ణయించారు సత్యన్నారాయణ వారసులు వెంకటరామ శర్మ, శివ ప్రసాద్, సాయి బాబు. గ్రామస్థులు వారికి మద్దతివ్వడంతో ఆ చెట్టు వందేళ్ళ వేడుకలు ఘనంగానే జరుగుతున్నాయి‌. అయితే, ఈ వేడుకలు ఎలా జరుగుతున్నాయంటే..

Birthday’ Celebrated

అమ్మవారి ప్రతిరూపంగా భావించే వేప చెట్టుకు కొత్త చీర కట్టారు. పొంగలి వండి నైవేద్యం పెట్టారు. చెట్టు చుట్టూ ఉన్న రచ్చబండకు కొత్త సొగబులు అద్దారు. అంతేకాదండోయ్‌.. ఊరంతా వచ్చి వేప చెట్టుకి ప్రత్యేక పూజలు చేశారు. ఆ విధంగా వందేళ్ళ వేడుకలను పూర్తి చేశారు. ఈ వేడుకలను చూసేందుకు దూళిపూడివాసులతో పాటు, చుట్టుపక్కల గ్రామస్తులు కూడా పెద్ద సంఖ్యలో తరలివచ్చారు.

రిపోర్టర్: టి నాగరాజు, టివి9 తెలుగు, గుంటూరు.