FM లవర్స్కి గుడ్న్యూస్.. ఈ ఫోన్ ఉంటే హెడ్ఫోన్స్ లేకున్నా గంటలు గంటలు పాటలు వినొచ్చు
itel Muzik 450.. బడ్జెట్ ధరలో ఫీచర్ ఫోన్ కొనాలనుకునే వారికి itel సంస్థ కొత్త ఎంపికను తీసుకొచ్చింది. Muzik 450 పేరుతో భారత మార్కెట్లోకి కొత్త ఫోన్ను విడుదల చేసింది. it5095 మోడల్ నంబర్తో వచ్చిన ఈ పరికరంలో భారీ శబ్దం అందించే స్పీకర్, పెద్ద బ్యాటరీ, వైర్లెస్ FM వంటి సదుపాయాలు ఉన్నాయి. ధరను రూ.1,659గా నిర్ణయించారు.
స్మార్ట్ఫోన్ అవసరం లేని వారికి సాధారణ ఫోన్ ఇప్పటికీ ఉపయోగకరంగానే ఉంది. ముఖ్యంగా ఎక్కువ బ్యాటరీ, స్పష్టమైన కాల్స్, రేడియో, టార్చ్ వంటి సదుపాయాలు కోరుకునే వారికి ఫీచర్ ఫోన్లు పనికొస్తాయి. ఈ అవసరాలను దృష్టిలో పెట్టుకుని కొత్త మోడల్ను తీసుకొచ్చినట్లు తెలుస్తోంది. తక్కువ ధరలోనే పలు ఉపయోగకరమైన ఫీచర్లను ఇందులో అందించారు.
పెద్ద బ్యాటరీ
ఈ ఫోన్లో F20 2-in-1 హై-ఔట్పుట్ స్పీకర్ను అందించారు. పాటలు వినడం, FM రేడియో ఉపయోగించడం, కాల్స్ మాట్లాడే సమయంలో స్పష్టమైన శబ్దం వచ్చేలా దీనిని రూపొందించారు. బయట శబ్దం ఎక్కువగా ఉన్న ప్రదేశాల్లోనూ ఆడియో వినేందుకు ఇది ఉపయోగపడుతుంది. స్పీకర్ పరిమాణం పెద్దగా ఉన్నప్పటికీ ఫోన్ మందం 13.4 మి.మీ. మాత్రమే.
ముందు భాగంలో 2.4 అంగుళాల QVGA డిస్ప్లే ఉంటుంది. పవర్ బ్యాకప్ కోసం 2,500mAh బ్యాటరీ ఇచ్చారు. Type-C ఛార్జింగ్ పోర్ట్ కూడా ఉంది. వైర్లెస్ FM రేడియోతో పాటు రికార్డింగ్ సదుపాయం లభిస్తుంది. FM వినేందుకు వైర్డ్ ఇయర్ఫోన్లు యాంటెనాగా అవసరం లేదు. Bluetooth ఉండటంతో వైర్లెస్ ఆడియో పరికరాలను కూడా అనుసంధానించుకోవచ్చు.
ఉపయోగకరమైన ఫీచర్లు
ఐకాన్ సపోర్ట్తో గరిష్ఠంగా 1,000 కాంటాక్టులను సేవ్ చేసుకోవచ్చు. వైబ్రేషన్ మోటార్, ఆటోమేటిక్ కాల్ రికార్డింగ్ ఉన్నాయి. యాక్సెసిబిలిటీ కోసం King Talker సదుపాయం ఇచ్చారు. ‘0’ కీని ఎక్కువసేపు నొక్కితే ప్రస్తుత సమయాన్ని వాయిస్ ద్వారా తెలియజేసే సౌకర్యం కూడా ఉంది.
వెనుక VGA కెమెరా, హై-ఇంటెన్సిటీ టార్చ్ ఉన్నాయి. మూడు రంగుల్లో లభించే ఈ ఫోన్తో పాటు Type-C యాక్సెసరీస్, రక్షణ కవర్ను బాక్స్లో అందిస్తున్నారు. దేశవ్యాప్తంగా 1.30 లక్షలకు పైగా రిటైల్ అవుట్లెట్లలో ఈ ఫోన్ అందుబాటులోకి వచ్చింది. ధర రూ.1,659గా ఉంది.