గంటకు 150 కిమీల వేగంతో పాక్, ఆసీస్ టీంలకు దడ పుట్టించాడు.. అప్పుడే కన్నేసిన 3 ఐపీఎల్ టీంలు..!
IPL 2027 Auction: ప్రస్తుత క్రికెట్ ప్రపంచంలో అరుదుగా లభించే ఎక్స్ప్రెస్ వేగం నహీద్ రాణా సొంతం. ఐపీఎల్ వంటి ప్రతిష్టాత్మక వేదికపై రాణించగల అన్ని అర్హతలు ఈ యువ ఆటగాడిలో పుష్కలంగా ఉన్నాయి. మరి రాబోయే వేలంలో ఏ ఫ్రాంచైజీ భారీ ధర పలికి ఈ బంగ్లాదేశ్ ఎక్స్ప్రెస్ను తమ గూటికి చేర్చుకుంటుందో చూడాలి.
IPL 2027 Auction: క్రికెట్ ప్రపంచంలో ఇప్పుడు ఒక సరికొత్త సంచలనం ఊహించని వేగంతో దూసుకొస్తోంది. అతడే బంగ్లాదేశ్ యువ పేసర్ నహీద్ రాణా. గంటకు 150 కిలోమీటర్లకు పైగా వేగంతో బంతులు విసురుతూ ప్రత్యర్థి వికెట్లను వేటాడే ఈ 23 ఏళ్ల యువ కిరణంపై ఇప్పుడు ఇండియన్ ప్రీమియర్ లీగ్ (ఐపీఎల్) ఫ్రాంచైజీల కన్ను పడింది.
పాకిస్తాన్, ఆస్ట్రేలియా బ్యాటర్లను వణికించిన వైనం..
ఇటీవల జరిగిన అంతర్జాతీయ మ్యాచ్లలో నహీద్ రాణా సృష్టించిన విధ్వంసం అంతా ఇంతా కాదు. పాకిస్తాన్తో జరిగిన వన్డే సిరీస్లో ఒకే మ్యాచ్లో ఐదు వికెట్లు పడగొట్టి అందరి దృష్టిని ఆకర్షించిన రాణా, ఆ సిరీస్లో మొత్తం 8 వికెట్లు ఖాతాలో వేసుకున్నాడు. టెస్టుల్లోనూ 11 వికెట్లతో చెలరేగాడు. ఆ తర్వాత బలమైన ఆస్ట్రేలియా జట్టుపై సైతం తన ప్రతాపం చూపించి ఒంటిచేత్తో కంగారూలను దెబ్బతీశాడు. ఈ అద్భుత ప్రదర్శనకు గుర్తింపుగా అంతర్జాతీయ క్రికెట్ కౌన్సిల్ (ICC) వన్డే ర్యాంకింగ్స్లో ఏకంగా 23 స్థానాలు ఎగబాకి 24వ ర్యాంకుకు చేరుకున్నాడు. ఆస్ట్రేలియా వికెట్ కీపర్ అలెక్స్ కేరీ సైతం ఇతని వేగానికి ముగ్ధుడై బిగ్ బాష్ లీగ్ ఒప్పందాన్ని ఆఫర్ చేశాడంటే ఈ యువ బౌలర్ ముద్ర ఎలాంటిదో అర్థం చేసుకోవచ్చు. ఒకవేళ సరిహద్దుల మధ్య రాజకీయ ఉద్రిక్తతలు తగ్గితే, రాబోయే ఐపీఎల్ 2027 వేలంలో ఇతడిని సొంతం చేసుకోవడానికి మూడు జట్లు తీవ్రంగా పోటీపడే అవకాశం ఉంది.
1. సన్రైజర్స్ హైదరాబాద్ (SRH)..
ఆరెంజ్ ఆర్మీకి వచ్చే సీజన్లో ఒక పటిష్టమైన విదేశీ ఫాస్ట్ బౌలర్ అవసరం ఎంతైనా ఉంది. జట్టు సారథి పాట్ కమిన్స్ రాబోయే వన్డే ప్రపంచకప్ 2027పై దృష్టి పెట్టడానికి, పని ఒత్తిడిని తగ్గించుకోవడానికి వచ్చే ఐపీఎల్ సీజన్కు దూరం కానున్నట్లు ఇప్పటికే సంకేతాలు ఇచ్చాడు. గత సీజన్లో హైదరాబాద్ బౌలింగ్ విభాగం ఆశించిన స్థాయిలో రాణించలేదు. హర్షల్ పటేల్, జయదేవ్ ఉనద్కత్ వంటి సీనియర్లను జట్టు వదిలిపెట్టే యోచనలో ఉంది. ఈ క్రమంలో కమిన్స్ స్థానాన్ని భర్తీ చేస్తూ, కొత్త బంతితో ప్రత్యర్థులను భయపెట్టేందుకు నహీద్ రాణా సరైన ఎంపిక అవుతాడు.
2. ముంబై ఇండియన్స్ (MI)..
ఐదుసార్లు ఛాంపియన్గా నిలిచిన ముంబై ఇండియన్స్కు గత సీజన్ ఒక పీడకలలా మిగిలిపోయింది. ఆ జట్టు వైఫల్యానికి ప్రధాన కారణం బౌలింగ్ బలహీనత. జస్ప్రీత్ బుమ్రా సైతం వికెట్లు తీయడానికి తీవ్రంగా శ్రమించాల్సి వచ్చింది. ట్రెంట్ బౌల్ట్, దీపక్ చాహర్ వంటి అనుభవజ్ఞులు దారుణంగా విఫలమయ్యారు. ఈ ముగ్గురు కీలక బౌలర్లు కలిసి తీసిన వికెట్ల కంటే ఇతర జట్ల బౌలర్లు సాధించిన వికెట్లే ఎక్కువగా ఉన్నాయి. ఈ నేపథ్యంలో ముంబై జట్టు తన పేస్ విభాగానికి కొత్త రక్తాన్ని ఎక్కించాల్సిన అవసరం ఉంది. రాణా వేగం బుమ్రాకు తోడైతే ముంబై బౌలింగ్ మళ్లీ పూర్వవైభవాన్ని సంతరించుకుంటుంది.
3. కోల్కతా నైట్ రైడర్స్ (KKR)..
కోల్కతా జట్టుకు బంగ్లాదేశ్ ఆటగాళ్లతో మంచి అనుబంధం ఉంది. గత సీజన్లో వారు ముస్తాఫిజుర్ రెహమాన్ను కొనుగోలు చేసినప్పటికీ, కొన్ని అనివార్య కారణాల వల్ల అతడిని విడుదల చేయాల్సి వచ్చింది. ఇప్పుడు ఆ స్థానంలో ఒక నాణ్యమైన ప్రత్యామ్నాయాన్ని ఎంచుకునే అవకాశం కోల్కతాకు దక్కితే, వారి మొదటి ప్రాధాన్యత నహీద్ రాణానే కావచ్చు. ప్రస్తుతం కోల్కతా జట్టులో ఉన్న బౌలింగ్ లోపాలను సరిదిద్దడానికి. జట్టుకు అదనపు బలాన్ని చేకూర్చడానికి ఈ యువ స్పీడ్స్టర్ ఎంతగానో ఉపయోగపడతాడు.
మరిన్ని క్రికెట్ వార్తల కోసం ఇక్కడ క్లిక్ చేయండి..