WhatsApp: క్రేజీ ఫీచర్‌ తీసుకొస్తున్న వాట్సాప్‌..! ఇక డీపీ కనిపించకపోయినా..

ప్రపంచవ్యాప్తంగా కోట్లాది మంది ఉపయోగిస్తున్న వాట్సాప్‌ యాప్, యూజర్లను చాలా కాలంగా ఇబ్బంది పెడుతున్న ఒక సాధారణ సమస్యకు పరిష్కారం తీసుకురానుంది. కాంటాక్ట్‌లు ప్రొఫైల్ ఫోటో (డీపీ) సెట్ చేయనప్పుడు కనిపించే ఖాళీ సిల్హౌట్ ఐకాన్‌ల స్థానంలో కొత్త విధానాన్ని ప్రవేశపెట్టేందుకు సంస్థ ప్రయత్నిస్తోంది. ప్రస్తుతం ఎవరైనా తమ ప్రొఫైల్ ఫోటోను అప్‌డేట్ చేయకపోతే, చాట్‌లలో ఒకే విధమైన డిఫాల్ట్ ఐకాన్ మాత్రమే కనిపిస్తుంది. పెద్ద సంఖ్యలో కాంటాక్ట్‌లు ఉన్నప్పుడు లేదా ఒకే పేరుతో పలువురు ఉన్నప్పుడు ఇది గందరగోళానికి దారితీస్తోంది. ఈ సమస్యను దృష్టిలో ఉంచుకుని, వాట్సాప్ కొత్త ఫీచర్‌ను అభివృద్ధి చేస్తోంది.

WABetaInfo నివేదిక ప్రకారం అధికారిక ప్రొఫైల్ పిక్చర్ లేనట్లయితే, వినియోగదారు తమ ఫోన్‌లో ఆ కాంటాక్ట్‌కు సేవ్ చేసుకున్న ఫోటోను చాట్‌లో ప్రదర్శించే విధానాన్ని పరీక్షిస్తున్నారు. అంటే ఖాళీ ఐకాన్‌ బదులుగా వినియోగదారునికి ఇప్పటికే తెలిసిన చిత్రం కనిపిస్తుంది. ఈ ఫీచర్‌లో ముఖ్యమైన అంశం గోప్యత. ఈ మార్పులు పూర్తిగా వినియోగదారుడి ఫోన్‌కే పరిమితం అవుతాయి. ఇతరులకు మీ కాంటాక్ట్ ఇమేజ్‌లు కనిపించవు, అలాగే ఎవరి వ్యక్తిగత డేటా బయటకు షేర్ చేయబడదు. ఒక వ్యక్తి తన ప్రొఫైల్ ఫోటోను తొలగించినా లేదా దాచినా, మీరు సేవ్ చేసిన చిత్రం మీకు మాత్రమే కనిపిస్తుంది.

అదనంగా వినియోగదారులు ప్రొఫైల్ ఫోటో సెట్ చేయనట్లయితే, వాట్సాప్ కాంటాక్ట్ కార్డ్‌లో ఉన్న చిత్రాన్ని కూడా ఉపయోగించే అవకాశం ఉంది. ఇది ముఖ్యంగా వ్యాపార లేదా పెద్ద కాంటాక్ట్ జాబితాలు నిర్వహించే వారికి ఉపయోగకరంగా మారనుంది. ప్రస్తుతం ఈ ఫీచర్ iOS బీటా వెర్షన్‌లో పరీక్ష దశలో ఉంది. కొంతమంది యూజర్లకు మాత్రమే ఇది అందుబాటులోకి వచ్చింది. సాధారణ వినియోగదారులకు ఎప్పుడు విడుదల చేస్తారనే విషయంపై కంపెనీ ఇంకా స్పష్టత ఇవ్వలేదు. మొత్తానికి ఈ కొత్త ఫీచర్ ద్వారా చాట్ అనుభవం మరింత సులభతరం కావడంతో పాటు, వినియోగదారులు తమ కాంటాక్ట్‌లను త్వరగా గుర్తించే వీలుంటుందని నిపుణులు అభిప్రాయపడుతున్నారు.

మరిన్ని టెక్‌ వార్తల కోసం ఇక్కడ క్లిక్‌ చేయండి