ఆండ్రాయిడ్‌, ఐఫోన్‌ యూజర్లకు గుడ్‌న్యూస్‌..! కీలక అప్డేట్‌ తీసుకొచ్చిన గూగుల్‌

ఆండ్రాయిడ్ ఫోన్‌లు, ఐఫోన్‌ల మధ్య మెసేజింగ్ అనుభవాన్ని మరింత సురక్షితంగా మార్చే కీలక అప్‌డేట్‌ను గూగుల్‌ విడుదల చేస్తున్నట్లు సమాచారం. ఎండ్-టు-ఎండ్ ఎన్‌క్రిప్టెడ్ రిచ్ కమ్యూనికేషన్ సర్వీసెస్ (RCS) మెసేజింగ్‌ను ఇప్పుడు ఆండ్రాయిడ్, iOS పరికరాల మధ్య కూడా అందుబాటులోకి తీసుకువస్తున్నారు. ప్రస్తుతం ఈ ఫీచర్ బీటా వెర్షన్ రూపంలో iOS 26.5 ఉపయోగిస్తున్న Apple ఐఫోన్ వినియోగదారులకు, అలాగే తాజా గూగుల్ మెసేజెస్ యాప్ ఉన్న ఆండ్రాయిడ్ వినియోగదారులకు అందుబాటులో ఉంది. RCS మెసేజింగ్‌ను సాధారణ SMS‌కు ఆధునిక ప్రత్యామ్నాయంగా భావిస్తున్నారు. దీని ద్వారా హై క్వాలిటీ ఫోటోలు, వీడియోలు పంపడం, టైపింగ్ సూచికలు, రీడ్ రిసీప్ట్‌లు, మెరుగైన గ్రూప్ చాట్‌లు వంటి ఫీచర్లు లభిస్తాయి.

ఇప్పటివరకు ఈ ఎన్‌క్రిప్టెడ్ RCS చాట్‌లు కేవలం గూగుల్ మెసేజెస్ ఉపయోగించే ఆండ్రాయిడ్ పరికరాల మధ్య మాత్రమే పనిచేసేవి. ఇప్పుడు మొదటిసారిగా ఆండ్రాయిడ్, ఐఫోన్ వినియోగదారుల మధ్య కూడా అదే స్థాయి భద్రతతో మెసేజింగ్ అందుబాటులోకి వస్తోంది. ఈ కొత్త అప్‌డేట్‌తో, ఒక ఆండ్రాయిడ్ ఫోన్ నుంచి ఐఫోన్‌కు లేదా ఐఫోన్ నుంచి ఆండ్రాయిడ్‌కు పంపే సందేశాలు కూడా ఎండ్-టు-ఎండ్ ఎన్‌క్రిప్షన్ ద్వారా రక్షించబడతాయి. అంటే మెసేజ్‌ను పంపిన వ్యక్తి, అందుకున్న వ్యక్తి తప్ప మరెవ్వరూ ఆ సందేశాన్ని చదవలేరు. డేటా ప్రయాణించే సమయంలో పూర్తిగా సురక్షితంగా ఉంటుంది. ఈ భద్రతా ఫీచర్ డిఫాల్ట్‌గా ఆన్‌లోనే ఉంటుంది.

వినియోగదారులు తమ చాట్ సురక్షితమైందో లేదో తెలుసుకోవడానికి చాట్ విండోలో కనిపించే చిన్న లాక్ గుర్తును పరిశీలించవచ్చు. ఈ గుర్తు ఇప్పటివరకు ఆండ్రాయిడ్-టు-ఆండ్రాయిడ్ ఎన్‌క్రిప్టెడ్ చాట్‌లలో మాత్రమే కనిపించేది. ఇప్పుడు క్రాస్-ప్లాట్‌ఫామ్ చాట్‌లలో కూడా ఇది కనిపించనుంది. ఈ ఫీచర్‌ను అందుబాటులోకి తీసుకురావడానికి గూగుల్, ఆపిల్‌తో పాటు పలు టెక్ భాగస్వాములు కలిసి పనిచేసినట్లు సమాచారం. అయితే ఈ విడుదల దశలవారీగా జరుగుతున్నందున, అందరికీ వెంటనే అందుబాటులోకి రావడానికి కొంత సమయం పట్టవచ్చు. వినియోగదారులు తమ యాప్‌లు, ఫోన్ సాఫ్ట్‌వేర్‌ను తాజా వెర్షన్‌కు అప్‌డేట్ చేసుకోవాలని నిపుణులు సూచిస్తున్నారు.

మరిన్ని టెక్‌ వార్తల కోసం ఇక్కడ క్లిక్‌ చేయండి