నాలుగు రోజులగా కురుస్తున్న వర్షాలు.. హవాయిని ముంచెత్తిన వరదలు.. ఎమర్జెన్సీ ప్రకటించిన ఐలండ్ స్టేట్..
Poor Weather: అమెరికాలోని ఐలండ్ స్టేట్ హవాయిని వరదలు వణికిస్తున్నాయి. నాలుగు రోజుల నుంచి కురుస్తున్న భారీ వర్షాలతో ఈ రాష్ట్రంలో అత్యవసర పరిస్థితి ప్రకటించారు. హవాయిలోని..
Hawaii Declares Emergency: అమెరికాలోని ఐలండ్ స్టేట్ హవాయిని వరదలు వణికిస్తున్నాయి. నాలుగు రోజుల నుంచి కురుస్తున్న భారీ వర్షాలతో ఈ రాష్ట్రంలో అత్యవసర పరిస్థితి ప్రకటించారు. హవాయిలోని కౌపాకులా డ్యామ్ ప్రమాదకర పరిస్థితుల్ని దాటి ప్రవహిస్తోంది. వరదల వల్ల భారీగా అస్తినష్టం జరిగిందని ప్రకటించారు గవర్నర్ డేవిడ్.
పసిఫిక్ ఓషన్లో ఉన్న హవాయి దీవుల్ని వర్షాలు వణికిస్తున్నాయి. కుండపోతగా కురుస్తున్న భారీ వర్షాలతో జనజీవనం స్థంభించిపోయింది. ఒక్క ప్రాంతం అని కాకుండా.. రాష్ట్రం మొత్తం వానలు దంచి కొడుతున్నాయి. వర్షాలకు రిజర్వాయర్లన్నీ నిండిపోయాయి. హవాయిలోని రెండు డ్యామ్లు ప్రమాదకర పరిస్థితిని దాటి ప్రవహిస్తున్నాయి.
కౌపాకులా డ్యామ్ మీదుగా నీరు ప్రవహిస్తోంది. వరదల పరిస్థితి ప్రమాదకరంగా ఉన్నా.. డ్యామ్కి ఇబ్బంది లేదని ప్రకటించారు అధికారులు. హవాయి కేపిటల్ హొనలాలూ డిపార్ట్మెంట్ ఆఫ్ ఎమర్జెన్సీ మేనేజ్మెంట్ హలేవియా పట్టణాన్ని ఖాళీ చేయాలని ప్రజల్ని ఆదేశించింది. డ్యామ్ల వద్దనున్న గ్రామాలతో పాటు పరీవాహక ప్రాంతాల్లో ఉన్న ప్రజలు కూడా సురక్షిత ప్రాంతాలకు వెళ్లాలని అధికారులు సూచించారు.
హైకూ ప్రాంతంలో 8 గంటల్లో 36 సెంటీమీటర్ల వర్షం కురిసింది. వర్షాల వల్ల చాలా చోట్ల రోడ్లు కొట్టుకుపోయాయి. ఇళ్లు కూలిపోయాయి. లోతట్టు ప్రాంతాలు నీట మునిగాయి. విద్యుత్ సరఫరా ఆగిపోయింది. సమాచార వ్యవస్థ కుప్పకూలింది. ఆగకుండా కురుస్తున్న వర్షాల వల్ల ఆకస్మిక వరదలు వచ్చే అవకాశం ఉందని… ఎప్పుడు ఎలాంటి పరిస్థితినైనా ఎదుర్కొనేందుకు సిద్ధంగా ఉండాలని అధికారులకు ఆదేశాలు వెళ్లాయి.
వరదలకు కొండ చరియలు విరిగిపడ్డాయి. హవాయికి టూరిస్ట్ల తాకిడి ఎక్కువ. ప్రస్తుతం కురుస్తున్న వర్షాలతో టూరిస్టులు కూడా ఎటూ వెళ్లవద్దని.. హోటళ్లలోనే ఉండాలని ప్రభుత్వం అదేశించింది. హవాయిలో 132 డ్యామ్లు ఉన్నాయి. ఇందులో రెండు డ్యాముల కాల పరిమితి ముగిసింది.
వాటిని మార్చ్లో తొలగించాలని అధికారులు నిర్ణయించారు. ప్రస్తుతం వస్తున్న వరదలకు డ్యాములు తట్టుకుంటాయా లేదా అని ఆధికారులు ఆందోళన చెందుతున్నారు. శుక్రవారం వరకూ భారీ వర్షాలు కురుస్తాయని అమెరికన్ వాతావరణ శాఖ ప్రకటించింది. వరదల్లో నష్టపోయిన వారిని ఆదుకునేందుకు భారీగా నిధులు కేటాయించింది రాష్ట్రప్రభుత్వం.