వామ్మో.. ఏడాదికి ఏకంగా రూ.9.5 కోట్లా.. ఐపీఎల్లో అత్యధిక శాలరీ అందుకుంటున్న కోచ్ ఎవరు?
IPL Coach Salary: ప్రపంచంలోనే అత్యంత సంపన్న లీగ్ అయిన ఐపీఎల్లో ఆటగాళ్లతో సమానంగా ప్రధాన కోచ్లకు కూడా కళ్లు చెదిరే పారితోషికాలు అందుతున్నాయి. ప్రధానంగా ఆస్ట్రేలియా మాజీ దిగ్గజం రికీ పాంటింగ్, టీమిండియా మాజీ పేసర్ ఆశిష్ నెహ్రాలు భారీ వార్షిక ఆదాయంతో జాబితాలో అగ్రస్థానంలో నిలవడం అభిమానులను విస్మయానికి గురిచేస్తోంది.
Updated on: Aug 20, 2026 | 7:45 PM
IPL Coach Salary: పంజాబ్ కింగ్స్ జట్టు ప్రధాన కోచ్గా వ్యవహరిస్తున్న ఆస్ట్రేలియా దిగ్గజం రికీ పాంటింగ్ ఏడాదికి సుమారు రూ.9.5 కోట్లు ఆర్జిస్తున్నట్లు నివేదికలు స్పష్టం చేస్తున్నాయి. గతంలో ఆయన పూర్తిస్థాయి అంతర్జాతీయ ఆటగాడిగా ఉన్నప్పుడు వార్షిక ఆదాయం సుమారు రూ.1.2 కోట్లుగా ఉండేది. మరోవైపు గుజరాత్ టైటాన్స్ హెడ్ కోచ్ ఆశిష్ నెహ్రా కూడా పాంటింగ్తో సమానంగా భారీ పారితోషికం అందుకుంటున్నారు. ప్రారంభంలో సాధారణ ఒప్పందంతో జట్టులో చేరినప్పటికీ, 2022లో టైటాన్స్కు ట్రోఫీ అందించిన తర్వాత ఆయన కాంట్రాక్ట్ విలువను యాజమాన్యం భారీగా పెంచింది.
ఇతర దిగ్గజాల ఆదాయ వివరాలు..
చెన్నై సూపర్ కింగ్స్ మాజీ కోచ్ స్టీఫెన్ ఫ్లెమింగ్ ఏడాదికి సుమారు రూ.7.5 కోట్లు తీసుకునేవారు. ఢిల్లీ క్యాపిటల్స్ బ్యాటింగ్ కోచ్గా ప్రచారంలో నిలిచిన యువరాజ్ సింగ్ దాదాపు రూ.6 కోట్లకు పైగా వార్షిక వేతనం అందుకోనున్నట్లు తెలుస్తోంది. లక్నో సూపర్ జెయింట్స్ మెంటార్గా వ్యవహరించిన జహీర్ ఖాన్ రూ.5 కోట్లు, రాజస్థాన్ రాయల్స్లో పనిచేసిన రాహుల్ ద్రవిడ్ రూ.4.5 కోట్లు, రాయల్ ఛాలెంజర్స్ బెంగళూరుకు చెందిన ఆండీ ఫ్లవర్, జస్టిన్ లాంగర్లు చెరో రూ.4 కోట్లు సంపాదిస్తున్నారు.
ఎక్కువమంది చదివినది: SL vs IND: 7 ఇన్నింగ్స్లో ఒకే ఒక్క హాఫ్ సెంచరీ.. వేటుకు సిద్ధమైన గంభీర్?
జాతీయ జట్ల కంటే ఐపీఎల్ కోచింగ్కే ఎందుకు ప్రాధాన్యం..?
దాదాపు రెండు నెలల పాటు సాగే ఈ మెగా లీగ్లో వ్యూహరచన, తుది జట్టు ఎంపికల విషయంలో కోచ్ల పాత్ర అత్యంత కీలకంగా మారింది. అంతేకాకుండా ఫ్రాంచైజీలు విదేశీ లీగ్లలో కూడా జట్లను కొనుగోలు చేస్తుండటంతో, ప్రధాన కోచ్ల బాధ్యత ఏడాది పొడవునా కొనసాగుతోంది. లీగ్ ఆరంభంలో విదేశీ కోచ్ల వేతనం రూ.1.5 కోట్ల నుంచి రూ.2 కోట్ల లోపే ఉండగా, మార్కెట్ పెరగడంతో ఇప్పుడు వారి విలువ నాలుగింతలకు పైగా పెరిగింది.
భారీ ఆదాయంతో పాటు అంతర్జాతీయ గుర్తింపు లభిస్తుండటంతో మాజీ దిగ్గజాలు జాతీయ జట్ల కంటే ఐపీఎల్ వైపే మొగ్గు చూపుతున్నారు. రాబోయే కాలంలో ఈ కోచింగ్ ప్యాకేజీలు మరింత భారీ స్థాయికి చేరే అవకాశాలు స్పష్టంగా కనిపిస్తున్నాయి.
మరిన్ని క్రికెట్ వార్తల కోసం ఇక్కడ క్లిక్ చేయండి..
