Shakib Al Hasan: బంగ్లాదేశ్ స్టార్ ఆల్‌రౌండర్ బిగ్ షాక్.. ICC నిషేధంతో బంగ్లా క్రికెట్‌కు భారీ దెబ్బ!
బంగ్లాదేశ్ స్టార్ షకీబ్ అల్ హసన్‌పై బౌలింగ్ యాక్షన్‌లో లోపాల కారణంగా ICC భారీ నిషేధం విధించింది. అతను అన్ని క్రికెట్ పోటీల్లో బౌలింగ్ చేయడంపై నిషేధం విధించింది. షకీబ్ తన బౌలింగ్ యాక్షన్‌ను సరిచేసి తిరిగి ఐసీసీ అనుమతి తీసుకోవాలని భావిస్తున్నాడు. ఇది అతని కెరీర్‌కు కీలకం కానుంది.
బంగ్లాదేశ్ స్టార్ ఆల్‌రౌండర్ షకీబ్ అల్ హసన్‌పై అంతర్జాతీయ క్రికెట్ కౌన్సిల్ (ICC) భారీ చర్య తీసుకుంది. బౌలింగ్ యాక్షన్‌లో లోపాలు ఉన్నాయని తేలడంతో, షకీబ్‌ను అన్ని అంతర్జాతీయ, జాతీయ క్రికెట్ పోటీల నుంచి బౌలింగ్ చేయకుండా సస్పెండ్ చేశారు. ఈ నిషేధం షకీబ్ క్రికెట్ ప్రయాణానికి పెద్ద ఎదురుదెబ్బ అని చెప్పాలి.
ఇంగ్లండ్ అండ్ వేల్స్ క్రికెట్ బోర్డు (ECB) నిర్వహించే పోటీల్లో షకీబ్ బౌలింగ్ యాక్షన్ 15 డిగ్రీల థ్రెషోల్డ్‌ను మించిపోయినట్లు నిర్ధారించబడింది. ఈ కారణంగా, బౌలింగ్ చేయడానికి అతనికి అనుమతి ఇవ్వలేమని ECB స్పష్టం చేసింది. అంతేకాక, బంగ్లాదేశ్ వెలుపల దేశీయ క్రికెట్ పోటీల్లో కూడా అతని బౌలింగ్‌ను నిషేధించారు.
బంగ్లాదేశ్ క్రికెట్ బోర్డు (BCB) ఈ విషయంపై ఒక ప్రకటన విడుదల చేస్తూ, పరిస్థితి మరింత స్పష్టమయ్యే వరకు షకీబ్ బౌలింగ్ చేయడం నిలిపివేయబడిందని పేర్కొంది. అయితే, షకీబ్ తన బౌలింగ్ యాక్షన్‌ను సరిచేసి స్వతంత్ర అంచనాకు వెళ్లేందుకు సిద్ధమవుతాడని సమాచారం.
అతను ఈ నెల ప్రారంభంలో లాఫ్‌బరో విశ్వవిద్యాలయంలో తన యాక్షన్‌ను పునఃమూల్యాంకనం చేయించుకున్నప్పటికీ, ఇంకా యాక్షన్ సమస్యాత్మకంగానే ఉందని తేలింది. తన బౌలింగ్ యాక్షన్‌ను తిరిగి పరీక్షించేందుకు, షకీబ్ కొత్తగా సమీక్ష కోసం రీక్వెస్ట్ చేయవలసి ఉంటుంది. అప్పటివరకు, అతను ECB నిర్వహించే ఏ పోటీలోనూ బౌలింగ్ చేయడానికి అనుమతించబడదు.
షకీబ్ నిషేధం కారణంగా, బంగ్లాదేశ్ జట్టుకు గణనీయమైన దెబ్బతగిలింది. ఇటీవల ఆఫ్ఘనిస్తాన్‌తో జరిగిన వన్డే సిరీస్‌లో 2-1 తేడాతో ఓటమి చవిచూసిన బంగ్లాదేశ్, వెస్టిండీస్‌తో జరిగిన ODI సిరీస్‌లో 3-0 తేడాతో వైట్‌వాష్‌ను ఎదుర్కొంది.
ఈ పరిస్థితుల్లో, షకీబ్ బౌలింగ్ యాక్షన్‌ను సరిదిద్దుకోవడమే అతని క్రికెట్ కెరీర్‌కు తిరుగులేని మార్గం. అతని వైఫల్యాలు బంగ్లాదేశ్ జట్టు ప్రదర్శనపై ప్రభావం చూపుతున్నాయి, కానీ షకీబ్ తన సమస్యలను అధిగమించి తిరిగి జట్టులోకి చేరతాడని అభిమానులు ఆశిస్తున్నారు.