ఎల్‌-నినో ముప్పు.. రాష్ట్రంలో తాగునీటి కటకట.. నీటి పొదుపే శ్రీరామరక్ష!

రాష్ట్రంలో వాతావరణ పరిస్థితులు మండువేసవిని తలపిస్తున్నాయి. రోజు రోజుకీ ఉష్ణోగ్రతలు పెరిగిపోతున్నాయి. వర్షాకాలం వచ్చిందన్న మాటేకానీ.. పట్టుమని 10 రోజులు గట్టి వాన పడిన జాడేలేదు. దీంతో భూగర్భ జలాలు అడుగంటిపోతున్నాయి. నానాటికీ అడుగంటుతున్న భూగర్భ జలాలు రాబోయే కాలంలో తీవ్ర తాగునీటి ఎద్దడికి సంకేతంగా మారుతున్నాయి. పసిఫిక్ మహాసముద్రంలో ‘ఎల్‌-నినో’ ప్రభావం వల్ల ఈసారి వర్షాభావ పరిస్థితులు తీవ్రరూపం దాల్చే ప్రమాదం ఉందన్న వాతావరణ హెచ్చరికలు సర్వత్రా ఆందోళన కలిగిస్తున్నాయి. ఈ నేపథ్యంలో ప్రజలకు తాగునీరు, సాగునీరు అందించడంతో పాటు విద్యుత్ రంగాన్ని కాపాడుకోవడం ప్రభుత్వానికి అత్యంత సవాలుగా మారింది. ఈ విపత్కర పరిస్థితులను దీటుగా ఎదుర్కొనేందుకు తెలంగాణ ప్రభుత్వం ముందస్తు ప్రణాళికలతో రంగంలోకి దిగింది. ప్రపంచవ్యాప్తంగా వాతావరణ మార్పుల కారణంగా ఏర్పడుతున్న ఎల్‌-నినో ప్రభావం తెలంగాణపై గట్టిగా పడనుంది. సాధారణం కంటే తక్కువ వర్షపాతం నమోదయ్యే అవకాశం ఉండటంతో జలాశయాల్లో నీటి నిల్వలు క్రమంగా తగ్గుముఖం పడుతున్నాయి. హైదరాబాద్‌ నగరంలో దాదాపు 14.5 లక్షల నల్లా కనెక్షన్ల ద్వారా 1.30 కోట్ల మందికి తాగునీరు అందిస్తున్నారు. అయితే, సింగూరు మరియు మంజీరా జలాశయాల పరిధిలో నీటి మట్టాలు పడిపోవడంతో రానున్న కాలంలో సుమారు 3 లక్షల నల్లా కనెక్షన్లపై దీని ప్రభావం పడే అవకాశం ఉందని అంచనా వేస్తున్నారు. అనియంత్రిత వినియోగం వల్ల భూగర్భ జలాలు వేగంగా తగ్గిపోతున్నాయి. ఫిబ్రవరి తర్వాత పరిస్థితి మరింత క్షీణిస్తే, మూడు రోజులకు ఒకసారి తాగునీరు సరఫరా చేయాల్సి వస్తుందని అధికారులు హెచ్చరిస్తున్నారు. ప్రభుత్వం, జలమండలి సంయుక్తంగా ఈ సంక్షోభాన్ని సమర్థవంతంగా ఎదుర్కొనేందుకు పలు కీలక నిర్ణయాలు తీసుకున్నాయి. నిర్మాణ రంగాలు, పరిశ్రమలు, పార్కులు మరియు గ్రీన్‌బెల్ట్‌ల అవసరాల కోసం తాగునీటికి బదులుగా శుద్ధి చేసిన మురుగునీటిని వాడేలా.. నవంబర్ 1 నుంచి ‘గ్రీన్ వాటర్ ట్యాంకర్’ డిజిటల్ ప్లాట్‌ఫామ్‌ను అందుబాటులోకి తీసుకువస్తున్నారు. తొలి దశలో రోజుకు 500 మిలియన్‌ గ్యాలన్ల శుద్ధి చేసిన నీటిని వినియోగించాలని లక్ష్యంగా పెట్టుకున్నారు. గేటెడ్ కమ్యూనిటీలు, అపార్ట్‌మెంట్‌లలోని ప్రైవేట్ ఎస్టీపీల నుంచి వచ్చే మిగులు నీటిని సద్వినియోగం చేసుకోవాలని నిర్ణయించారు. ఇప్పటికే 51 ప్రైవేట్ ఎస్టీపీలను నమోదు చేయగా, నిత్యం 1.5 మిలియన్‌ లీటర్ల నీరు అందుబాటులోకి వస్తోంది. నగరంలో కొత్త బోర్ల తవ్వకానికి ఎలాంటి అనుమతులు ఇవ్వబోమని స్పష్టం చేశారు. అక్రమ నల్లా కనెక్షన్లపై ప్రత్యేక నిఘా పెట్టి చట్టపరమైన కేసులు నమోదు చేయనున్నారు. నిర్మాణ రంగంలో తాగునీరు లేదా భూగర్భ జలాలు అస్సలు వాడకూడదని, కేవలం ఎస్టీపీ నీటినే ఉపయోగించాలని ఆదేశాలు జారీ చేశారు. సింగూరులో నీటి నిల్వలు తగ్గినందున, అదనపు పంపులు ఏర్పాటు చేసి నీటిని తరలించేందుకు రూ.84.14 కోట్లతో ప్రణాళిక సిద్ధం చేశారు. అలాగే జనవరి నుంచి గోదావరి నుంచి రోజుకు మరో 50 మిలియన్‌ గ్యాలన్ల నీటిని అదనంగా అందుబాటులోకి తెస్తున్నారు. ఇందుకోసం ప్రతి జిల్లా కలెక్టర్ వద్ద అత్యవసర నిధిగా రూ.కోటి అందుబాటులో ఉంచనున్నారు. ఎల్‌‌‌‌నినో ప్రభావం, వాతావరణ పరిస్థితుల దృష్ట్యా తాగునీటికే ఫస్ట్ ప్రయారిటీ ఇవ్వాలని అధికారులను మంత్రి సీతక్క ఆదేశించారు. రానున్న వేసవిలో రాష్ట్ర ప్రజలకు తాగునీటి ఎద్దడి తలెత్తకుండా ముందస్తు కార్యాచరణను సిద్ధం చేస్తున్నట్లు తెలిపారు. శనివారం ఆమె ఎర్రమంజిల్‌‌‌‌లోని గ్రామీణ తాగునీటి సరఫరా ప్రధాన కార్యాలయంలో ఉన్నతాధికారులతో సమీక్షా సమావేశం నిర్వహించారు. నవంబర్ 1వ తేదీ నాటికి సాగునీటి అవసరాలు తీరిన వెంటనే రిజర్వాయర్లలో అందుబాటులో ఉండే నీటిని పూర్తిస్థాయిలో తాగునీటి అవసరాలకే కేటాయించేలా ప్లాన్ చేసుకోవాలన్నారు. రిజర్వాయర్లలో నీటిమట్టాలు డెడ్ స్టోరేజీ స్థాయికి పడిపోయినా సరఫరా ఆగకుండా కనీసం 100 ఎమర్జెన్సీ పంపులను ఇప్పటినుంచే సిద్ధంగా ఉంచాలని చెప్పారు. పనిచేయని పంపులకు తక్షణమే మరమ్మతులు పూర్తి చేయాలన్నారు. రాష్ట్రంలోని ప్రతి గ్రామం, ప్రతి హ్యాబిటేషన్ ను యూనిట్‌‌‌‌గా తీసుకుని సమ్మర్ యాక్షన్ ప్లాన్ రెడీ చేయాలని అధికారులకు మంత్రి స్పష్టం చేశారు. నీటితో పాటు విద్యుత్ రంగంపై కూడా భారీ భారం పడుతోంది. రాష్ట్రంలో గరిష్ట విద్యుత్ వినియోగం 20,000 మెగావాట్లకు చేరింది. సాయంత్రం 5 నుండి రాత్రి 9 గంటల వరకు పీక్ అవర్స్‌లో కరెంటు వినియోగం తగ్గించాలని కోరుతున్నారు. ప్రభుత్వ కార్యాలయాల్లో ఏసీ ఉష్ణోగ్రతను కచ్చితంగా 25 డిగ్రీల సెల్సియస్‌ వద్దే ఉంచాలని, సాయంత్రం వేళల్లో విద్యుత్ పరికరాల వాడకం తగ్గించాలని నిర్ణయించారు. ప్రతి ఒక్కరూ బాధ్యతగా వ్యవహరించి, నగరంలో నీటి వాడకాన్ని కనీసం 20 శాతం తగ్గించుకోవాలని అధికారులు విజ్ఞప్తి చేస్తున్నారు. పార్కులు, రోడ్డు మధ్యలోని సెంట్రల్ మీడియన్లలోని మొక్కలకు కేవలం ఎస్టీపీ నీటిని మాత్రమే వాడాలి. అలాగే విద్యుత్ వినియోగం విపరీతంగా పెరిగినందున ఇళ్లలోని వైరింగ్‌ను సరిచూసుకోవాలని, లేదంటే అగ్నిప్రమాదాలు జరిగే అవకాశం ఉందని హెచ్చరిస్తున్నారు. రూఫ్‌టాప్ సోలార్ సిస్టమ్స్ ఏర్పాటు చేసుకునేవారికి తగిన ప్రోత్సాహం అందిస్తున్నారు.

మరిన్ని వీడియోల కోసం ఇక్కడ క్లిక్ చేయండి

Also Watch:

ఫస్ట్ జాబ్‌కే రూ.15,000.. కొత్త ఉద్యోగులకు బంపర్ బెనిఫిట్!