అమెరికాలో ఈటా హరికేన్… 21 మంది మృతి, వందలాది మంది నిరాశ్రయులు

అమెరికా అధ్యక్ష ఎన్నికల ఫలితాలతో వేడెక్కితే.. మరోవైపు భారీ వరదలు ముంచెత్తుతున్నాయి. ఈటా హరికేన్ వల్ల అమెరికాలో కురుస్తున్న కుండపోత వర్షాలతో 21 మంది మృత్యువాతపడ్డారు. భారీ వర్షాల ధాటికి వరదనీటితో వీధులన్నీ నదులుగా మారాయి. గ్వాటెమాలలో పలు ఇళ్లు బురదనీటిలో కూరుకుపోయాయి. సెంట్రల్ గ్యాటెమాలలోని శాన్ పెడ్రో కార్చాలో కార్లు వరదనీటిలో మునిగిపోయాయి. తుపాన్ విపత్తు వల్ల హూండురాస్ భారీనష్టం సంభవించిందని స్థానిక అధికారులు ప్రకటించారు. వరదనీటిలో చిక్కుకున్న ప్రజలను రక్షించడానికి రిస్క్యూ టీమ్స్ రంగంలోకి దిగాయి. స్పీడ్ బోట్లు, హెలికాప్టర్ల సాయంతో ముంపునకు గురైనవారిని ఇతర ప్రాంతాలకు తరలిస్తున్నామని హోండురాన్ అధ్యక్షుడు జువాన్ ఓర్లాండో హెర్నాండెజ్ చెప్పారు. అమెరికాను తాకిన తీవ్రమైన తుపాన్లలో నాలుగోవ హరికేన్‌గా మంగళవారం గంటకు 150 మైళ్ల గాలులతో తీరాన్ని తాకింది. గ్వాటెమాల, పనామా ప్రాంతాల్లో చాలామంది తప్పిపోయారు. వరదనీరు వెల్లువెత్తుతుండటంతో చాలాచోట్ల ప్రజలు రక్షణ కోసం భవనం పైకప్పులపై చిక్కుకొని రక్షణ కోసం ఎదురుచూస్తున్నారు.

అటు, సెంట్రల్ అమెరికన్ దేశంలో తుపాన్ విపత్తు వల్ల కురుస్తున్న భారీవర్షాలతో గ్వాటెమాల సిటీలో నలుగురు మరణించగా, మరో ఇద్దరు గల్లంతయ్యారు. తుపాన్ వల్ల 33,282 మంది నిరాశ్రయులయ్యారని, తుపాన్ బాధతులను సహాయ శిబిరాలకు తరలించామని తుపాన్ విపత్తు నిర్వహణ జాతీయ సమన్వయకర్త కాన్రెడ్ చెప్పారు. రాత్రి రెండు పట్టణాల్లో కొండచరియలు విరిగిపడటం వల్ల నలుగురు మరణించారని కాన్రెడ్ పేర్కొన్నారు. మరోవైపు, గ్వాటెమాల నగరంలో తుపాన్ ధాటికి 92 ఇళ్లు కూలిపోయే ప్రమాదం ఉందని ఆయన వివరించారు. ఉత్తర హోండురాస్ లోని లాసిబా నౌకాశ్రయానికి దక్షిణాన 145 కిలోమీటర్ల దూరంలో తుపాన్ కేంద్రీకృతమైంది. ఈ తుపాన్ కరేబియన్ సముద్రం వైపు వెళుతుందని యూఎస్ నేషనల్ హరికేన్ సెంటర్ తెలిపింది.