డార్క్ ఎడిషన్తో మార్కెట్ మతిపోగొట్టడానికి రెడీ అయిన టాటా.. ఇంతకీ ఏ మోడల్ తెస్తోందో తెలుసా
టాటా సియెర్రా ఇప్పటికే ప్రత్యేకమైన డిజైన్తో SUV మార్కెట్లో తనకంటూ గుర్తింపు తెచ్చుకుంది. ఇప్పుడు మరింత ఆకర్షణీయమైన రూపంతో డార్క్ ఎడిషన్ విడుదలైంది. పూర్తిగా బ్లాక్ థీమ్తో వచ్చిన ఈ కొత్త వెర్షన్ ధర రూ.13.99 లక్షల నుంచి ప్రారంభమవుతుంది. బయట నలుపు రంగు, లోపల వైలెట్ హైలైట్స్తో ఈ మోడల్ సాధారణ సియెర్రాకు భిన్నంగా కనిపిస్తుంది. పవర్ట్రెయిన్లలో మాత్రం ఎలాంటి మార్పులు చేయలేదు. పలు వేరియంట్లు అందుబాటులో ఉన్నాయి.
కొత్త SUV కొనేటప్పుడు డిజైన్కి ప్రాధాన్యం ఇచ్చేవారిని ఆకట్టుకునేలా టాటా సియెర్రా డార్క్ ఎడిషన్ను తీసుకొచ్చింది. ఫ్రీసియన్ బ్లాక్ పెయింట్తో పాటు డార్క్ అల్లాయ్ వీల్స్, ప్రత్యేకమైన DARK బ్యాడ్జింగ్ ఇందులో ఉన్నాయి. క్యాబిన్లో వైలెట్ రంగు టచ్లు ప్రత్యేక ఆకర్షణగా నిలుస్తాయి. ట్రిమ్ను బట్టి సన్రూఫ్, వెంటిలేటెడ్ సీట్లు, ADAS, 360 డిగ్రీ కెమెరా వంటి ఫీచర్లు లభిస్తాయి. ఇంజిన్ ఎంపికలు మాత్రం స్టాండర్డ్ మోడల్లో ఉన్నవే కొనసాగాయి.
రూ.13.99 లక్షల నుంచి డార్క్ ఎడిషన్
సియెర్రా డార్క్ ఎడిషన్ ధర రూ.13.99 లక్షల నుంచి ప్రారంభమవుతుంది. ప్యూర్ L ట్రిమ్ నుంచి ఈ వెర్షన్ అందుబాటులోకి వచ్చింది. డార్క్ ప్యాకేజీ కోసం సాధారణ మోడల్ కంటే రూ.20,000 అదనంగా చెల్లించాలి. హైరేంజ్ ట్రిమ్లకు ఈ అదనపు మొత్తం రూ.30,000 వరకు ఉంటుంది. ఈ వెర్షన్లో ప్రధాన ఆకర్షణ ఫ్రీసియన్ బ్లాక్ పెయింట్. బయట భాగంలో క్రోమ్ వాడకాన్ని తగ్గించి బ్లాక్ ఫినిష్ను ఎక్కువగా అందించారు. టాటా లోగో, అల్లాయ్ వీల్స్కు కూడా డార్క్ ట్రీట్మెంట్ ఇచ్చారు. ముందు ఫెండర్లపై DARK బ్యాడ్జింగ్ ఉంటుంది.
క్యాబిన్లో వైలెట్ టచ్..
బయట నలుపు థీమ్కు భిన్నంగా లోపల వైలెట్ హైలైట్స్ కనిపిస్తాయి. AC వెంట్స్, డోర్ హ్యాండిల్స్, ఫ్రంట్ ఆర్మ్రెస్ట్, సీట్ల వెనుక భాగాల్లో వైలెట్ మెటాలిక్ ట్రిమ్ ఉంది. సీట్లపై పర్పుల్ స్టిచింగ్ కూడా ఉంటుంది. వేరియంట్ను బట్టి ట్రిపుల్ స్క్రీన్ సెటప్, వెంటిలేటెడ్ సీట్లు, పనోరమిక్ సన్రూఫ్, డ్యూయల్ జోన్ క్లైమేట్ కంట్రోల్, పవర్డ్ టెయిల్గేట్ లభిస్తాయి. కనెక్టెడ్ కార్ టెక్నాలజీ, లెవెల్ 2 ADAS, 360 డిగ్రీ కెమెరా, 12 స్పీకర్ JBL సౌండ్ సిస్టమ్ కూడా ఉన్నాయి.
ఇంజిన్ విషయానికి వస్తే 106hp, 1.5-లీటర్ నాచురల్లీ ఆస్పిరేటెడ్ పెట్రోల్ ఇంజిన్ 6 స్పీడ్ మాన్యువల్, 7 స్పీడ్ DCTతో వస్తుంది. 118hp, 1.5 లీటర్ డీజిల్ ఇంజిన్కు 6 స్పీడ్ మాన్యువల్, 6-స్పీడ్ టార్క్ కన్వర్టర్ ఉన్నాయి. 160hp, 1.5 లీటర్ డైరెక్ట్ ఇంజెక్షన్ టర్బో పెట్రోల్ ఇంజిన్ 6 స్పీడ్ టార్క్ కన్వర్టర్ ఆటోమేటిక్తో మాత్రమే లభిస్తుంది.