తొలుత 19తో బరిలోకి.. ఆ తర్వాత 45 ఫిక్స్.. అసలు రోహిత్ శర్మ జెర్సీ నంబర్ వెనుక ఇంత జరిగిందా..?
Rohit Sharma Jersey No. 45: రోహిత్ శర్మ అనగానే గుర్తొచ్చేది ఆయన జెర్సీ నంబర్ 45. అయితే ఈ నంబర్ వెనుక పెద్ద ప్లానింగ్ ఏమీ లేదు. తన తల్లి సలహా, రాహుల్ ద్రవిడ్ నంబర్ 19తో ముడిపడిన ఆసక్తికరమైన కథ ఉంది. తన గేమింగ్ రియాలిటీ షో "ఫ్యామిలీ ఫుల్ హౌస్ విత్ రోహిత్ శర్మ"లో హిట్‌మ్యాన్ స్వయంగా ఈ విషయాన్ని వెల్లడించాడు.
Rohit Sharma Jersey No. 45: రోహిత్ శర్మ (Rohit Sharma) మైదానంలోకి అడుగుపెట్టినప్పుడు అభిమానులు అతడి జెర్సీ నంబర్ 45ను తక్షణమే గుర్తుపడతారు. కానీ ఆ నంబర్ ఎంచుకోవడం వెనుక ఉన్న కథ అతడి తొలినాళ్ల క్రికెట్, మాజీ భారత కెప్టెన్ రాహుల్ ద్రవిడ్ (Rahul Dravid), ముఖ్యంగా అతడి తల్లితో ముడిపడి ఉంది. ఈ విషయాలను రోహిత్ ఇటీవల తన గేమింగ్ రియాలిటీ షోలో పంచుకున్నాడు.
తొలుత ఎంచుకున్న నంబర్ 19..
నంబర్ ఉన్న జెర్సీ ధరించి తొలిసారి క్రికెట్ ఆడినప్పుడు 5, 8, 9 వంటి ప్రముఖ నంబర్లన్నీ ఇతర ఆటగాళ్లు ఇప్పటికే తీసుకున్నారని రోహిత్ చెప్పాడు. తనకు సింగిల్ డిజిట్ నంబర్ కావాలనుకున్నా అన్నీ పోవడంతో మిగిలింది 19 మాత్రమే. ఆ నంబర్ తనకు ఊరికే నచ్చిందని, అందుకే అండర్-19లో అదే నంబర్‌తో ఆడానని చెప్పాడు.
ద్రవిడ్ నంబర్‌తో సమస్య..
అయితే భారత సీనియర్ జట్టులో 19 నంబర్ వేసుకోవడం సాధ్యం కాదని త్వరలోనే రోహిత్‌కు తెలిసింది. ఆ సమయంలో రాహుల్ ద్రవిడ్ భారత కెప్టెన్‌గా ఉండి, 19 నంబర్ జెర్సీతో ఆడేవాడు. అండర్-19లో ఓకే కానీ భారత జట్టులో ఆడితే ఆ నంబర్ తీసుకోలేవని తనతో ఆడుతున్న ఓ ఆటగాడు చెప్పాడని రోహిత్ గుర్తుచేసుకున్నాడు. ఆ ఆటగాడి పేరు ఇప్పుడు గుర్తురావడం లేదని అన్నాడు.
అమ్మ సలహా కోరిన రోహిత్..
వెంటనే మరో నంబర్ ఎంచుకోకుండా, రోహిత్ తన తల్లిని సలహా అడగాలని నిర్ణయించుకున్నాడు. ఆ సాయంత్రం హోటల్‌కు చేరుకున్న వెంటనే అమ్మకు ఫోన్ చేసి, ఆ నంబర్‌తో ఆడలేనని చెప్పి, ఏ నంబర్ తీసుకోవాలో అడిగాడు.
అతడి తల్లి 9 నంబర్ సూచించింది. అది నీకు అదృష్టం తెస్తుందని చెప్పింది. కానీ ఆ నంబర్ అప్పటికే ఇతరుల వద్ద ఉంది. 27 నంబర్ మాత్రం తనకు వద్దనుకున్నాడు.
ఎక్కువమంది చదివినది: W,W,W,W,W,W,W,W,W.. ఒకే ఇన్నింగ్స్‌లో 9 వికెట్లతో చెలరేగిన టీమిండియా ప్లేయర్..!
చివరికి 45 ఎందుకు?
అప్పుడు రోహిత్‌కు 4, 5 అంకెలు పక్కపక్కన ఉంటే చాలా బాగుంటాయనిపించింది. పైగా 4+5 కూడా 9 అవుతుంది. ఈ విషయాన్ని తల్లికి చెప్పి, ఈ నంబర్ తీసుకుంటానని అన్నాడు. అటు 9కి సమానం, ఇటు జెర్సీ మీద 4-5 చూడటానికి బాగుంటుందని వివరించాడు. అలా తల్లి సలహా, తన అభిరుచి కలిసి 45 నంబర్ రోహిత్ గుర్తింపుగా మారింది.
మరిన్ని క్రీడా వార్తల కోసం ఇక్కడ క్లిక్ చేయండి..