కీబోర్డుపై అక్షరాలు ABCD క్రమంలో ఎందుకు ఉండవు? ఆశ్చర్యకరమైన కారణం
QWERTY Keyboard History: కంప్యూటర్, ల్యాప్‌టాప్ కీబోర్డుపై అక్షరాలు ABCD క్రమంలో కాకుండా QWERTY అమరికలో ఎందుకు ఉంటాయో ఎప్పుడైనా ఆలోచించారా? 150 ఏళ్లకు పైగా చరిత్ర ఉన్న ఈ కీబోర్డు వెనుక టైప్‌రైటర్ల అభివృద్ధి, యాంత్రిక సమస్యలు, టెలిగ్రాఫ్ ఆపరేటర్ల అవసరాలు వంటి ఆసక్తికరమైన అంశాలు ఉన్నాయి. అసలు QWERTY అమరిక ఎలా ఏర్పడింది? కంప్యూటర్ల యుగంలోనూ అదే విధానం ఎందుకు కొనసాగుతోంది? వివరంగా తెలుసుకుందాం.
Updated on: Oct 16, 2026 | 1:16 PM
కంప్యూటర్ లేదా ల్యాప్‌టాప్.. ఎందులోనైనా మనం టైప్ చేసేటప్పుడు మనకు కనిపించే కీబోర్డుపై అక్షరాలు ఒక ప్రత్యేక క్రమంలో ఉంటాయి. పై వరుసలో QWERTY అక్షరాలు కనిపిస్తాయి. రెండో వరుసలో ASDFGH.. మూడో వరుసలో ZXCVBN ఉంటాయి. అయితే, ఇంగ్లిష్ అక్షరాలను ABCD వరుస క్రమంలో అమర్చకుండా ఇలా ఎందుకు రూపొందించారో మీకు తెలుసా? దీని వెనుక 150 ఏళ్లకు పైగా చరిత్ర ఉంది.
19వ శతాబ్దంలో కంప్యూటర్లు అందుబాటులోకి రాకముందే, అక్షరాలను కాగితంపై ముద్రించే టైప్‌రైటర్లను రూపొందించే ప్రయత్నాలు జరిగాయి. అమెరికాకు చెందిన ఆవిష్కర్త క్రిస్టోఫర్ లాథమ్ షోల్స్ 1860లలో టైప్‌రైటర్ పరికరం అభివృద్ధిపై పనిచేశారు. ఆయన ప్రారంభ నమూనాల్లో అక్షరాలు దాదాపు అక్షరక్రమంలో ఉండేవి. ఆ తర్వాత యంత్ర పనితీరును మెరుగుపరిచే క్రమంలో కీబోర్డు అమరికలో మార్పులు చేశారు.
ఆ కాలంలో టైప్‌రైటర్లలో ప్రతి అక్షరానికి ఒక లోహపు భాగం ఉండేది. కీలు నొక్కినప్పుడు అవి కదిలి కాగితంపై అక్షరాలను ముద్రించేవి. వరుస క్రమంలోని అక్షరాలను వేగంగా నొక్కినప్పుడు టైప్‌బార్లు ఒకదానికొకటి తగిలి ఇరుక్కునేవి. ఈ సమస్యను తగ్గించేందుకు తరచుగా వచ్చే అక్షరాల కలయికలను వేర్వేరు స్థానాల్లో ఉంచే ఉద్దేశంతో యాంత్రిక కారణాలతో QWERTY అమరికను రూపొందించారన్న ప్రచారం ఉంది. అయితే, ఈ సిద్ధాంతమే QWERTY ఏర్పడటానికి ఏకైక కారణమని నిర్ధారించే ఆధారాలు లేవు. టెలిగ్రాఫ్ ఆపరేటర్ల అవసరాలు కూడా ఈ మార్పులను ప్రభావితం చేసి ఉండవచ్చని కొందరు పరిశోధకులు భావిస్తున్నారు.
కంప్యూటర్లు వచ్చినా ఎందుకు మారలేదు?
1874లో E. రెమింగ్టన్ అండ్ సన్స్ సంస్థ టైప్‌రైటర్లను వాణిజ్యపరంగా తయారు చేయడం ప్రారంభించడంతో QWERTY అమరికకు విస్తృత గుర్తింపు లభించింది. ఆ తర్వాత కార్యాలయాల్లో, విద్యా సంస్థల్లో ఇదే కీబోర్డు అమరిక ప్రాచుర్యంలోకి వచ్చింది. కంప్యూటర్లు వచ్చిన తర్వాత పాత టైప్‌రైటర్ల యాంత్రిక సమస్యలు లేకపోయినా, అప్పటికే లక్షలాది మంది QWERTYపై టైప్ చేయడం నేర్చుకున్నారు. కొత్త అమరికకు మారితే వినియోగదారులు మళ్లీ నేర్చుకోవాల్సి ఉంటుంది. అందుకే కంప్యూటర్లు, ల్యాప్‌టాప్‌లు, స్మార్ట్‌ఫోన్లలోనూ ఇదే అమరిక కొనసాగుతోంది.
మొత్తానికి QWERTY అనేది కేవలం అక్షరాల అమరిక మాత్రమే కాదు. సాంకేతిక కారణాలు, వాణిజ్య నిర్ణయాలు, వినియోగదారుల అలవాట్లు కలిసి ఒక వ్యవస్థను ప్రపంచవ్యాప్తంగా ఎలా ప్రాచుర్యంలోకి తీసుకువచ్చాయో చెప్పే ఆసక్తికరమైన ఉదాహరణ.
టైప్‌రైటర్ కీలు ఇరుక్కోకుండా ఉండటానికే QWERTYని రూపొందించారు అనేది ప్రచారంలో ఉన్న ఒక ప్రసిద్ధ సిద్ధాంతం మాత్రమే.అదే దీనికి కారణమని నిర్థారించే రుజువులు లేవు. QWERTY ఎలా ఏర్పడిందనే విషయంలో చరిత్రకారుల మధ్య ఇప్పటికీ చర్చ కొనసాగుతోంది.
