IND vs NZ: సొంత గడ్డపై వరుసగా 2 మ్యాచ్‌ల్లో ఓటమి.. కివీస్ కోచ్ షాకింగ్ కామెంట్స్
Rob Walter Comments on India vs New Zealand T20I: భారత్‌తో జరిగిన రెండు టీ20 మ్యాచ్‌లలో ఓటమిపై న్యూజిలాండ్ కోచ్ రాబ్ వాల్టర్ స్పందించాడు. 80% అద్భుతంగా ఆడినా, కీలక సమయాల్లో మ్యాచ్‌ను ముగించడంలో విఫలమయ్యామని అంగీకరించాడు. చిన్న చిన్న తప్పిదాలే పరాజయాలకు కారణమని, అయితే బ్యాటింగ్, బౌలింగ్‌లో సానుకూల అంశాలు ఉన్నాయని, మూడో మ్యాచ్‌లో పుంజుకుంటామని ఆశాభావం వ్యక్తం చేశాడు.
Updated on: Oct 26, 2026 | 9:58 PM
Rob Walter Comments on India vs New Zealand T20I: టీం ఇండియా చేతిలో వరుసగా రెండు టీ20 మ్యాచ్‌లలో ఓటమి పాలైన న్యూజిలాండ్ జట్టు హెడ్ కోచ్ రాబ్ వాల్టర్ ఈ పరాజయాలపై లోతైన విశ్లేషణ చేశారు. రెండు మ్యాచ్‌లలోనూ తమ జట్టు 80% వరకు అద్భుతంగా ఆడిందని, అయితే కీలక సమయాల్లో ఆటను ముగించడంలో విఫలమవడమే పరాజయాలకు ప్రధాన కారణమని ఆయన స్పష్టం చేశారు. క్రైస్ట్ చర్చ్‌లోని హెగ్లీ ఓవెల్ వేదికగా జరిగిన రెండు మ్యాచ్‌లలోనూ న్యూజిలాండ్ జట్టు నాలుగు వికెట్ల తేడాతో ఓటమిని చవిచూసిన విషయం తెలిసిందే. ఈ సిరీస్ ఫలితాలు తమకు తీవ్ర నిరాశను కలిగించినప్పటికీ, భవిష్యత్తుకు కీలకమైన పాఠాలు నేర్పాయని వాల్టర్ పేర్కొన్నారు.
న్యూజిలాండ్ క్రికెట్ విడుదల చేసిన వీడియోలో రాబ్ వాల్టర్ మాట్లాడుతూ, టీ20 క్రికెట్‌లో గెలుపోటముల మధ్య తేడా చాలా స్వల్పంగా ఉంటుందని నొక్కిచెప్పారు. రెండు మ్యాచ్‌లలోనూ తాము సులభంగా గెలవాల్సిన స్థితిలో ఉన్నామని, కానీ ఆటను తమ వైపు తిప్పుకోగల కొన్ని సువర్ణావకాశాలను చేజార్చుకున్నామని అంగీకరించారు. “సరైన ఫినిషింగ్ టచ్ ఇవ్వలేకపోయాం, ఇది తీవ్ర నిరాశకు గురిచేసింది” అని వాల్టర్ పేర్కొన్నారు. ఈ ఓటములకు ప్రధానంగా కారణమైన కొన్ని చిన్న చిన్న తప్పిదాలను ఆయన ఉదహరించారు. ఫీల్డింగ్‌లో కీలక క్యాచ్‌లను జారవిరచడం, ఒక నో బాల్‌కు వికెట్ కోల్పోవడం వంటి అంశాలు మ్యాచ్ ఫలితాలను పూర్తిగా తారుమారు చేశాయని ఆయన అభిప్రాయపడ్డారు. ఇలాంటి చిన్న పొరపాట్లు అంతిమంగా మ్యాచ్‌లను కోల్పోయేలా చేశాయని వివరించారు. అయితే, ఈ రెండు మ్యాచ్‌లనుంచీ నేర్చుకోవాల్సింది చాలా ఉందని, భవిష్యత్తులో ఇలాంటి పొరపాట్లు పునరావృతం కాకుండా చూసుకుంటామని వాల్టర్ హామీ ఇచ్చారు.
ఎక్కువమంది చదివినది: IND vs NZ: కివీస్‌తో వన్డే సిరీస్.. బుల్లెట్ షాట్లతో కోహ్లీ లోడింగ్.. రోకో జోడీ బయల్దేరేది ఎప్పుడంటే?
ఈ రెండు మ్యాచ్‌లలో ఓటమి పాలైనప్పటికీ, జట్టు ప్రదర్శనలో కొన్ని సానుకూల అంశాలు కూడా ఉన్నాయని రాబ్ వాల్టర్ ప్రస్తావించారు. ముఖ్యంగా బ్యాటింగ్ యూనిట్ లోని పలువురు ఆటగాళ్ళు అద్భుతంగా రాణించారని ఆయన ప్రశంసించారు. రెండో మ్యాచ్‌ను ఉదాహరణగా చూపుతూ, పవర్ ప్లేలోనే మూడు వికెట్లు కోల్పోయి కష్టాల్లో పడినప్పుడు కూడా జట్టు 180 పరుగుల గౌరవప్రదమైన స్కోరు చేయగలగడం గొప్ప విషయమని వాల్టర్ పేర్కొన్నారు. ఇది బ్యాటింగ్ డెప్త్, ఆటగాళ్ల పోరాట స్ఫూర్తికి నిదర్శనమని ఆయన అన్నారు. ఇక బౌలింగ్ విషయంలో కూడా తొలి మ్యాచ్ కంటే రెండో మ్యాచ్‌లో మెరుగైన ప్రదర్శన కనబర్చిందని వాల్టర్ తెలిపారు. ప్రత్యేకించి కెప్టెన్ సాంట్నర్ బౌలింగ్ టీం ఇండియా బ్యాట్స్‌మెన్‌లను బాగా ఇబ్బంది పెట్టిందని, ఇది తమకు సానుకూల అంశంగా భావిస్తున్నామని ఆయన అన్నారు.
ఎక్కువమంది చదివినది: Tilak Varma: టీ20ల్లో కోహ్లీ వారసుడు ఇతనే.. ఛేజింగ్‌ అంటే చిర్రెత్తిపోతున్నాడుగా..!
మంగళవారం వెల్లింగ్టన్‌లో జరగనున్న మూడో టీ20 మ్యాచ్‌పై రాబ్ వాల్టర్ తన ఆశలను వ్యక్తం చేశారు. వెల్లింగ్టన్‌లోని పరిస్థితులు ఇతర మైదానాల కంటే భిన్నంగా ఉంటాయని ఆయన అంచనా వేశారు. ఇది సంప్రదాయ క్రికెట్ గ్రౌండ్ కాదని, స్టేడియంలో గాలి దిశను అంచనా వేయడం కష్టమని వాల్టర్ వివరించారు. అంతేకాకుండా, ఇది డ్రాప్-ఇన్ పిచ్ కావడంతో దాని స్వభావం కూడా భిన్నంగా ఉండవచ్చని పేర్కొన్నారు. మిగిలిన మ్యాచ్‌లలో పరిస్థితులకు తగ్గట్లుగా తమ ఆటగాళ్ళు రాణిస్తే సిరీస్ సాధిస్తామనే గట్టి నమ్మకం తనకుందని రాబ్ వాల్టర్ చెప్పుకొచ్చారు. రాబోయే మ్యాచ్‌లలో జట్టు తమ తప్పుల నుంచి నేర్చుకొని, పూర్తి సామర్థ్యంతో ఆడుతుందని ఆయన ధీమా వ్యక్తం చేశారు.
మరిన్ని క్రీడా వార్తల కోసం ఇక్కడ క్లిక్ చేయండి..
