Samsung, Pixel, iPhone.. ఫ్లాగ్షిప్ ఫోన్లలో ఏది బెస్ట్? కొనే ముందే తెలుసుకోండి!
తాజా గెలాక్సీ S26 అల్ట్రా విడుదలయ్యాక, ప్రీమియం స్మార్ట్ఫోన్లైన పిక్సెల్ 10 ప్రో XL, ఐఫోన్ 17 ప్రో మ్యాక్స్తో పోటీ తీవ్రమైంది. డిస్ప్లే, కెమెరా, పర్ఫార్మెన్స్, బ్యాటరీ వంటి కీలక విభాగాలలో ఈ మూడు ఫోన్లు ఎలా ఉన్నాయో ఇప్పుడు తెలుసుకుందాం..
తాజా గెలాక్సీ S26 అల్ట్రా విడుదలతో భారత మార్కెట్లో ప్రీమియం స్మార్ట్ఫోన్ల మధ్య పోటీ మరింత వేడెక్కింది. కొత్త Samsung Galaxy S26 Ultra ఇప్పుడు Google Pixel 10 Pro XL, iPhone 17 Pro Max వంటి టాప్ ప్రత్యర్థులతో నేరుగా తలపడుతోంది. మూడు ఫోన్లు హై-ఎండ్ స్పెక్స్, ప్రీమియం ధరలతో దాదాపు ఒకే స్థాయిలో ఉన్నా, ఉత్తమ ఎంపిక ఏది అన్నది వినియోగదారుల అవసరాలపై ఆధారపడి ఉంటుంది.
డిస్ప్లే విషయంలో గెలాక్సీ S26 అల్ట్రా, ఐఫోన్ 17 ప్రో మాక్స్ రెండూ 6.9 అంగుళాల పెద్ద స్క్రీన్ను అందిస్తాయి. పిక్సెల్ 10 ప్రో XL మాత్రం 6.8 అంగుళాలతో కొంచెం చిన్నది. అయితే శామ్సంగ్ ప్రత్యేకంగా అంతర్నిర్మిత ప్రైవసీ డిస్ప్లేను అందించడం గమనార్హం. ఇది పక్కనుండి స్క్రీన్ చూడకుండా నిరోధించే ఫీచర్ కావడంతో గోప్యతకు ప్రాధాన్యం ఇచ్చే వారికి ఇది పెద్ద ప్లస్.
పర్ఫార్మెన్స్ విభాగంలో శామ్సంగ్ స్నాప్డ్రాగన్ 8 ఎలైట్ జెన్ 5 చిప్ను ఉపయోగిస్తుండగా, గూగుల్ టెన్సర్ G5, ఆపిల్ A19 ప్రో చిప్లతో ముందుకొచ్చాయి. మూడు చిప్లు కూడా 3nm టెక్నాలజీపై ఆధారపడటంతో వేగం, పవర్ ఎఫిషియెన్సీ విషయంలో భారీ తేడా ఉండదు. స్టోరేజ్ పరంగా శామ్సంగ్, ఆపిల్ 1TB వరకు అందిస్తే, పిక్సెల్ గరిష్టంగా 512GB వద్ద ఆగుతుంది.
కెమెరా విభాగం ఎప్పటిలాగే ప్రధాన ఆకర్షణ. గెలాక్సీ S26 అల్ట్రా 200MP ప్రధాన సెన్సార్తో క్వాడ్ కెమెరా సెటప్ను అందిస్తూ హై-రిజల్యూషన్ ఫోటోగ్రఫీలో ముందంజలో ఉంది. పిక్సెల్ 10 ప్రో XL ట్రిపుల్ కెమెరాతో వచ్చినా, AI ఇమేజ్ ప్రాసెసింగ్లో తనదైన ముద్ర వేసింది. సెల్ఫీ ప్రేమికుల కోసం 42MP ఫ్రంట్ కెమెరా ప్రత్యేకంగా నిలుస్తుంది. ఐఫోన్ 17 ప్రో మాక్స్ సహజ రంగులు, స్థిరమైన వీడియో పనితీరుతో సమతుల్య అనుభవాన్ని ఇస్తుంది.
బ్యాటరీ విషయానికి వస్తే, పిక్సెల్ 10 ప్రో XL 5200mAhతో అతిపెద్ద బ్యాటరీని అందిస్తుంది. గెలాక్సీ S26 అల్ట్రా 5000mAh బ్యాటరీతో పాటు వేగవంతమైన 60W వైర్డ్ ఛార్జింగ్ను అందిస్తుంది. ఐఫోన్ మామూలుగానే బ్యాటరీ వివరాలను పూర్తిగా వెల్లడించకపోయినా, వైర్డ్, వైర్లెస్ ఛార్జింగ్ సపోర్ట్ ఇస్తుంది.
మొత్తంగా చూస్తే, కెమెరా ఫీచర్లు, వేగవంతమైన ఛార్జింగ్, అదనపు గోప్యత కావాలంటే గెలాక్సీ S26 అల్ట్రా ముందంజలో ఉంటుంది. పెద్ద బ్యాటరీ, AI ఫోటోగ్రఫీ ప్రాధాన్యం అయితే పిక్సెల్ 10 ప్రో XL మంచి ఎంపిక. స్థిరమైన పనితీరు, భద్రత, ఎకోసిస్టమ్ అనుభవం కోరుకునేవారికి ఐఫోన్ 17 ప్రో మాక్స్ ఇప్పటికీ బలమైన ప్రత్యర్థి. చివరి నిర్ణయం మాత్రం వినియోగదారుడి ప్రాధాన్యతలపైనే ఆధారపడి ఉంటుంది.
మరిన్ని టెక్ వార్తల కోసం ఇక్కడ క్లిక్ చేయండి