Upendra UI: UI మూవీతో ప్రేక్షకుల ఇంటెలిజెన్స్‌కు పరీక్షపెట్టిన ఉపేంద్ర.!

సినిమా టైటిల్ కార్డ్స్ పడకముందే ‘మీరు ఇంటెలిజెంట్ అయితే వెంటనే థియేటర్ నుంచి వెళ్లిపోండి..’, ‘మీరు ఫూల్ అయితే సినిమా మొత్తం చూడండి’, ‘తెలివైన వాళ్లు, ఫూల్స్‌గా కనిపిస్తారు. ఫూల్స్, తెలివైన వాళ్లుగా గుర్తించబడతారు’ అని వేసి.. తాను ఏం చూపించబోతున్నాడో? ఎలాంటి సినిమా ఇవ్వబోతున్నాడో చెప్పేశాడు ఉపేంద్ర. నాగ్ అశ్విన్, 2898adలో కల్కి అవతారం ఎలా ఉంటుందో చూపిస్తే, ఉపేంద్ర.. వాస్తవానికి దగ్గరగా ఉండే ప్రపంచాన్ని ఆవిష్కరించాడు. వందల ఏళ్ల తర్వాత కూడా ఈ బీద- ధనిక తారతమ్యాలు అలాగే ఉంటాయని.. హీరోల కోసం కొట్టుకునే వెర్రి ఫ్యాన్స్, ఐపీఎల్ చూస్తూ ఊగిపోయే క్రికెట్ ఫ్యాన్స్‌‌పైన సంధించిన వ్యంగ్య అస్త్రం ఈ ‘UI’ సినిమా.

‘UI’ అంటే కొందరికి ఉపేంద్ర ఇంటెలిజెన్స్ అనిపిస్తుంది. మరికొందరికి యూనివర్సల్ ఇంటెలిజెన్స్ అని అర్థం అవుద్ది. ఇంకొందరికి ‘యూ అండ్ ఐ’ అనిపిస్తుంది. ఎవరికి ఎలా అర్థం అయితే అలా అర్థం చేసుకోమని వదిలేశాడు ఉపేంద్ర. ఉపేంద్ర సినిమాలో కమర్షియల్ అంశాలను ఆశించడం కరెక్ట్ కాదు. హీరో, హీరోయిన్, విలన్, లవ్ ట్రాక్, కామెడీ ట్రాక్, యాక్షన్ సీక్వెన్స్.. ఇలాంటి రొటీన్ అంశాలు, ‘UI’ మూవీలో ఉండవు. తానేం చెప్పాలనుకున్నాడో, తన సినిమాల నుంచి అభిమానులు ఏం ఆశించి థియేటర్‌కి వస్తారో దాన్నే చూపించాడు ఉపేంద్ర..

మరోసారి డైరెక్టర్‌గా తనలోని క్రియేటివిటీని వాడటంలో సక్సెస్‌ అయ్యాడు ఉపేంద్ర. చాలా రోజుల తర్వాత ఉపేంద్ర రేంజ్ సినిమాగా అనిపిస్తుంది ‘UI’. అయితే ఈ సినిమాలో ఉపేంద్ర చెప్పాలనుకున్న విషయాలు, అందరికీ అంత ఈజీగా అయితే అర్థం కావు. అర్థం అయినా ట్విట్టర్‌లో ఫ్యాన్స్ వార్ చేసే జనాలు, వాటిని అంగీకరించే పొజిషన్‌లో ఉండరు. ఉపేంద్ర దర్శకత్వంలో వచ్చిన ‘A’ మూవీకి, ‘UI’ మూవీకి కొన్ని పోలికలు కనిపిస్తాయి. ప్రపంచాన్ని ఏలే కల్కి అవతారంగా ఉపేంద్ర నటన టాప్ లెవెల్. ఉపేంద్ర సినిమాలో తన పాత్రకు తప్ప మిగిలిన పాత్రలకు పెద్దగా ప్రాధాన్యం ఉండదు. అయితే ఈసారి తన పాత్రతో పాటు మిగిలిన పాత్రలకు కూడా ప్రాధాన్యం ఉండేలా చూసుకున్నాడు.

గోచీలు కట్టుకుని, అన్నం మెతుకుల కోసం కొట్టుకుంటూ, చంపేసుకునే సీన్స్.. మరీ రియాలిటీకి చాలా దగ్గరగా ఉండి, చూసేందుకు కాస్త ఇబ్బందిగానూ అనిపిస్తాయి. ఉపేంద్రతో పాటు అతని సినిమాల్లో కచ్ఛితంగా కనిపించే సాధు కోకిల, ఈ సినిమాలో ఉంటాడు. రేష్మా నన్నయ్య, సన్నీ లియోనీ తదితరులు తమ పాత్రల్లో బాగా ఒదిగిపోయారు. దాదాపు రూ.100 కోట్లతో ‘UI’ మూవీని తెరకెక్కించాడు ఉపేంద్ర. రూ.600 కోట్లతో తెరకెక్కించిన ‘కల్కి 2898ad’ మూవీ మరో ప్రపంచాన్ని పరిచయం చేస్తే, ఈ మూవీలో అలాంటి ప్రపంచమే తక్కువ బడ్జెట్‌లో చూపించాడు ఉపేంద్ర. అజనీష్ లోక్‌నాథ్ ఇచ్చిన మ్యూజిక్, బ్యాక్ గ్రౌండ్ స్కోర్ సినిమాకి బాగా ప్లస్ అయ్యింది.. సినిమాటోగ్రఫీ, ఎడిటింగ్ బాగానే కుదిరాయి. అయితే ఇలాంటి వ్యంగ్య అస్త్రాలను అర్థం చేసుకోవడం అందరి వల్ల కాని పని. అదీకాకుండా సినిమా మొదటి నుంచి ఆఖరి వరకూ వచ్చే ట్రోల్స్‌ని అర్థం చేసుకోవాలంటే మంచి హ్యూమర్ కూడా అవసరం. ఓవరాల్‌గా మీ IQని పరీక్షించే సినిమా ‘UI’అన్నమాట.