IPL 2027కు ముందే ముంబై ఇండియన్స్‌లో కీలక మార్పు.. కొత్త హెడ్ కోచ్‌గా ఎవరంటే..?
Mumbai Indians Head Coach: ఐపీఎల్ 2027 సీజన్‌కు ముందు ముంబై ఇండియన్స్ (Mumbai Indians) కీలక నిర్ణయం తీసుకుంది. జట్టు కొత్త హెడ్ కోచ్‌గా వెస్టిండీస్ మాజీ స్టార్ కీరన్ పొలార్డ్ (Kieron Pollard)ను నియమించింది. ఇప్పటికే ముంబై ఫ్రాంచైజీతో సుదీర్ఘ అనుబంధం ఉన్న పొలార్డ్.. ఇప్పుడు కోచ్‌గా ఆరో ఐపీఎల్ టైటిల్ లక్ష్యంగా జట్టును ముందుకు నడిపించనున్నాడు.
Mumbai Indians Head Coach: ఐపీఎల్ (Indian Premier League)లో ఐదు టైటిళ్లు సాధించిన ముంబై ఇండియన్స్ (Mumbai Indians) వచ్చే సీజన్‌కు ముందే కీలక మార్పు చేసింది. వెస్టిండీస్ మాజీ క్రికెటర్ కీరన్ పొలార్డ్ (Kieron Pollard)ను జట్టు కొత్త హెడ్ కోచ్‌గా నియమించింది. దీంతో ఐపీఎల్ 2027లో ముంబై ఇండియన్స్‌కు పొలార్డ్ కొత్త బాధ్యతల్లో కనిపించనున్నాడు.
ఇప్పటివరకు ముంబై ఇండియన్స్‌కు హెడ్ కోచ్‌గా వ్యవహరించిన మహేల జయవర్ధనే (Mahela Jayawardene) ఇటీవల ఆ బాధ్యతల నుంచి తప్పుకున్నాడు. అతని కోచింగ్‌లో ముంబై మూడు ఐపీఎల్ టైటిళ్లు గెలిచింది. ఇప్పుడు జట్టు బాధ్యతలను పొలార్డ్ స్వీకరించడంతో ముంబై శిబిరంలో కొత్త అధ్యాయం మొదలైంది. ఐదు టైటిళ్లతో ఉన్న జట్టు ఖాతాలో ఆరో ట్రోఫీని చేర్చడమే కొత్త కోచ్ ముందున్న ప్రధాన లక్ష్యంగా నిలవనుంది.
కీరన్ పొలార్డ్‌కు ముంబై ఇండియన్స్‌తో అనుబంధం చాలా కాలంగా కొనసాగుతోంది. 2010లో ఆటగాడిగా ఫ్రాంచైజీలోకి వచ్చిన పొలార్డ్.. ముంబై సాధించిన ఐదు ఐపీఎల్ టైటిళ్లలో భాగమయ్యాడు. అలాగే జట్టు రెండు ఛాంపియన్స్ లీగ్ టీ20 (CLT20) టైటిళ్లు గెలిచిన సమయంలోనూ జట్టులో కీలక సభ్యుడిగా ఉన్నాడు.
ఆటగాడిగా క్రికెట్‌కు వీడ్కోలు పలికిన తర్వాత కూడా పొలార్డ్ ముంబై ఇండియన్స్‌తోనే కొనసాగాడు. గత నాలుగు ఐపీఎల్ సీజన్లలో జట్టుకు బ్యాటింగ్ కోచ్‌గా సేవలు అందించాడు. ఆటగాడిగా డ్రెస్సింగ్ రూమ్ అనుభవం, కోచ్‌గా పనిచేసిన అనుభవం ఇప్పుడు హెడ్ కోచ్ బాధ్యతల్లో అతడికి ఉపయోగపడే అవకాశం ఉంది.
కొత్త బాధ్యతలపై పొలార్డ్ సంతోషం వ్యక్తం చేశాడు. ముంబై ఇండియన్స్ తన జీవితంలో, క్రికెట్ కెరీర్‌లో ఎంతో ముఖ్యమైన భాగమని పేర్కొన్నాడు. ఆటగాడిగా, కోచ్‌గా జట్టుతో ప్రయాణించిన తనకు ముంబై ఇండియన్స్ విలువలు, బాధ్యతలు బాగా తెలుసని చెప్పాడు.
జట్టు యాజమాన్యం తనపై ఉంచిన నమ్మకానికి కృతజ్ఞతలు తెలిపిన పొలార్డ్.. ఆటగాళ్లు, సహాయక సిబ్బందితో కలిసి పనిచేస్తూ జట్టు వారసత్వాన్ని ముందుకు తీసుకెళ్లాలని ఆకాంక్షించాడు. యువ ప్రతిభను అభివృద్ధి చేయడం, ముంబై అభిమానులకు మరిన్ని విజయాలను అందించడమే తన లక్ష్యమని స్పష్టం చేశాడు.
ఐపీఎల్ 2027లో పొలార్డ్ నాయకత్వంలో ముంబై ఇండియన్స్ ఎలా రాణిస్తుందన్నది ఆసక్తికరంగా మారింది. ముంబై జట్టుతో సుదీర్ఘ అనుబంధం ఉన్న మాజీ ఆటగాడికే ఇప్పుడు పూర్తి స్థాయి కోచింగ్ బాధ్యతలు అప్పగించడం జట్టు భవిష్యత్ ప్రణాళికల్లో కీలక నిర్ణయంగా కనిపిస్తోంది.