బండారు వ్యాఖ్యలపై రగడ.. రోజాకు మద్దతుగా కదంతొక్కుతున్న సినీతారలు

ఏపీ మంత్రి ఆర్కే రోజాకు పలువురు సినీతారలు బాసటగా నిలిచారు. రోజాపై అనుచిత వ్యాఖ్యలు చేసిన టీడీపీ నేత బండారు సత్యనారాయణపై పోలీసులు కేసు నమోదుచేసి అరెస్టు చేయడం తెలిసిందే. ఆ తర్వాత షరతులతో కూడిన బెయిల్‌పై ఆయన్ను విడుదల చేశారు. తనపై అనుచిత వ్యాఖ్యలు చేసిన బండారుపై న్యాయ పోరాటం చేయబోతున్నట్లు ఇప్పటికే మంత్రి రోజా ప్రకటించారు. ఈ వ్యవహారంలో తాను సుప్రీంకోర్టుకు వెళ్లబోతున్నట్లు తెలిపారు. బండారుపై సివిల్, క్రిమిషనల్ పరువు నష్టం దావాలు వేయబోతున్నట్లు స్పష్టంచేశారు. కాగా తమ సహచర నటి, ఏపీ మంత్రి రోజాపై బండారు సత్యనారాయణ చేసిన అనుచిత వ్యాఖ్యలను పలువురు సినీ తారలు తీవ్రంగా ఖండించారు. ఈ విషయంలో రోజాకు మద్దతు తెలియజేస్తూ నటీమణులు కుష్బూ సుందర్, రమ్య కృష్ణ, రాధికా శరత్ కుమార్, మీనా, కవిత, మహారాష్ట్రకు చెందిన ఎంపీ, నటి నవనీత్ కౌర్ తదితరులు వీడియోలను విడుదల చేశారు.

ఓ మహిళా మంత్రిపై బండారు సత్యనారాయణ చేసిన వ్యాఖ్యలు అమానుషమని వారు మండిపడ్డారు. వెంటనే ఈ వ్యాఖ్యలను వెనక్కి తీసుకుని బేషరతు క్షమాపణ చెప్పాలని డిమాండ్ చేశారు. బండారు సత్యనారాయణను కఠినంగా శిక్షించాలని డిమాండ్ చేశారు.