సిని ఫక్కీలో చేజింగ్.. చైన్ స్నాచర్లను పట్టుకున్న సరిహద్దు గ్రామస్తులు..! మహిళ సహా..
ఆంధ్రప్రదేశ్లో చైన్ స్నాచింగ్కు పాల్పడి కారులో సరిహద్దులు దాటుతున్న దొంగల ముఠాను స్థానికులు సినిమా ఫక్కీలో చేజ్ చేసి పట్టుకున్నారు. ఏపీలోని కుక్కునూరు మండలం గుండబోరులో ఓ మహిళ మెడలోని బంగారు గొలుసును దొంగిలించి కారులో పరారవుతున్న నిందితుల గురించి చుట్టుపక్కల గ్రామాలకు సమాచారం ఇచ్చారు. సమాచారం అందుకున్న తెలంగాణ సరిహద్దు తిమ్మంపేట ములకలపల్లి మండలం గ్రామస్తులు అప్రమత్తమై అదుపులోకి తీసుకున్నారు. ముగ్గురు యువకులు, ఒక మహిళను పట్టుకుని దేహశుద్ధి చేశారు. అనంతరం నిందితులను పోలీసులకు అప్పగించారు. పూర్తి వివరాల్లోకి వెళితే..
ఆంధ్రప్రదేశ్- తెలంగాణ సరిహద్దు ప్రాంతంలో తీవ్ర కలకలం రేపిన చైన్ స్నాచింగ్ ఘటనలో స్థానిక ప్రజలు అసాధారణ సాహసాన్ని ప్రదర్శించారు. ఏపీలో దొంగతనానికి పాల్పడి వేగంగా సరిహద్దు దాటుతున్న ముఠాను తెలంగాణకు చెందిన గ్రామస్తులు సమయస్ఫూర్తితో, సినిమా సీన్ను తలపించేలా ఛేజ్ చేసి మరీ పట్టుకున్నారు. ఆంధ్రప్రదేశ్లోని ఏలూరు జిల్లా కుక్కునూరు మండలం, గుండబోరు గ్రామంలో ఒక మహిళ ఒంటరిగా ఉన్న సమయాన్ని చూసి, గుర్తుతెలియని వ్యక్తులు ఆమె మెడలోని బంగారు గొలుసును తెంచుకుని వేగంగా కారులో పరారయ్యారు. బాధితులు వెంటనే అప్రమత్తమై కేకలు వేయడంతో పాటు, స్థానికులు దొంగలు ప్రయాణిస్తున్న కారు వివరాలను చుట్టుపక్కల గ్రామాలకు, తెలంగాణ సరిహద్దుల్లోని గ్రామస్తులకు సమాచారం అందించారు.
సమాచారం అందుకున్న తెలంగాణలోని భద్రాద్రి కొత్తగూడెం జిల్లా, ములకలపల్లి మండలానికి చెందిన తిమ్మంపేట గ్రామస్తులు వెంటనే అప్రమత్తమయ్యారు. ఏపీ వైపు నుంచి వేగంగా వస్తున్న అనుమానాస్పద కారును గమనించి, దానిని నిలిపివేసేందుకు ఏమాత్రం భయపడకుండా ప్రధాన రహదారికి అడ్డంగా ఒక ఆటోను నిలిపారు.
తీవ్ర వేగంతో వస్తున్న దొంగలు దొరికిపోతామనే భయంతో అడ్డంగా ఉన్న ఆటోను కారుతో బలంగా ఢీకొట్టి తప్పించుకునేందుకు యత్నించారు. ఊహించని ఈ పరిణామంతో అవాక్కయినప్పటికీ, స్థానికులు భయపడకుండా ధైర్యంతో కారును చుట్టుముట్టారు. కారులో ఉన్న ముగ్గురు యువకులు, ఒక మహిళను బయటకు లాగి గట్టిగా దేహశుద్ధి చేశారు.
అనంతరం గ్రామస్తులు నిందితులను ములకలపల్లి పోలీసులకు అప్పగించారు. సంఘటనా స్థలానికి చేరుకున్న ములకలపల్లి ఎస్సై మధు ప్రసాద్ ప్రాథమిక విచారణ చేపట్టారు. నేరం జరిగిన ప్రదేశం ఆంధ్రప్రదేశ్ పరిధిలోని కుక్కునూరు పోలీస్ స్టేషన్ పరిధిలోకి రావడంతో, తదుపరి చట్టపరమైన చర్యలు, కేసు దర్యాప్తు నిమిత్తం నిందితులను ఏపీలోని కుక్కునూరు పోలీసులకు అప్పగించినట్లు ఎస్సై తెలిపారు. సమయస్ఫూర్తితో స్పందించి దొంగల ముఠా ఆట కట్టించిన తిమ్మంపేట గ్రామస్తుల సాహసాన్ని, చాకచక్యాన్ని పలువురు ప్రజలు, పోలీసులు విశేషంగా అభినందించారు.
మరిన్ని తెలంగాణ న్యూస్ కోసం క్లిక్ చేయండి..