Cricket Records : క్రికెట్లో నవ్వొచ్చే, ఆశ్చర్యపరిచే రికార్డులివే.. వీటిని వింటే షాక్ అవుతారు
క్రికెట్లో కొన్ని రికార్డులు నమ్మలేనివిగా ఉంటాయి. ఆటలో ప్రతిరోజూ కొత్త రికార్డులు నమోదవుతూ ఉంటాయి. క్రికెట్ చరిత్రలోని 5 అత్యంత వింతైన, ఆశ్చర్యపరిచే రికార్డుల గురించి ఈ వార్తలో తెలుసుకుందాం. రాశిద్ లతీఫ్ అతి చిన్న సిక్స్ నుండి మొహమ్మద్ షమీ 17 బంతుల ఓవర్ వరకు. ఈ అరుదైన ఘట్టాలు క్రికెట్ ప్రేమికులను ఆశ్యర్యానికి గురిచేస్తాయి.
Cricket Records : క్రికెట్ను జెంటిల్మెన్ గేమ్ అని పిలుస్తారు. కొన్నిసార్లు మైదానంలో వెరైటీ రికార్డులు నమోదవుతాయి. వాటిని వింటే నవ్వుతో పాటు ఆశ్చర్యం కూడా కలుగుతుంది. కొన్ని రికార్డులను ఆటగాళ్లు కావాలని కాకుండా, అనుకోకుండా చేసేస్తారు. ఈరోజు క్రికెట్ చరిత్రలో ఉన్న 5 అత్యంత వింతైన, అరుదైన రికార్డుల గురించి తెలుసుకుందాం.
1. క్రికెట్లో అత్యంత చిన్న సిక్స్
క్రికెట్లో సిక్స్ అంటే బంతి నేరుగా బౌండరీ లైన్ దాటడం అని అర్థం. కానీ, పాకిస్థాన్ మాజీ కెప్టెన్ రాశిద్ లతీఫ్ దాని అర్థాన్నే మార్చేశాడు. శ్రీలంకతో జరిగిన ఒక మ్యాచ్లో అతను బంతిని తేలిగ్గా ఫ్లిక్ చేశాడు. బంతి వికెట్ కీపర్ హెల్మెట్కు తగిలింది, జట్టుకు 5 పరుగులు వచ్చాయి. దీనికి తోడు అతను 1 పరుగు పరుగెత్తి కలిపాడు. అంటే, బంతిని బౌండరీ దాటించకుండానే అతను మొత్తం 6 పరుగులు చేశాడు. ఇది ఒక వింతైన రికార్డు.
2. క్రికెట్లో అతి చిన్న టెస్ట్ మ్యాచ్
టెస్ట్ మ్యాచ్ అంటే ఐదు రోజుల పాటు సుదీర్ఘంగా సాగే ఆట. కానీ 1932లో ఆస్ట్రేలియా, సౌత్ ఆఫ్రికా మధ్య జరిగిన ఒక టెస్ట్ మ్యాచ్ కేవలం 5 గంటల 53 నిమిషాల్లోనే ముగిసింది. ఈ మ్యాచ్లో సౌత్ ఆఫ్రికా మొదట బ్యాటింగ్ చేసి కేవలం 36 పరుగులకే ఆలౌట్ అయ్యింది. ఆ తర్వాత ఆస్ట్రేలియా ఇన్నింగ్స్, 72 పరుగుల తేడాతో ఈ మ్యాచ్ను గెలుచుకుంది. ఇది ఇప్పటివరకు జరిగిన టెస్ట్ మ్యాచ్లలోకెల్లా అతి చిన్న టెస్ట్ మ్యాచ్ గా నిలిచింది.
3. వన్డేల్లో అత్యధిక డక్ లు
శ్రీలంకకు చెందిన విధ్వంసకర బ్యాట్స్మెన్ సనత్ జయసూర్య తన దూకుడైన బ్యాటింగ్ కు మారుపేరు. కానీ, అతని పేరు మీద ఒక వింత రికార్డు కూడా ఉంది. వన్డే క్రికెట్లో అత్యధిక డక్స్ అతని పేరిట ఉన్నాయి. తన కెరీర్లో అతను 34 సార్లు డకౌట్ అయ్యాడు. అందులో 10 సార్లు గోల్డెన్ డక్ (మొదటి బంతికే ఔటవడం) అయ్యాడు. ఇది తనకు ఓ స్పెషల్ రికార్డు.
4. 24 గంటల్లో 3 సార్లు ఔట్ అవ్వడం
పాకిస్థాన్ బ్యాట్స్మెన్ ఉమర్ అక్మల్ ఒక రికార్డును సృష్టించాడు. దీనిని బహుశా ఏ ఆటగాడు రిపీట్ చేయలేదు. ఇంగ్లాండ్తో జరిగిన ఒక టీ20 సిరీస్ చివరి మ్యాచ్లో అతను 24 గంటల్లో మూడుసార్లు ఔటయ్యాడు. మ్యాచ్లో అతను మొదట 9 బంతుల్లో 4 పరుగులు చేసి ఔటయ్యాడు, ఆ మ్యాచ్ టై అయింది. ఆ తర్వాత అక్మల్కు సూపర్ ఓవర్లో మళ్లీ బ్యాటింగ్ చేసే అవకాశం వచ్చింది, అతను మళ్లీ ఔటయ్యాడు. దీని తర్వాత మరుసటి రోజు జరిగిన మ్యాచ్లో కూడా అక్మల్ త్వరగానే ఔటయ్యాడు. ఒకే రోజులో ఇన్నిసార్లు ఔటవడం నిజంగా ఒక వింత రికార్డు.
5. 17 బంతుల్లో ఒక ఓవర్
క్రికెట్లో ఒక ఓవర్లో 6 లీగల్ బంతులు వేయాల్సి ఉంటుంది. కానీ, పాకిస్థాన్కు చెందిన మొహమ్మద్ షమీ ఈ నియమాన్ని పూర్తిగా మార్చేశాడు. 2004లో వెస్టిండీస్తో జరిగిన ఒక మ్యాచ్లో అతను ఒకే ఓవర్లో 7 నో బాల్స్, 4 వైడ్ బాల్స్ వేశాడు. అంటే, ఒక ఓవర్లో మొత్తం 17 బంతులు వేశాడు.
మరిన్ని క్రికెట్ వార్తల కోసం ఇక్కడ క్లిక్ చేయండి..