Video: తొలి ఓవర్‌ మెయిడెన్‌.. 2వ ఓవర్‌లో వికెట్‌.. అరంగేట్రంలోనే భారీ రికార్డ్.. చరిత్ర సృష్టించిన టీమిండియా స్పీడ్‌స్టర్

Mayank Yadav Bowling

Mayank Yadav Brilliant International Debut: భారత్-బంగ్లాదేశ్ మధ్య మూడు మ్యాచ్‌ల టీ20 సిరీస్‌లో మొదటి మ్యాచ్ గ్వాలియర్‌లో జరుగుతోంది. ఈ మ్యాచ్‌లో ఇద్దరు ఆటగాళ్లు టీమిండియాకు అరంగేట్రం చేశారు. ఐపీఎల్‌లో పేస్‌తో సంచలనం సృష్టించిన ఫాస్ట్ బౌలర్ మయాంక్ యాదవ్, ఆల్ రౌండర్ నితీష్ రెడ్డిలకు తొలి అంతర్జాతీయ మ్యాచ్ ఆడే అవకాశం లభించింది. మయాంక్ యాదవ్ తన ఐపీఎల్ కెరీర్‌ను ఎలా ప్రారంభించాడో అదే రీతిలో తన టీ 20 అంతర్జాతీయ కెరీర్‌ను ప్రారంభించాడు. తన తొలి మ్యాచ్‌లో చాలా చక్కగా బౌలింగ్ చేశాడు.

మ్యాచ్ ప్రారంభానికి ముందు భారత మాజీ స్పిన్నర్ మురళీ కార్తీక్ మయాంక్ యాదవ్‌కు అరంగేట్రం క్యాప్ అందించాడు. మయాంక్ యాదవ్ తన మొదటి మ్యాచ్‌లో ఎలా రాణిస్తాడో చూడాలని అందరి చూపు అతనిపైనే ఉంది. మయాంక్ యాదవ్ అభిమానులను ఏమాత్రం నిరాశపరచలేదు. అతను తన మొదటి ఓవర్‌లోనే మెయిడిన్ బౌలింగ్ చేశాడు. రెండో ఓవర్‌లో బంగ్లాదేశ్ దిగ్గజ బ్యాట్స్‌మెన్ మహ్మదుల్లాను పెవిలియన్‌కు పంపాడు. మయాంక్ యాదవ్ తన తొలి 2 ఓవర్లలో కేవలం 3 పరుగులిచ్చి 1 వికెట్ తీశాడు.

అజిత్ అగార్కర్, అర్ష్‌దీప్ సింగ్ రికార్డులను సమం చేసిన మయాంక్ యాదవ్..

మయాంక్ యాదవ్ కూడా తన అద్భుతమైన బౌలింగ్ ఆధారంగా భారీ రికార్డు సృష్టించాడు. ఇప్పుడు తన అంతర్జాతీయ టీ20 అరంగేట్రంలో తొలి ఓవర్ వేసిన మూడో భారత బౌలర్‌గా నిలిచాడు. ఇంతకు ముందు అర్ష్‌దీప్‌ సింగ్‌, అజిత్‌ అగార్కర్‌లు భారత్‌ తరపున ఈ ఘనత సాధించారు. అర్ష్‌దీప్ సింగ్ 2022లో ఇంగ్లండ్‌పై అరంగేట్రం చేసి ఆ తర్వాత మొదటి ఓవర్‌లో మెయిడిన్ బౌలింగ్ చేశాడు. కాగా, భారత జట్టు ప్రస్తుత చీఫ్ సెలెక్టర్ అజిత్ అగార్కర్ 2006లో ఈ ఘనత సాధించారు. జోహన్నెస్‌బర్గ్‌లో దక్షిణాఫ్రికాతో జరిగిన మ్యాచ్‌లో అరంగేట్రం చేస్తున్నప్పుడు అతను మొదటి ఓవర్ బౌలింగ్ చేశాడు. ఇప్పుడు ఈ జాబితాలో మయాంక్ యాదవ్ కూడా చేరాడు.

మయాంక్ యాదవ్ ఐపీఎల్‌లో చాలా వేగంగా బౌలింగ్ చేయడం ద్వారా వార్తల్లో నిలిచాడు. ఐపీఎల్ 2024లో అత్యంత వేగంగా బంతిని బౌలింగ్ చేసిన ఆటగాడిగా రికార్డు సృష్టించాడు. అందుకే భారత జట్టులో చోటు దక్కించుకున్నాడు.

మరిన్ని క్రీడా వార్తల కోసం ఇక్కడ క్లిక్ చేయండి..