Virat Kohli: 38 ఏళ్ల వయసులోనూ కోహ్లీ టార్గెట్ అదే.. రిటైర్మెంట్‌కు ముందు 5 రికార్డులపై కన్ను
Virat Kohli: విరాట్ కోహ్లీ 38వ పుట్టినరోజు సందర్భంగా అతడి ముందు ఉన్న ఐదు భారీ రికార్డులపై చర్చ మొదలైంది. వన్డేల్లో డబుల్ సెంచరీ, 60కు పైగా బ్యాటింగ్ సగటు, 18 వేల పరుగులు, 2027 ప్రపంచకప్ విజయం, సచిన్ 100 అంతర్జాతీయ సెంచరీల రికార్డును సమం చేయడం.. ఈ లక్ష్యాలను కోహ్లీ చేరుకోగలడా లేదా చూడాలి.
Virat Kohli: భారత స్టార్ బ్యాటర్ విరాట్ కోహ్లీ నవంబర్ 5న 38వ పుట్టినరోజు జరుపుకున్నాడు. ఇప్పటికే టీ20 అంతర్జాతీయ క్రికెట్, టెస్టులకు వీడ్కోలు పలికిన కోహ్లీ.. ప్రస్తుతం వన్డేల్లో మాత్రమే కొనసాగుతున్నాడు. 2027 వన్డే ప్రపంచకప్ తర్వాత అతడు రిటైర్మెంట్ ప్రకటించవచ్చనే చర్చ జరుగుతోంది. అయితే కోహ్లీ మాత్రం తన రిటైర్మెంట్ తేదీని అధికారికంగా ప్రకటించలేదు. ఈ నేపథ్యంలో కెరీర్ ముగిసేలోపు అతడి ముందు ఉన్న కొన్ని భారీ రికార్డుల గురించి తెలుసుకుందాం.
183 పరుగుల రికార్డును 200గా మార్చగలడా?
వన్డే క్రికెట్‌లో కోహ్లీ ఇప్పటివరకు ఒక్క డబుల్ సెంచరీ కూడా చేయలేదు. ఈ ఫార్మాట్‌లో అతడి అత్యధిక వ్యక్తిగత స్కోరు 183 పరుగులు. 2012లో పాకిస్థాన్‌పై ఈ ఇన్నింగ్స్ ఆడాడు. టెస్టుల్లో మాత్రం ఏడు డబుల్ సెంచరీలు సాధించాడు. వన్డేల్లోనూ ఒకసారి 200 పరుగుల మార్కును అందుకోవాలని అభిమానులు కోరుకుంటున్నారు. 2027 ప్రపంచకప్‌లో అతడికి అలాంటి అవకాశం వస్తుందా అనేది చూడాలి. అయితే వన్డేల్లో డబుల్ సెంచరీ సాధించడం అనేది ఇప్పటివరకు అతడి ఖాతాలో లేని ఘనత.
వన్డే బ్యాటింగ్ సగటును 60 ప్లస్‌కి తీసుకెళ్లడం
కోహ్లీ వన్డే కెరీర్‌లో నిలకడకు మరో పేరు. ఇప్పటివరకు 318 మ్యాచ్‌ల్లో 15,183 పరుగులు చేశాడు. అతడి బ్యాటింగ్ సగటు 58.84గా ఉంది. ఇప్పటికే 55 సెంచరీలు, 80 అర్ధ సెంచరీలు సాధించాడు. ఈ సగటును 60కు పైగా తీసుకెళ్లాలంటే మిగిలిన మ్యాచ్‌ల్లోనూ భారీ ఇన్నింగ్స్‌లు ఆడాల్సి ఉంటుంది. ప్రస్తుతం ఉన్న గణాంకాలను చూస్తే 60 సగటు సాధించడం అంత సులభం కాదు. అయినా కోహ్లీ ఫామ్ ఇలాగే కొనసాగితే ఈ టార్గెట్ పై అభిమానుల్లో ఆశలు ఉంటాయి.
వన్డేల్లో 18,000 పరుగుల మైలురాయి
వన్డేల్లో 18 వేల పరుగుల మైలురాయిని అందుకోవడం కోహ్లీ ముందున్న మరో పెద్ద లక్ష్యం. ప్రస్తుతం అతడి ఖాతాలో 15,183 పరుగులు ఉన్నాయి. అంటే 18 వేల పరుగులు పూర్తి చేయాలంటే ఇంకా 2,817 పరుగులు చేయాలి. ఈ ఫార్మాట్‌లో అత్యధిక పరుగులు చేసిన ఆటగాడిగా సచిన్ టెండూల్కర్ 18,426 పరుగులతో అగ్రస్థానంలో ఉన్నాడు. కోహ్లీ 18 వేల మార్కును చేరినా సచిన్ రికార్డును అధిగమించడానికి మరో 426 పరుగులు అవసరం. 2027 ప్రపంచకప్ వరకు లేదా ఆ తర్వాత కూడా వన్డేల్లో కొనసాగితేనే ఈ లక్ష్యాన్ని చేరుకునే అవకాశం ఉంటుంది.
రెండోసారి వన్డే ప్రపంచకప్ విజేతగా నిలవడం
2011 వన్డే ప్రపంచకప్ గెలిచిన భారత జట్టులో కోహ్లీ సభ్యుడిగా ఉన్నాడు. ఇప్పుడు 2027 ప్రపంచకప్‌లోనూ భారత జట్టుకు ప్రాతినిధ్యం వహించి మరోసారి ట్రోఫీ అందుకోవాలని అతడు ఆశించవచ్చు. అయితే 2027లో భారత్ ప్రపంచకప్ గెలుస్తుందా? కోహ్లీ ఆ జట్టులో ఉంటాడా? అనేవి ఇప్పుడే చెప్పలేం. ఒక విషయం మాత్రం గుర్తుంచుకోవాలి.. రెండు ప్రపంచకప్‌లు గెలిచిన భారత ఆటగాడిగా నిలవడం కొత్త రికార్డు కాదు. ఇప్పటికే పలువురు భారత ఆటగాళ్లు ఒకటి కంటే ఎక్కువ ప్రపంచకప్ విజయాల్లో భాగమయ్యారు.
సచిన్ టెండూల్కర్ 100 అంతర్జాతీయ సెంచరీల రికార్డు
కోహ్లీ కెరీర్‌లో అభిమానులు ఎక్కువగా ఎదురుచూస్తున్న రికార్డు అంతర్జాతీయ క్రికెట్‌లో 100 సెంచరీలు. సచిన్ టెండూల్కర్ 100 అంతర్జాతీయ సెంచరీలతో అగ్రస్థానంలో ఉన్నాడు. కోహ్లీ ఇప్పటివరకు మూడు ఫార్మాట్లు కలిపి 86 సెంచరీలు సాధించాడు. ఇందులో టెస్టుల్లో 30, వన్డేల్లో 55, టీ20 అంతర్జాతీయ క్రికెట్‌లో ఒక సెంచరీ ఉన్నాయి. అంటే సచిన్ రికార్డును సమం చేయాలంటే కోహ్లీ మరో 14 సెంచరీలు చేయాలి. ప్రస్తుతం అతడు వన్డేల్లో మాత్రమే ఆడుతున్నందున ఈ లక్ష్యాన్ని చేరుకోవడం చాలా కష్టమైన సవాలే. అయినా కింగ్ కోహ్లీ బ్యాట్ నుంచి మరో భారీ రికార్డు వస్తుందేమోనని అభిమానులు ఆశగా ఎదురుచూస్తున్నారు.
మరిన్ని క్రీడా వార్తల కోసం ఇక్కడ క్లిక్ చేయండి..