యాపిల్‌ యూజర్లు, డెవలపర్లకు బిగ్‌ అలర్ట్‌.. జూన్ 8న యాపిల్‌ WWDC ప్రారంభం!

ప్రపంచవ్యాప్తంగా టెక్ రంగం దృష్టిని ఆకర్షించే యాపిల్‌ వరల్డ్‌వైడ్‌ డెవలపర్స్‌ కన్ఫరెన్స్‌ (WWDC) 2026 ఈ ఏడాది జూన్ 8 నుంచి జూన్ 12 వరకు జరగనుంది. ఈ కార్యక్రమం జూన్ 8న కీనోట్‌తో ప్రారంభమవుతుంది. ఇందులో యాపిల్‌ తన ప్రధాన ప్లాట్‌ఫారమ్‌లైన iOS, macOS తదితర వ్యవస్థలపై కీలక అప్‌డేట్‌లను ప్రకటించే అవకాశం ఉంది. ముఖ్యంగా ఈసారి ఆర్టిఫిషియల్ ఇంటెలిజెన్స్ (AI), నూతన సాఫ్ట్‌వేర్ ఫీచర్లు, డెవలపర్ టూల్స్‌పై కంపెనీ ప్రత్యేక దృష్టి సారించనుందని అంచనాలు ఉన్నాయి. భారతీయ వినియోగదారులు, డెవలపర్లు ఈ ఈవెంట్‌ను పలు డిజిటల్ ప్లాట్‌ఫారమ్‌ల ద్వారా ప్రత్యక్షంగా వీక్షించవచ్చు. యాపిల్‌ డెవలపర్‌ యాప్, ఆపిల్ అధికారిక వెబ్‌సైట్, అలాగే యూట్యూబ్ ఛానెల్ ద్వారా స్ట్రీమింగ్ అందుబాటులో ఉంటుంది. గత అనుభవాల ప్రకారం కీనోట్ భారత కాలమానం ప్రకారం జూన్ 8 రాత్రి సుమారు 10:30 గంటలకు ప్రారంభమయ్యే అవకాశం ఉంది, అయితే కచ్చితమైన సమయాన్ని కంపెనీ త్వరలో ప్రకటించనుంది.

కీనోట్ అనంతరం ప్లాట్‌ఫామ్స్‌ స్టేట్‌ ఆఫ్‌ ది యూనియన్‌ కార్యక్రమం జరుగుతుంది. ఇందులో కొత్త టెక్నాలజీలు, సాఫ్ట్‌వేర్ అప్‌డేట్‌లపై మరింత సాంకేతిక వివరాలు అందించబడతాయి. వారం రోజుల పాటు కొనసాగే ఈ సమావేశంలో 100కు పైగా ఆన్‌లైన్ సెషన్‌లు నిర్వహించబడతాయి. డెవలపర్ వర్క్‌షాప్‌లు, గ్రూప్ ల్యాబ్‌లు, అలాగే ఆపిల్ ఇంజనీర్లతో ప్రత్యక్ష చర్చలు ఈ ఈవెంట్‌లో ప్రధాన ఆకర్షణలుగా నిలుస్తాయి. ఈ కార్యక్రమం పూర్తిగా ఆన్‌లైన్‌లో మాత్రమే కాకుండా, అమెరికాలోని యాపిల్‌ పార్క్‌ వద్ద జూన్ 8న ప్రత్యేక ప్రత్యక్ష సమావేశంగా కూడా జరుగుతుంది. ఎంపికైన డెవలపర్లు, విద్యార్థులు ఇందులో పాల్గొని కీనోట్‌ను ప్రత్యక్షంగా వీక్షించడంతో పాటు నిపుణులతో నేరుగా సంభాషించే అవకాశాన్ని పొందుతారు. అయితే సీట్లు పరిమితంగా ఉండటంతో ముందస్తు నమోదు తప్పనిసరి.

యువ ప్రతిభను ప్రోత్సహించేందుకు స్విఫ్ట్‌ స్టూడెంట్‌ ఛాలెంజ్‌ కూడా కొనసాగుతోంది. ఈ పోటీ విజేతలను మార్చి 26న ప్రకటించనున్నారు. అందులోని కొందరికి అమెరికాలో జరిగే WWDC కార్యక్రమానికి హాజరయ్యే అవకాశం లభించగా, మొదటి 50 మంది విజేతలకు క్యూపెర్టినోలో మూడు రోజుల ప్రత్యేక అనుభవం అందించబడుతుంది. మొత్తంగా AI, నెక్స్ట్-జెన్ సాఫ్ట్‌వేర్ అప్‌డేట్‌లపై దృష్టి సారిస్తున్న నేపథ్యంలో WWDC 2026 టెక్నాలజీ రంగానికి కీలక మైలురాయిగా నిలిచే అవకాశం ఉందని పరిశీలకులు భావిస్తున్నారు.

మరిన్ని టెక్‌ వార్తల కోసం ఇక్కడ క్లిక్‌ చేయండి